މަަންދޫ ބަނދަރުގެ މަޝްރޫއު ލަސްވަނީ ރައްޔިތުންގެ މެދުގައި އެކަމާމެދު ދެބަސްވުންތަކެއް ހުރުމުންކަމަށް މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

މިނިސްޓަރ އެހެން ވިދާޅުވީ އދ. މަންދޫ ބަނދަރުގެ ދަތިކަން ޙައްލުކުރުމަށް މަސައްކަތް ފެށުމަށްފަހު، ޕެޓިޝަނެއްގެ ސަބަބުން އެ މަސައްކަތް މަޑުޖެހިފައިވާތީ އެކަން ސާފުކޮށްދިނުމަށް ދަނގެތީ ދާއިރާގެ މެމްބަރު މުޙައްމަދު ނާޒިމް ކުރެއްވި ސުވާލުގެ ޖަވާބުގައެވެ.

އެކަމާ ގުޅޭގޮތުން މިނިސްޓަރ ވިދާޅުވީ، ބަނދަރު ހަދާނެ ތަނަކާ ގުޅޭގޮތުން މިނިސްޓްރީއާއި، ރަށު ކައުންސިލާއެކު ފެށުނީއްސުރެ މަޝްވަރާތަކެއް ކުރެވިފައިވާ ކަމަށެވެ. އެގޮތުން ރަށުގެ އިރުމަތީ ފަރާތުގައި ވިލެއް އޮންނަކަން ފާހަގަކުރައްވައި މިނިސްޓަރ ވިދާޅުވީ އެތަނުގައި ބަނދަރެއް ހަދާނެ ފުޅާމިން ފަޅުން ނުލިބޭތީ ބަނދަރު ހަނިވެ، ގޮނޑުދޮށުގައި އޮންނަ ވެލިގަނޑަށް ވެސް އޭގެ އަސަރު ކުރާނެ ކަމަށެވެ. އަދި ދިމާވާ އެންމެ ބޮޑު މައްސަލައަކީ ބަނދަރު ހަދާނެ ޖާގަ ނުލިބުންކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ، ކައުންސިލާއެކު އެއްބަސްވުމަކަށް އާދެވުނީ ރަށުގެ ފުއްޓަރު ފަރާތުގައި ބަނދަރު ހެދުމަށް ކަމަށެވެ. އަދި ކޮންޓްރެކްޓަރ ރަށަށް މޮބިލައިޒް ކޮށްފައި ވަނިކޮށް ރަށުގެ ރައްޔިތުންގެ ތެރެއިން ބަޔަކު އެކަމަށް އިހުތިޖާޖުކޮށް ޕެޓިޝަނެއް ހުށަހަޅާފައިވާކަމަށް މިނިސްޓަރ ވިދާޅުވިއެވެ.

މިނިސްޓަރ އިތުރަށް ވިދާޅުވީ، ރަށުގެ މަސްލަޙަތު ގެއްލި، މަސައްކަތް ކުރިއަށް ގެންދަން ސަރުކާރަށް ދަތިވެދާނެތީއާއި، މަސައްކަތްތަކެއް ފަށާފައި އަނެއްކާވެސް ހުއްޓާލަން ޖެހިއްޖެނަމަ ރަށުގެ ތިމާވެއްޓަށް ލިބޭ ގެއްލުމުގެ އިތުރުން، ކޮންޓްރެކްޓަރާއި، ދައުލަތަށް ވެސް ގެއްލުންތަކެއް ވެދާނެކަން މިނިސްޓަރ ފާހަގަކުރެއްވިއެވެ. އަދި ރައްޔިތުންނާ ވެސް މަޝްވަރާކޮށް ޙައްލެއް ހޯދުމަށްފަހު މެނުވީ އެ މަސައްކަތައިގެން ކުރިއަށް ދެވޭނެކަމަކަށް ގަބޫލުފުޅު ނުކުރައްވާކަމަށް މިނިސްޓަރ ވިދާޅުވިއެވެ.

އޭގެ އިތުރުން، ރަށުގެ ރައްޔިތުން ތަމްސީލު ކުރަނީ ކައުންސިލުން ކަމަށްވުމާއެކު، މަސައްކަތް ނިމިގެންދާއިރު މިނިސްޓްރީއަށް ވެސް ކުރިއަށްދެވޭނީ ކައުންސިލުގެ ވެސް ރުހުމާއެކުކަން މިނިސްޓަރ ފާހަގަކުރެއްވިއެވެ.

އދ. މަންދޫ ބަނދަރު ހެދުމުގެ މަޝްރޫޢު ކުރިއަށް ގެންދިއުމަށް ޙަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އާއެވެ.

37,358,709 ރުފިޔާ ޚަރަދުކޮށްގެން ކުރިއަށްގެންދާ މި މަޝްރޫޢުއަކީ 330 ދުވަހުގެ ތެރޭގައި ނިންމުމަށް ހަވާލުކޮށްފައިވާ މަޝްރޫޢެކެވެ.