އިންޑިއާއަށް ޕްރެޝަރު، އަފްޣާނިސްތާނަށް ފަސޭހަ މޮޅެއް

މިހާރު ކުރިއަށްދާ ޓީ20 ވޯލްޑް ކަޕުގައި އާދީއްތަ ދުވަހު ކުޅުނު މެޗުން ނިއު ޒީލެންޑް އަތުން ބަލިވެ އިންޑިއާ ޕްރެޝަރަށް ވެއްޓުނުއިރު، ނެމިބިއާ އަތުން ފަސޭހަކަމާއެކު އަފްޣާނިސްތާން މޮޅުވެއްޖެއެވެ.

މި މުބާރާތުގެ މެޗުތައް ޔުނައިޓެޑް އަރަބި އެމިރޭޓްސް (ޔޫއޭއީ) ގައި ކުޅެމުން އަންނައިރު، އާދީއްތަ ދުވަހުގެރޭ ކުޅުނު މެޗުން ނިއު ޒީލެންޑް އަތުން އިންޑިއާ ބަލިވީ އަށް ވިކެޓުންނެވެ. މި މެޗުގެ ކުރިން މި ފަހަރުގެ މުބާރާތުގައި ކުޅުނު ފުރަތަމަ މެޗުން އިންޑިއާ ވަނީ ވާދަވެރި ޕާކިސްތާން އަތުން 10 ވިކެޓުން ބަލިވެފައެވެ. މިއީ ވޯލްޑް ކަޕެއްގައި ޕާކިސްތާން އަތުން އިންޑިއާ ބަލިވި ފުރަތަމަ ފަހަރެވެ.

އާދީއްތަ ދުވަހުގެރޭ ކުޅުނު މެޗުގެ ޓޮސް ދިމާވުމުން ނިއު ޒީލެންޑުން ނިންމީ ހޮވުމަށެވެ. އެއާއެކު އިންޑިއާ އެންމެ ފުރަތަމަ ކުޅެން އަރައި، 20 އޯވަރު ހަމަވިއިރު ހަތް ކުޅުންތެރިން ނުބައިވެގެން ހެދުނީ 110 ލަނޑެވެ. އެ ގައުމުން އެންމެ ރަނގަޅަށް ކުޅުނީ ނުބައިނުވެ 19 ބޯޅައިން 26 ލަނޑު ހެދި ރަވިންދުރަ ޖަދޭޖާ އާއި 24 ބޯޅައިން 23 ލަނޑު ހަމަކުރި ހަރްޑިކް ޕާންޑްޔާއެވެ.

ޖަވާބުގައި ނިއު ޒީލެންޑް ކުޅެން އަރައި 14.3 އޯވަރުގެ ތެރޭގައި ދެ ކުޅުންތެރިއަކު ނުބައިވެގެން ވަނީ 111 ލަނޑު ހަދައި، މެޗު ކާމިޔާބުކޮށްފައެވެ. އެ ގައުމުން އެންމެ ރަނގަޅަށް ކުޅުނީ 35 ބޯޅައިން 49 ލަނޑު ހެދި ޑަރީލް މިޗެލް އާއި ނުބައިނުވެ 31 ބޯޅައިން 33 ލަނޑު ހަމަކުރި ކޭން ވިލިއަމްސަންއެވެ.

މި މެޗުން އިންޑިއާ ބަލިވިއިރު، އާދީއްތަ ދުވަހު ކުޅުނު މެޗުން އަފްޣާނިސްތާން މޮޅުވީ ނެމިބިއާ އަތުން 62 ލަނޑުންނެވެ.

މި މެޗުގެ ޓޮސް ދިމާވުމުން އަފްޣާނިސްތާން އެންމެ ފުރަތަމަ ކުޅެން އަރައި، 20 އޯވަރު ހަމަވިއިރު ފަސް ކުޅުންތެރިން ނުބައިވެގެން ވަނީ 160 ލަނޑު ހަދާފައެވެ. އެ ގައުމުން އެންމެ ރަނގަޅަށް ކުޅުނީ 33 ބޯޅައިން 45 ލަނޑު ހެދި މުޙައްމަދު ޝަހްޒާދާއި 27 ބޯޅައިން 33 ލަނޑު ހަމަކުރި ހަޒްރަތުﷲ ޒަޒާއިއެވެ.

ޖަވާބުގައި ނެމިބިއާ ކުޅެން އަރައި 20 އޯވަރު ހަމަވިއިރު، ދެނުވަ ކުޅުންތެރިން ނުބައިވެގެން ހެދުނީ 98 ލަނޑެވެ. އެ ގައުމުން އެންމެ ރަނގަޅަށް ކުޅުނީ 30 ބޯޅައިން 26 ލަނޑު އެއްކުރި ޑޭވިޑް ވީސްއެވެ.

މި ނަތީޖާތަކާއެކު ގްރޫޕް ދޭއްގެ ދެވަނައިގައި އަފްޣާނިސްތާން އޮތީ ހަތަރު ޕޮއިންޓާއެކުއެވެ. މި ގްރޫޕުގެ އެއްވަނައިގައި އޮތީ ކުޅުނު ތިން މެޗުންވެސް މޮޅުވެ ހަ ޕޮއިންޓް ހަމަކޮށްފައިވާ ޕާކިސްތާނެވެ. އަދި އިންޑިއާ އޮތީ ތާވަލުގެ ފުލުން ދެވަނައިގައި ޕޮއިންޓެއް ނުލިބިއެވެ.