ހޮނިހިރު ދުވަހު ލ. އަތޮޅުން ފުރައިގެން ގއ. އަތޮޅަށް ދަތުރު ކުރަމުން ދިޔަ އަލްމާ ބޯޓު، ކަނޑުގަދަވެ މިސްރާބަށް ދަތުރުކުރަން އުނދަގޫވުމާ ގުޅިގެން އެމްއެންޑީއެފުން އެހީތެރިކަން ފޯރުކޮށްދީފިއެވެ.

ހުވަދޫ ކަނޑުން ދަތުރު ކުރަމުން ދަނިކޮށް އެބޯޓު ގަދައިގައި ޖެހި 3 ގަޑި އިރުގެ ދަތުރު 7 ގަޑި އިރު ވީއިރުވެސް ރަށަކާ ކައިރި ނުކުރެވުމުން ބޯޓުން އެމްއެންޑީއެފަށް ގުޅައި އެހީތެރިކަމަށް އެދިފައިވެއެވެ. އެމްއެންޑީއެފުން ބުނީ މާލެއިން ފުރައިގެން އައްޑު އަތޮޅަށް ދަތުރުކުރި "އަލްމާ" ނަމަކަށް ކިޔާ ބޯޓު، ކަނޑު ގަދަވެ ދަތުރުނުކުރެވުމުން އެމްއެންޑީއެފް ކޯސްޓްގާޑުގެ އެހީތެރިކަމަށް އެދިފައިވަނީ އާދީއްތަ ދުވަހު މެންދުރުފަހު 13:45 ހާއިރުކަމަށެވެ.

އެމްއެންޑީއެފްގެ ސަދަން އޭރިއާ ކޮމާންޑުގެ ކޯސްޓްގާޑު ސްކޮޑްރަންގެ ސިފައިން ވަނީ ބޯޓު އޮތް ސަރަހައްދަށް ގޮސް އެހީތެރިކަން ފޯރުކޮށްދީފައެވެ. އަދި ކޯސްޓްގާޑުގެ ބެލުމުގެ ދަށުން ސަލާމަތްތެރިކަމާ އެކު އާދީއްތަ ދުވަހުގެ ރޭ  09:30 ހާއިރު ގއ. މާމެންދޫ ބަނދަރަށް ގެންދެވިފައިވާ ކަމަށް އެމްއެންޑީއެފުން ބުނެއެވެ.

އެބޯޓުގެ ވެރިޔާ މޫސާ އަހުމަދުދީދީ ރާއްޖެއެމްވީއަށް މަޢުލޫމާތު ދެއްވަމުން ވިދާޅުވީ މިހާދިސާގައި ބޯޓަށް މާބޮޑު ގެއްލުމެއް ނުލިބޭ ކަމަށާއި އެހެންނަމަވެސް ގަދަވަޔާއެކު ދޮރެއް ލެއްޕުނު ވަގުތު މުވައްޒަފެއްގެ އިނގިލި ފިތިފައިވާތީ އެމްއެންޑީއެފްގެ އެހީތެރިކަމާއެކު ސީއެމްބިއުލާންސްގައި އެމީހާ ވިލިނގިލީ ސިއްޙީ މަރުކަޒަށް ގެންދެވުނު ކަމަށެވެ.

ގއ. އެކެފަރުގެ އުތުރުން 8 ނޯޓިކަލް މޭލު ބޭރުން ދަތުރުކުރަމުންދިޔަ މި ބޯޓުގައި ފަސް ދިވެހިންނާއި ތިން ބިދޭސީން ތިއްބެވެ. މިބޯޓަކީ ގއ. އަތޮޅާއި ގދ. އަތޮޅު، އަދި އައްޑޫސިޓީގެ ވިޔަފާރިވެރިންގެ މުދާ ބަރުކޮށްގެން ދަތުރު ކުރަމުން އަންނަ އައްޑޫސިޓީ މީދޫ ބޯޓެކެވެ. މިބޯޓަކީ ވޭތުވެދިޔަ 2 އަހަރު  ދެފަހަރެއްގެ މަތިން ފަރަށް އަރައި ބޮޑެތި ގެއްލުންތަކެއް ވުމުން އަލުން މަރާމާތުކޮށްގެން ދުއްވަމުން އަންނަ ބޯޓެކެވެ.