މިހާރު ކުރިއަށްދާ ޓީ20 ވޯލްޑް ކަޕުގައި ހޮނިހިރު ދުވަހު ކުޅުނު މެޗުތަކުން ގްރޫޕް އެކެއްގައި ހިމެނޭ އިންގްލެންޑާއި ސައުތު އެފްރިކާ މޮޅުވެއްޖެއެވެ.

މި މުބާރާތުގެ މެޗުތައް ޔުނައިޓެޑް އަރަބި އެމިރޭޓްސް (ޔޫއޭއީ) ގައި ކުޅެމުން އަންނައިރު، ހޮނިހިރު ދުވަހުގެރޭ ކުޅުނު މެޗުން އިންގްލެންޑް މޮޅުވީ އޮސްޓްރޭލިއާ އަތުން އަށް ވިކެޓުންނެވެ.

މި މެޗުގެ ޓޮސް ދިމާވުމުން އިންގްލެންޑުން ނިންމީ ހޮވުމަށެވެ. އެއާއެކު އޮސްޓްރޭލިއާ އެންމެ ފުރަތަމަ ކުޅެން އަރައި، 20 އޯވަރު ހަމަވިއިރު ހުރިހާ ކުޅުންތެރިން ނުބައިވެގެން ހެދުނީ 125 ލަނޑެވެ. އެ ގައުމުން އެންމެ ރަނގަޅަށް ކުޅުނީ 49 ބޯޅައިން 44 ލަނޑު ހެދި އާރޮން ފިންޗާއި 20 ބޯޅައިން 20 ލަނޑު ހަމަކުރި އޭޝްޓަން އޭގާއެވެ.

ޖަވާބުގައި އިންގްލެންޑް ކުޅެން އަރައި 11.4 ވަނަ އޯވަރުގެ ތެރޭގައި ދެ ކުޅުންތެރިއަކު ނުބައިވެގެން ވަނީ 126 ލަނޑު ހަދައި، މެޗު ކާމިޔާބުކޮށްފައެވެ. އެ ގައުމުން އެންމެ ރަނގަޅަށް ކުޅުނީ 32 ބޯޅައިން 71 ލަނޑު ހެދި ޖޮސް ބަޓްލާ އާއި 20 ބޯޅައިން 22 ލަނޑު ހަމަކުރި ޖޭސަން ރޯއިއެވެ.

މި މެޗުން އިންގްލެންޑް މޮޅުވިއިރު، ހޮނިހިރު ދުވަހު ކުޅުނު މެޗުން ސައުތު އެފްރިކާ މޮޅުވީ ސްރީ ލަންކާ އަތުން ހަތަރު ވިކެޓުންނެވެ.

މި މެޗުގެ ޓޮސް ދިމާވުމުން ސައުތު އެފްރިކާއިން ނިންމީ ހޮވުމަށެވެ. އެއާއެކު ލަންކާ އެންމެ ފުރަތަމަ ކުޅެން އަރައި، 20 އޯވަރު ހަމަވިއިރު ހުރިހާ ކުޅުންތެރިން ނުބައިވެގެން ހެދުނީ 142 ލަނޑެވެ. އެ ގައުމުން އެންމެ ރަނގަޅަށް ކުޅުނީ 58 ބޯޅައިން 72 ލަނޑު ހެދި ޕަތުމް ނިސަންކާ އާއި 14 ބޯޅައިން 21 ލަނޑު ހަމަކުރި ޗަރިތު އަސަލަންކާއެވެ.

ޖަވާބުގައި ސައުތު އެފްރިކާ ކުޅެން އަރައި 19.5 އޯވަރުގެ ތެރޭގައި ހަ ކުޅުންތެރިން ނުބައިވެގެން ވަނީ 146 ލަނޑު ހަދައި، މެޗު ކާމިޔާބުކޮށްފައެވެ. އެ ގައުމުން އެންމެ ރަނގަޅަށް ކުޅުނީ 46 ބޯޅައިން 46 ލަނޑު ހެދި ޓެމްބާ ބަވޫމާ އާއި 13 ބޯޅައިން 23 ލަނޑު ހަމަކުރި ޑޭވިޑް މިލާއެވެ.

މި ނަތީޖާތަކާއެކު ގްރޫޕް އެކެއްގެ އެއްވަނައިގައި އިންގްލެންޑް އޮތީ ހަ ޕޮއިންޓާއެކުއެވެ. އަދި ދެވަނައިގައި އޮތް ސައުތު އެފްރިކާ އާއި ތިންވަނައިގައި އޮތް އޮސްޓްރޭލިއާއަށް ވަނީ ދެ ޕޮއިންޓް ލިބިފައެވެ.