ދައުލަތުގެ ބަޖެޓް 2022: ފަތުރުވެރިކަމަށް އާރޯކަން ލިބި، އަންނަ އަހަރު ރާއްޖޭގެ އިޤްތިޞާދު 12.0 އިންސައްތައިން ކުރިއަރާނެކަމަށް ލަފާކުރެވޭ
31 އޮކްޓޯބަރު 2021 | އާދީއްތަ 04:40އަންނަ އަހަރު ރާއްޖެއަށް 1.5 މިލިއަނާއި 1.8 މިލިއަން ދޭތެރޭ އަދަދަކަށް ފަތުރުވެރިން ޒިޔާރަތްކުރާނެ
ރާއްޖެ އައި ފަތުރުވެރިންތަކެއް
އަންނަ އަހަރު ރާއްޖޭގެ އިޤްތިޞާދު 12.0 އިންސައްތައިން ކުރިއަރާނެކަމަށް ލަފާކުރެވޭ ކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.
އަންނަ އަހަރަށް ލަފާކުރާ ދައުލަތުގެ ބަޖެޓް ރައްޔިތުންގެ މަޖިލީހަށް ހުށަހަޅުއްވަމުން މިނިސްޓަރ ވިދާޅުވީ، ރާއްޖޭގެ އިޤުތިޞާދު މި އަހަރު 31.6 އިންސައްތައިން ކުރިއަރާނެ ކަަމަށާއި، އަންނަ އަހަރު ރާއްޖޭގެ އިޤްތިޞާދު 12.0 އިންސައްތައިން ކުރިއަރާނެކަމަށް ލަފާކުރެވޭ ކަމަށެވެ.
ރާއްޖޭގެ އިޤުތިޞާދު ކުރިއަރަމުން މި އަންނަނީ ދުނިޔޭގެ އިޤުތިޞާދީ ދުވެއްޔަށްވުރެ އެތައް ގުނައެއް ބާރަށް ކަމަށާއި، ކޮވިޑް-19 ގެ އަސަރު ރާއްޖެ ފަދަ ޖަޒީރާ އަދި ފަތުރުވެރިކަމަށް ބަރޯސާވެފައިވާ ޤައުމުތަކަށް ކުރި މިންވަރު ބޮޑު ކަމުގައި މިނިސްޓަރ ވިދާޅުވިއެވެ. އަދި މި ކަމުން އަރައިގަންނަ ސްޕީޑް ވެސް ބާރު ކަން މިނިސްޓަރ ފާހަގަކުރެއްވިއެވެ. އަންނަ އަހަރު ރާއްޖެއަށް 1.5 މިލިއަނާއި 1.8 މިލިއަން ދޭތެރޭ އަދަދަކަށް ފަތުރުވެރިން ޒިޔާރަތްކުރާނެކަމަށް ލަފާކުރެވޭ ކަމަށް ވިދާޅުވިއެވެ. އެއާއެކު ރާއްޖޭގެ އިޤްތިޞާދަށް ހެޔޮ ބަދަލު އަންނާނެ ކަމަށް އަމީރު ވިދާޅުވިއެވެ.
ދުވާލެއްގެ މައްޗަށް ފަތުރުވެރިން ރާއްޖެ ޒިޔާރަތްކުރާ މިންވަރު މިހާރު ހުރީ 2019 އާ ގާތްގަނޑަކަށް އެއް ހަމައެއްގައި ކަމަށާއި، މި އަހަރުގެ މިހާތަނަށް 1 މިލިއަނަށް ވުރެ ގިނަ ފަތުރުވެރިން ރާއްޖެ ޒިޔާރަތްކޮށްފައިވާއިރު، މިހާރު އަންދާޒާކުރަނީ މި އަހަރު ނިމޭއިރު 1.2 މިލިއަން ފަތުރުވެރިން ރާއްޖެ އަންނާނެކަމަށް ކަމުގައި އަމީރު ވިދާޅުވިއެވެ.
އަންނަ 2022 ވަނަ އަހަރަކީ ރާއްޖޭގެ ފަތުރުވެރިކަމުގެ ދާއިރާއަށް 50 އަހަރު ފުރޭ "ގޯލްޑަން ޖުބިލީ" އަހަރު ކަމަށްވެފައި، މިކަން ފާހަގަކުރުމަށް ގިނަ މާކެޓިންގ ހަރަކާތްތަކެއް ރާވާފައި ހުރުމާއި، ދުނިޔޭގެ ދަތުރުފަތުރަށް އަންނަ ހެޔޮބަދަލާއި، ރާއްޖޭ ރިޒޯޓްތައް ކޮވިޑް-19 އާއެކުވެސް އޮޕަރޭޓްކުރުމަށް ވެފައިވާ ތައްޔާރީތަކާއެކު، 2022 ވަނަ އަހަރުގެ ތެރޭގައި ކޮވިޑް-19 ގެ ކުރިން ފަތުރުވެރިން ޒިޔާރަތްކުރި މިންވަރާ ހަމައަށް ވާސިލުވެވޭނެކަމުގެ އުންމީދު ބޮޑުކަމަށް އަމީރު ވިދާޅުވިއެވެ.
