ބަޔާނާއި ޑޯޓްމުންޑަށްވެސް މޮޅެއް

ޖަރުމަން ލީގުގައި ހޮނިހިރު ދުވަހުގެރޭ ކުޅުނު މެޗުތަކުން އެންމެ ފަހުގެ ޗެމްޕިއަން ބަޔާން މިއުނިކާއި، ބޮރޫޝިއާ ޑޯޓްމުންޑުވެސް މޮޅުވެއްޖެއެވެ.

ރަށުން ބޭރުގައި ކުޅުނު މެޗުން ބަޔާން މޮޅުވީ ޔޫނިއަން ބާލިން އަތުން 5-2 ގެ ނަތީޖާއަކުންނެވެ.

މި މެޗުގައި ބަޔާނުން މޮޅު ކުޅުމެއް ދެއްކިއިރު، މެޗު ފަށައިގެން 15 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ އިތުބާރު ފޯވާޑް ރޮބަޓް ލެވަންޑޯސްކީއެވެ. އަދި މެޗުގެ 23 ވަނަ މިނެޓުގައި ހިލޭ ޖެހުމަކުން ލެވަންޑޯސްކީ ވަނީ އިތުރު ލަނޑެއް ޖަހައި، ބަޔާނުގެ ލީޑު ފުޅާކޮށްދީފައެވެ. އެއާއެކު މި ފަހަރުގެ ލީގުގައި މިހާތަނަށް ލެވަންޑޯސްކީ ވަނީ 12 ލަނޑު ހަމަކޮށްފައެވެ.

މި މެޗުގައި ބަޔާނުން ކާމިޔާބުކުރި ތިންވަނަ ލަނޑު މެޗުގެ 35 ވަނަ މިނެޓުގައި ތޯމަސް މުލާގެ އެހީތެރިކަމާއެކު ކާމިޔާބުކޮށްދިނީ ލެރޯއި ސާނޭއެވެ. އެކަމަކު ފުރަތަމަ ހާފު ނިމުމުގެ ކުރިން ނިކޯ ގީސެލްމަން ވަނީ ލަނޑެއް ޖަހައި، ޔޫނިއަން ބާލިންއަށް ފަރަގު ކުޑަކޮށްދީފައެވެ.

މި މެޗުގެ ދެވަނަ ހާފުގައިވެސް ބަޔާނުން މޮޅު ކުޅުމެއް ދެއްކިއިރު، މި ހާފު ފަށައިގެން 16 ވަނަ މިނެޓުގައި ކިންގްސްލީ ކޯމަން ވަނީ ބަޔާނުގެ ހަތަރުވަނަ ލަނޑު ޖަހައިދީފައެވެ. އެކަމަކު އޭގެ ހަތަރު މިނެޓު ފަހުން ޖޫލިއަން ރަޔާސަން ވަނީ އިތުރު ލަނޑެއް ޖަހައި ޔޫނިއަން ބާލިންއަށް އަލުން ފަރަގު ކުޑަކޮށްދީފައެވެ. ދެން މި މެޗުގައި ބަޔާނުން ކާމިޔާބުކުރި ފަސްވަނަ ލަނޑު މެޗުގެ 79 ވަނަ މިނެޓުގައި ޖަހައިދިނީ ތޯމަސް މުލާއެވެ.

މި މެޗުން ބަޔާން މޮޅުވިއިރު، އެ ޓީމާ ވާދަވެރި ޑޯޓްމުންޑް މޮޅުވީ އަމިއްލަ ދަނޑުގައި ކުޅެ ކޮލޯން އަތުން 2-0 ގެ ނަތީޖާއަކުންނެވެ. އެއާއެކު ޑޯޓްމުންޑުން ވަނީ އަމިއްލަ ދަނޑުގައި އެންމެ ފަހުން ކުޅުނު 10 މެޗުންވެސް މޮޅުވެފައެވެ.

ހޮނިހިރު ދުވަހުގެރޭ ކުޅުނު މެޗުގައި ޑޯޓްމުންޑުން މޮޅު ކުޅުމެއް ދެއްކިއިރު، އެ ޓީމުން ލީޑު ނަގާފައިވަނީ ފުރަތަމަ ހާފު ނިމެން ފަސް މިނެޓަށް ވެފައި ވަނިކޮށެވެ. ޖޫޑް ބެލިންހަމް ހުރަސްކޮށްދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ތޯގަން ހަޒާޑެވެ. އަދި މެޗުގެ 64 ވަނަ މިނެޓުގައި ކޯނަރަކުން ސްޓެފަން ޓިގެސް ވަނީ ލަނޑެއް ޖަހައި، ޑޯޓްމުންޑުގެ ލީޑު ފުޅާކޮށްދީފައެވެ.

މި ނަތީޖާތަކާއެކު ތާވަލުގެ އެއްވަނައިގައި ބަޔާން އޮތީ ކުޅުނު 10 މެޗުން 25 ޕޮއިންޓް ހޯދައިގެންނެވެ. ދެވަނައިގައި އޮތް ޑޯޓްމުންޑަށް 10 މެޗުން 24 ޕޮއިންޓް ލިބިފައިވާއިރު، ތިންވަނައިގައި އޮތް ފްރެއިބާގަށް 10 މެޗުން ލިބިފައިވަނީ 22 ޕޮއިންޓެވެ.