ނަރުދަމާއަކީ އެއްވެސް ފައިދާއެއްވާ އެއްޗެއްނޫން ކަމަށް މޯލްޑިވްސް ވޯޓަރ އެންޑް ސެވެރޭޖް ކޮމްޕެނީ (އެމްޑަބްލިއުއެސްސީ)ގެ މެނޭޖިންގ ޑިރެކްޓަރ ހަސަން ޝާހު ވިދާޅުވެއްޖެއެވެ.
ތިމާވެއްޓާއި ރައްޓެހި ޚިދުމަތަށް ބަދަލުކުރުމާގުޅޭގޮތުން ރާއްޖެ ޓީވީގެ ފަލަ ސުރުޚީ ޕްރޮގްރާމުގައި ވާހަކަ ދައްކަވަމުން ޝާހު ވިދާޅުވީ ނަރުދަމާއަކީ އެއްވެސް ފައިދާއެއްވާ އެއްޗެއްނޫން ކަމަށެވެ. އޭގެ ބަދަލުގައި ރާއްޖޭގެ ގިނަ ރަށްތަކެއްގައި ދެމުން އަންނަ ކަރަންޓުގެ ޚިދުމަތުން ރަނގަޅު ފައިދާއެއްވަމުން އަންނަ ކަމަށްވެސް އޭނާ ވިދާޅުވިއެވެ.
ނަރުދަމާއިން އެއްވެސް ފައިދާއެއް ނުވާކަން ފާހަގަ ކުރައްވަމުން ޝާހު ވިދާޅުވީ "އޭތި މެއިންޓެނެންސްއަށް ޓަކައި އަބަދު އަތުން ޚަރަދުދާކަމެއް އެއީ. އަދި އޭގެ އިތުރަށް މުސްތަޤްބަލުގަވެސް މިއޮތީ ނަރުދަމާއަށް އަޅުގަނޑުމެންގެ އަތުން ބޮޑު ޚަރަދެއްދާ ގޮތަށް. އެއީ ތިމާވެށި ހިމާޔަތް ކުރުމަށާއި ހުރިހާ ކަމަކަށް ބަލާއިރު އަޅުގަނޑުމެންނަކަށް ރޯ ނަޖިސް ޑަމްޕް ކުރެވޭކަށެއް ނެތް." ކަމަށެވެ. އަދި ސީދާ ފަރުތަކަށް ދޫކުރެވޭ ނަޖިހުގެ ސަބަބުން ފަރުތަކަށް ބޮޑެތި ގެއްލުންތަކެއް ލިބެމުން އަންނައިރު، އެތަންތަނަށް ފަރުވާ ކުރުމަށްވެސް ބޮޑު ޚަރަދެއް ހިނގާނެ ކަމަށް ޝާހު ވިދާޅުވިއެވެ.
މީގެ އިތުރުން މިކަމުގެ ސަބަބުން ލިބޭ ގެއްލުންތަކާމެދު ރައްޔިތުން ހޭލުންތެރި ކުރުވުމަކީ ވަރަށް މުހިންމު ކަމެއްގެ ގޮތުގައި ޝާހް ވިދާޅުވިއެވެ. އެގޮތުން ނަރުދަމާ ނިޒާމުގެ ތެރެއިން މޫދަށް ދޫކުރާ ނަޖިހުގެ ސަބަބުން މޫދަށް އެރޭ މީހުންނަށް ލިބޭ ގެއްލުންތައް ފާހަގަކުރައްވައި ޝާހު ވިދާޅުވީ; މާލޭގެ ސްވިމިންގ ޓްރެކަށް މޫދަށް އެރުމުގެ ސަބަބުން ކަންފަތުގައި ޖަރާސީމު އުފެދޭކަމަށް ޑޮކްޓަރުން ބުނެފައިވާ ކަމަށެވެ. އަދި މިހާލަތު ރާއްޖޭގެ އެހެން ގިނަ ރަށްތަކެއްގައިވެސް ތަކުރާރު ވަމުން އަންނަ ކަމަށެވެ.
އެހެންކަމުން ތިމާވެށި ހިމާޔަތް ކުރަން ބޭނުންނަމަ ނަރުދަމާގެ ނިޒާމުން ތިމާވެއްޓަށް ލިބެމުން އަންނަ ގެއްލުންތައް ހުއްޓުވުމަށްޓަކައި ރައްޔިތުންގެ އަތުން ފީއެއް ނެގުމަކީ ރަނގަޅު ކަމެއް ކަމުގައި ޝާހު ވިދާޅުވިއެވެ.
