ކޮވިޑަށް ކުރި ހޭދަ 4 ބިލިއަން ރުފިޔާއަށް
30 އޮކްޓޯބަރު 2021 | ހޮނިހިރު 03:08ސިއްހީ އަދި އިޖުތިމާއީ ކަންކަމަށް ކުރިހޭދަ 2.2 ބިލިއަނަށް އަރާ
އެންއީއޯސީގެ މަސައްކަތްތައް ދަރުބާރުގޭގައި ކުރިއަށްދަނީ
ކޮވިޑް-19އާ ގުޅިގެން ސަރުކާރުން ކުރަމުންދާ ޚަރަދުތައް 4 ބިލިއަނަށް އަރައިފިއެވެ.
ފިނޭންސް މިނިސްޓްރީން ކޮންމެ ހަފުތާއަކު ނެރެމުން އަންނަ ކޮވިޑަށް ކުރާ ޚަރަދުގެ ތަފާސްހިސާބުތަކަށް ބަލާއިރު އޮކްޓޯބަރ މަހުގެ 21 ވަނަ ދުވަހާ ހަމައަށް ސިއްހީ އަދި އިޖުތިމާއީ ކަންކަމަށް ކުރިހޭދަ 2.2 ބިލިއަނަށް އަރައެވެ. އަދި ކޮވިޑް-19 އާ ގުޅިގެން އިގްތިސާދަށް އެރި ލޮޅުންތަކުން އަރައިގަތުމަށް ފޯރުކޮށްދެމުންދާ އެހީތެރިކަމަށް 1.8 ބިލިއަން ރުފިޔާ ވަނީ ޚަރަދުކޮށްފައެވެ.
ކޮވިޑާއި ގުޅިގެން އެންމެ ބޮޑު ހޭދައެއްކޮށްފައިވަނީ ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ(އެންޑީއެމްއޭ)ން ނެވެ. އެއީ 868.6 މިލިއަން ރުފިޔާއެވެ. ދެން އެންމެ ބޮޑު ޚަރަދެއްކޮށްފައިވަނީ ހެލްތު މިނިސްޓްރީންނެވެ. އެއީ 838.9 މިލިއަން ރުފިޔާއެވެ. މީގެއިތުރުން އައިޖީއެމްއެޗުން 198.7 މިލިއަން ރުފިޔާ ޚަރަދުކޮށްފައިވެއެވެ. މޯލްޑިވްސް ނޭޝަނަލް ޑިފެންސް ފޯސް އިން 67.6 މިލިއަން ރުފިޔާ ޚަރަދުކޮށްފައިވާއިރު ފުލުހުން ވަނީ 31.7 މިލިއަން ރުފިޔާ ޚަރަދުކޮށްފައެވެ. ޕްލޭނިންގ މިނިސްޓްރީން 40.9 މިލިއަން ރުފިޔާ ވަނީ ޚަރަދުކޮށްފައެވެ. ނޭޝަނަލް ޕްރޮޓެކްޝަން އެޖެންސީ (އެންސްޕާ)ން 54.2 މިލިއަން ރުފިޔާ ވަނީ މިހާތަނަށް އައިއިރު ކޮވިޑާއި ގުޅިގެން ޚަރަދުކޮށްފައެވެ.
މީގެއިތުރުން މިހާތަނަށް އައިއިރު އިންކަމް އެލަވަންސްގެ ގޮތުގައި 421 މިލިއަން ރުފިޔާ ހޭދަކޮށްފައިވެއެވެ.
