ޕްލާސްޓިކް ބޭނުންކުރާ މިންވަރު މަދުކުރުމަށް، ދިއްދޫ ކުރިމަގު ޖަމްއިއްޔާއިން އިސްނަގައިގެން މުހިއްމު ހަރަކާތެއް
ދިއްދޫގެ މުއައްސަސާތަކަށް، ފެންބުއިމަށްޓަކައި ބިއްލޫރި ފުޅި ހަދިޔާކުރެވިފައިވޭ
ދިއްދޫ ކުރިމަގު ޖަމްއިއްޔާގެ ފަރާތުން މުއައްސަސާތަކަށް ބިއްލޫރިފުޅި ހަދިޔާ ކުރުން
ޕްލާސްޓިކް ބޭނުންކުރެވޭ މިންވަރު މަދު ކުރުމުގެ ގޮތުން, ދިއްދޫ ކުރިމަގު ޖަމްއިއްޔާއިން އިސްނަގައިގެން އެރަށުގެ ހުރިހާ މުއައްސަސާ ތަކަށް ފެންބުއިމަށްޓަކައި ބިއްލޫރި ފުޅި ހަދިޔާކޮށްފިއެވެ.
މި ހަރަކާތުގެ ދަށުން އެ ޖަމްއިއްޔާއިން ވަނީ އެރަށުގައި ހުރި މުއައްސަސާތަކުގެ މުވައްޒަފުންގެ އިތުރުން, ހުޅުމާލޭ ހޮސްޕިޓަލުގައި މަސައްކަތްކުރާ މުވައްޒަފުން ފެން ބުއިމަށްޓަކައި ބިއްލޫރި ފުޅި ހަދިޔާ ކޮށްފައެވެ. އެ ޖަމްއިއްޔާގެ ރައީސް އަބްދުﷲ މާހިރު ރާއްޖެ ނިއުސްއަށް މަޢުލޫމާތުދެއްވަމުން ވިދާޅުވީ; 1500 އެއްހާ މުވައްޒަފުންނަށް ބިއްލޫރި ފުޅި ހަދިޔާކުރެވިފައިވާނޭ ކަމަށާއި, ނޮވެމްބަރ މަހުގެ މެދުތެރޭގައި ދިއްދޫގެ ގޭގެއަށް ބިއްލޫރި ފުޅި ހަދިޔާ ކުރުމުގެ ހަރަކާތް ފެށިގެން ދާނެކަމަށެވެ. އަދި ފުޅި ހަދިޔާ ކުރުމަށްޓަކައި ރިސޯޓްތަކުގެ އެހީތެރިކަން ލިބިފައިވާކަމަށެވެ. އޭގެ ތެރޭގައި ވަން އެންޑް އޮންލީ ރިތި ރަށާއި ވެލާ ޕްރައިވެޓް އައިލެންޑް މޯލްޑިވްސް ހިމެނޭ ކަމަށް މާހިރު ވިދާޅުވިއެވެ.
މީގެ އިތުރުން މާހިރު ވިދާޅުވީ 2022 ވަނަ އަހަރު ސްކޫލް ހުޅުވުމުގެ ކުރިން، ހއ. އަތޮޅު ތައުލީމީ މަރުކަޒުގައި ތަޢުލީމު ހާސިލުކުރަމުންދާ ދަރިވަރުން ފެން ބުއިމަށްޓަކައި ސްކޫލްގެ ލޯގޯ ޖެހި މެޓަލް ފެންބޯ ފުޅި ކޮންމެ ކުއްޖަކަށްވެސް ހަދިޔާ ކުރެވޭނެ ކަމަށެވެ. އަދި އަމާޒަކީ ސްކޫލަށް އެއްވެސް ވަރަކަށް ޕްލާސްޓިކް ނުވެއްދުންކަމަށެވެ.
ކުރިމަގު ޖަމްއިއްޔާގެ މަސައްކަތާ ގުޅޭގޮތުން ދިއްދޫ ކައުންސިލްގެ ރައީސް އަބްދުﷲ ރަޝީދު ވިދާޅުވީ; ޖަމިއްޔާއަކުން އިސްނަގައިގެން ޕްލާސްޓިކް މަދުކުރުމުގެ ގޮތުން މިކަހަލަ ހަރަކާތެއް ކުރިއަށް ގެންދިއުމަކީ ވަރަށް ރަނގަޅުކަމެއްކަމަށެވެ.
މާހިރު ވިދާޅުވި ގޮތުގައި, ކުރިއަށްވެސް ތަފާތު ޕްރޮގްރާމްތަކެއް އެ ޖަމްއިއްޔާގެ ފަރާތުން ދިއްދޫގައި ހިންގަމުންދާނެއެވެ. އޭގެ ތެރޭގައި ތިމާވެއްޓަށް މީހުން ހޭލުންތެރި ކުރުމުގެ ގޮތުން ޕްރޮގްރާމްތަކެއް ހިންގުމާއި, ދިއްދޫ ފެހި ކުރުމުގެ ގޮތުން ގަސް އިންދުމުގެ ހަރަކާތްތަކެއް ކުރިއަށް ގެންދެވޭނެ ކަމަށެވެ.
19 ސެޕްޓެމްބަރ 2021ގައި އުފެދުނު މިޖަމްއިއްޔާއަކީ ދިއްދޫގެ ކުރިމަގަށްޓަކައި އުފެއްދި ޖަމްއިއްޔާއެކެވެ. މި ޖަމްއިއްޔާގައި މިވަގުތުވެސް 165 މެމްބަރުން ހިމެނޭއިރު، ދިއްދޫގެ ކޮންމެ ރައްޔިތަކަށްވެސް މި ޖަމްއިއްޔާއާ ގުޅުމުގެ ފުރުސަތު އެބައޮތެވެ. ކުރިމަގު ޖަމްއިއްޔާގެ ފަރާތުން ވަނީ އެ ޖަމްއިއްޔާގެ ހުރިހާ މެމްބަރުންނަށް ޕްރިވިލެޖް ކާޑްވެސް ދީފައެވެ.
