ކޮޕް26: ނެޓް ޒީރޯއަށް ވާސިލްވާނެ ތާރީޚެއް ކޮންފަރެންސް ފެށުމުގެ ކުރިން ހާމަކުރުމާ އިންޑިޔާއިން ދެކޮޅު

ކޮޕް-26 ސަމިޓް ފެށުމުގެ ކުރިން އިންޑިޔާއިން ނެޓް ޒީރޯއަށް ވާސިލުވުމަށް ކަނޑައަޅާފައިވާ ޓާގެޓް ހާމަކުރުމަށް ގޮވާލަމުންދާ ގޮވާލުންތަކާ ދެކޮޅުހަދައި، ޖައްވަށް ދޫކުރާ ވިހަ ގޭސްތައް މަދުކުރާނެ ޕްލޭނެއް އެކުލަވާލުން މާ މުހިންމުކަމަށް ބުނެފިއެވެ.

އިންޑިޔާއަކީ ނުރައްކާތެރި ވިހަ ގޭސްތައް އެންމެ ގިނައިން ޖައްވަށް ދޫކުރާ ތިން ވަނަ ގައުމެވެ. ޗައިނާ އާއި އެމެރިކާ ނެގުމަށްފަހު ތިން ވަނައަށް އެންމެ ގިނަ އަދަދަކަށް ވިހަ ގޭސް ޖައްވަށް ދޫކުރާ ގައުމަށް އިންޑިޔާއަށްވުމާއެކު ކާބަން ނިޔުޓްރަލް ގައުމަކަށް ވުމަށް އެކުލަވާލާފައިވާ ޕްލޭން ހާމަކުރުމަށް ގޮވާލާ ގޮވާލުންތައް ވެސް ވަނީ އިތުރުވެ އަޑުތައް ބާރުވެފައެވެ. އޮކްޓޯބަރ މަހުގެ 31 ވަނަ ދުވަހު ސްކޮޓްލެންޑްގ ގްލާސްގޯވ ގައި ބާއްވާ ކޮޕް-26 ސަމިޓް ފެށުމުގެ ކުރިން އެޕްލޭން ހާމަކުރުމަށް ގޮވާލަމުންދަނީ އެހެންވެއެވެ.

އެކަމާ ގުޅޭގޮތުން ވާހަކަދައްކަވަމުން އިންޑިޔާގެ އެންވަޔަރަންމަންޓް ސެކެޓްރީ ރަމޭޝްވަރް ޕްރަސާދް ގުޕްތާ ނޫސްވެރިންނާ ވާހަކަދައްކަވަމުން ވިދާޅުވީ ދުނިޔެއަށް ދިމާވެފައިވާ މޫސުމީ ބަދަލުތަކުން އަރައިގަތުމަށް އޮތް ހައްލަކީ ނެޓް ޒީރޯވާނެ ދުވަހެއް ކަނޑައަޅައި އެކަން އިއުލާނުކުރުން ނޫންކަމަށެވެ. ނެޓް ޒީރޯއަށް ވާސިލުވުމުގެކުރިން ޖައްވަށް ދޫކުރާ ކާބަންގެ މިންވަރަކީ މުހިންމުކަމެއްކަމަށް ގުޕްތާ ވިދާޅުވިއެވެ.

އެމެރިކާ، އިނގިރޭސިވިލާތް އަދި ޔޫރަޕިއަން ޔޫނިއަން (އީޔޫ) ން ވަނީ 2050ގެ ކުރިން ނެޓް ޒީރޯއަށް ވާސިލްވާނެކަމަށް އިއުލާނުކޮށްފައެވެ. އޭގެފަހުން އެގައުމުތަކުން ޖައްވަށްދޫކުރާ ގްރީންހައުސް ގޭހުގެ މިންވަރު ހުންނާނީ ދުނިޔޭގެ ޖަންގަލިތަކާއި، ދަނޑުތައް އަދި ފަސްގަނޑުން ކާބަން އޮބްޒަރވްކުރާ އަދި ޓެކްނޮލޮޖީގެ އެހީގައި ކާބަން ހިފެހެއްޓޭނެ މިންވަރަށް ބަލައިގެންނެވެ. ޗައިނާ އަދި ސައުދީ އަރަބިއްޔާއިން ވަނީ 2060 ވަނަ އަހަރު އަންނަންވާއިރަށް ނެޓް ޒީރޯއަށް ވާސިލުވާނެކަމަށް އިއުލާނުކޮށްފައެވެ. ނަމަވެސް މި ތާރީޚުތަކަކީ އެއްވެސް އަސާސެއްނެތް ތާރީޚުތަކެއްކަމަށް ފާޑުކިޔާ ފަރާތްތަކުން ބުނެއެވެ.

ގުޕްތާ ވިދާޅުވީ އިންޑިޔާ ސަރުކާރުން ހެދި ހިސާބުތަކުން ދައްކާގޮތުން މިހާރުން ފެށިގެން މި ގަރުނުގެ މެދެއްހާ ހިސާބަށް އަންނައިރު އެމެރިކާއިން 92 ގިގަޓަންގެ ކާބަން ޖައްވަށް ދޫކުރާނެއެވެ. އީޔޫގެ ގައުމުތަކުން 62 ގިގަޓަންގެ ކާބަން ޖައްވަށްދޫކުރާނެއެވެ. މީގެއިތުރުން ޗައިނާއިން ނެޓް ޒީރޯ ހާސިލުކުރުމަށް ކަނޑައަޅާފައިވާ ޓާގެޓަށް ހާސިލުވުމަށް މިއޮތް މުއްދަތުގައި 450 ގިގަޓަންގެ ކާބަން ޖައްވަށް ދޫކުރާނެކަމަށް ގުޕްތާ ވިދާޅުވިއެވެ.

ގްލާސްގޯވ ގައި ކުރިޔަށްދާ ކޮޕް-26 ސަމިޓްގައި ދުނިޔޭގެ 197 ގައުމަކުން ބައިވެރިވާނެއެވެ. އޮކްޓޯބަރ މަހުގެ 31ން ނޮވެމްބަރ މަހުގެ 12 ވަނަ ދުވަހަށް ކުރިޔަށްދާ މިސަމިޓްގައި ދުނިޔެ ހޫނުވުމާ ދެކޮޅަށް 2015 ވަނަ އަހަރު ގައުމުތަކުން އެއްބަސްވެފައިވާ ޕެރިސް އެގްރިމަންޓްގައި ހުރި ކަންތައްތަކަށް ވާސިލުވުމަށް ގައުމުތަކުން ކުރަމުންދާ މަސައްކަތްތަކާއި އެކަންކަމަށް ވާސިލުވުމަށް ދެން ކުރާނެ ކަންކަމުގެ މައްޗަށް އަލިއަޅުވާލާނެއެވެ.

އިންޑިޔާގެ ފަރާތުން ސަމިޓްގައި ބައިވެރިވަޑައިގަންނަވާނީ ބޮޑުވަޒީރު ނަރެންދްރަ މޯދީއެވެ. ޗައިނާގެ ރައީސް ޝީ ޖިންޕިން ސަމިޓްގައި ބައިވެރިވަޑައިގަންނަވާކަމެއް އަދި ޔަގީނެއް ނޫނެވެ.

2015 ވަނަ އަހަރު އެއްބަސްވެ ގައުމުތަކުން ސޮއިކޮށްފައިވާ ޕެރިސް އެގްރިމެންޓާ ގުޅޭގޮތުން ވާހަކަދައްކަވަމުން އިންޑިޔާގެ އެންވަޔަރަންމަންޓް މިނިސްޓަރ ބުޕެންދްރަ ޔަދާވް ވިދާޅުވީ އެއްބަސްވުމުގައި ކަނޑައަޅާފައިވާ ކަންކަން ހާސިލުވުމުގައި އިންޑިޔާއިން އޮތީ ރަނގަޅު ހިސާބެއްގައި ކަމަށެވެ. އަދި އެކަންކަން އަލުން ދިރާސާކޮށް ވާހަކަދެއްކުމުގެ ފުރުސަތު އެބައޮތްކަމަށާއި އެކަމަށް އިންޑިޔާއިން ތައްޔާރުކަމަށް ވަނީ ވިދާޅުވެފައެވެ.

އިންޑިޔާއިން ވަނީ 2030 ވަނަ އަހަރު އަންނަންވާއިރަށް ޖައްވަށްދޫކުރާ ވިހަގޭސްތައް 33 އާއި 35 އިންސައްތައާ ދެމެދު މަދުކުރުމަށް އެއްބަސްވެފައެވެ. ތިމާވެއްޓާ ގުޅޭ މާހިރުން ވިދާޅުވާ ގޮތުގައި އިންޑިޔާގައި ހުރި މާލީ ތަނަވަސްކަމާއި އައު ޓެކްނޮލޮޖީގެ ވަސީލަތްތަކަށް ބަލާއިރު އިންޑިޔާއިން ވިހަގޭސް ޖައްވަށް ދޫކުރާ މިންވަރު 40 އިންސައްތަ ދަށްކުރެވޭނެއެވެ.

ޔާދަވް ވިދާޅުވީ އިންޑިޔާއިން ކޮޕް-26 ސަމިޓްގެ ކާމިޔާބުމިން މިނެކިރާނީ މޫސުމީ ބަދަލުތަކާ ގުޅިގެން ދެވޭ ފަންޑު އިތުރުކުރުމަށް ތަރައްޤީވެފައިވާ ގައުމުތަކުން އެއްބަސްވާ މިންވަރުގެ މައްޗަށްކަމަށެވެ.

އިންޑިޔާއަކީ ވަރަށް ބޮޑަށް ބޯޓު ދެލި ބޭނުންކުރާ ގައުމެކެވެ. ބޯޓު ދެލި ބޭނުންކުރުމުގެ ސަބަބުން ޖައްވަށް ދޫކުރާ ވިހަ ގޭހުގެ މިންވަރު އެތައް ގުނައަކުން އިތުރުވެއެވެ.