ރޮނާލްޑޯއަށް އެއްމާބަނޑު ދެކުދިން ލިބެނީ!

ޕޯޗުގަލްގެ ތަރި ކްރިސްޓިއާނޯ ރޮނާލްޑޯ އާއި އޭނާގެ ލޯބިވެރިޔާ ޖޯޖީނާއަށް އެއްމާބަނޑު ދެކުދިން ލިބެން އުޅޭކަން އިއުލާންކޮށްފިއެވެ.

ރޮނާލްޑޯ ސޯޝަލް މީޑިއާގައި ކުރި ޕޯސްޓެއްގައި ބުނީ އޭނާގެ ލޯބިވެރިޔާ ޖޯޖީނާ އިނީ އެއްމާބަނޑު ދެކުދިންނަށް ބަލިވެކަމުގައެވެ. ރޮނާލްޑޯ ބުނީ އޭނާ އާއި ޖޯޖީނާ އަންނަނީ އެއްމާބަނޑު ދެކުދިންނާ ބައްދަލުވާނެ އިރަކަށް އުންމީދު ކުރަމުންކަމަށެވެ.

މިއީ ރޮނާލްޑޯ އާއި ޖޯޖީނާއަށް ލިބޭނެ ދެވަނަ އަދި ތިންވަނަ ދަރިންނެވެ. ރޮނާލްޑޯ އަށާއި، ޖޯޖީނާއަށް އެންމެ ފުރަތަމަ ދަރިއަކު ލިބުނީ 2017 ވަނަ އަހަރުގައެވެ. އެކަމަކު ރޮނާލްޑޯއަށް މީގެ ކުރިން 2010 ވަނަ އަހަރު ޖަރިއަކު ވަނީ ލިބިފައެވެ. އެކަމަކު އޭނާގެ މަންމަ ވަނީ ސިއްރުކޮށްފައެވެ. އޭގެ ފަހުން 2017 ވަނަ އަހަރު ސަރަގޭޓް މަންމައެއް ބޭނުންކޮށްގެން ވެސް ރޮނާލްޑޯއަށް އެއްމާބަނޑު ދެ ކުދިން ލިބިފައިވެއެވެ.

އުމުރުން 36 އަހަރުގެ ފޯވާޑް މީގެ ކުރިން މީޑިއާއަށް ދިން އިންޓަރވިއުއެއްގައި އޭނާ ޖުމްލަ ހަތް ދަރިން ބޭނުންވާ ކަމަށް ބުނެފައިވެއެވެ. އަދި ހަތް ނަމްބަރާ އޭނާއާ ގުޅިފައިވާ ކަމަށާއި، ހަތް ބެލެންޑޯ އެވޯޑް ވެސް ހޯދަން ބޭނުންވާ ކަމަށް ރޮނާލްޑޯ ބުނެފައިވެއެވެ.

ދުނިޔޭގެ އެންމެ މޮޅު ކުޅުންތެރިޔާގެ މަގާމު ފަސް ފަހަރު ހޯދާފައިވާ ރޮނާލްޑޯއަކީ ދުނިޔޭގައި ހުރި އެންމެ މުއްސަނދި ފުޓުބޯޅަ ކުޅުންތެރިޔާ ވެސް މެއެވެ. ރޮނާލްޑޯ އޭނާގެ ދަރިން ތަރުބިއްޔަތު ކުރުމުގައި ހަރުކަށި ކަމަށް ބައެއް މީހުން ދެކެއެވެ. ސަބަބަކީ ރޮނާލްޑޯ އޭނާގެ ދަރިންނަށް ފޯނު ގެންގުޅުމުގައި އާއި، ކެއުން ބައްޓަން ކުރަންވީ ގޮތުގައި ހަރުކަށި ގަވާއިދުތަކެއް ހަދާފައިވުމެވެ.

ރޮނާލްޑޯ އޭނާގެ ދޮށީ ދަރިއާމެދު ދެކޭ އެންމެ ބޮޑު ހުވަފެނަކީ އޭނާފަދަ ފުޓުބޯޅަ ކުޅުންތެރިއަކަށްވުން ކަމަށް މީގެ ކުރިން ބުނެފައިވާއިރު، ރޮނާލްޑޯގެ ދޮށީ ދަރިފުޅު ކްރިސްޓިއާނޯ ޖޭއާރް އަންނަނީ އެކަޑަމީގައި ތަފާތު މޮޅު ކުޅުމެއް ދައްކަމުންނެވެ.