އިޓާލިއަން ލީގުގައި ބުދަ ދުވަހުގެރޭ ސަސުއޯލޯ އަތުން ފަހު ވަގުތު ޔުވެންޓަސް ބަލިވިއިރު، އެމްޕޯލީ އަތުން އެންމެ ފަހުގެ ޗެމްޕިއަން އިންޓަ މިލާން މުހިންމު މޮޅެއް ހޯދައިފިއެވެ.

އަމިއްލަ ދަނޑުގައި ކުޅުނު މެޗުން ޔުވެންޓަސް ބަލިވީ ސަސުއޯލޯ އަތުން 2-1 ގެ ނަތީޖާއަކުންނެވެ.

މި މެޗުގައި އެންމެ ފުރަތަމަ ލަނޑު ޖަހައި ލީޑު ނަގާފައިވަނީ ސަސުއޯލޯއިންނެވެ. މެޗުގެ ފުރަތަމަ ހާފު ނިމެން މިނެޓަކަށް ވެފައި ވަނިކޮށް ގްރެގޯ ޑީފްރެލް ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ޑަވީޑޭ ފްރަޓޭސީއެވެ.

މި މެޗުގައި ޔުވެންޓަސްއިން ނަތީޖާ އެއްވަރުކޮށްފައިވަނީ މެޗުގެ 76 ވަނަ މިނެޓުގައެވެ. ޕައުލޯ ޑިބާލާ ނެގި ހިލޭ ޖެހުމަކުން މި ލަނޑު އެ ޓީމަށް ކާމިޔާބުކޮށްދިނީ ވެސްޓަން މެކެނީއެވެ. އެކަމަކު މެޗުގެ އިތުރު ވަގުތުގައި ސަސުއޯލޯއިން ވަނީ ދެވަނަ ފަހަރަށް ލީޑު ނަގާފައެވެ. ކައުންޓަ އެޓޭކެއްގައި މި ލަނޑު އެ ޓީމަށް ކާމިޔާބުކޮށްދިނީ މެކްސިމް ލޮޕޭޒެވެ.

މި ނަތީޖާއާއެކު ޔުވެންޓަސް އޮތީ ތާވަލުގެ ހަތްވަނައިގައި ކުޅުނު 10 މެޗުން ލިބުނު ޕޮއިންޓާއެކުއެވެ. އަދި ޔުވެންޓަސް ބަލިކުރި ސަސުއޯލޯ އޮތީ ތާވަލުގެ ނުވަވަނައިގައި 10 މެޗުން 14 ޕޮއިންޓާއެކުއެވެ.

މީގެ އިތުރުން ލީގުގައި ބުދަ ދުވަހުގެރޭ ކުޅުނު މެޗުން އިންޓަ މޮޅުވީ އެމްޕޯލީ އަތުން 2-0 ގެ ނަތީޖާއަކުންނެވެ.

އަމިއްލަ ދަނޑުގައި ކުޅުނު މެޗުގައި އިންޓައިން މޮޅު ކުޅުމެއް ދެއްކިއިރު، މެޗުގެ ފުރަތަމަ ހާފުގައި އެ ޓީމުން ވަނީ ލީޑު ނަގާފައެވެ. މެޗުގެ 34 ވަނަ މިނެޓުގައި އަލެކްސިސް ސަންޗޭޒް ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ޑަނީލޯ ޑަމްބްރޯސިއޯއެވެ.

މި މެޗުގައި އެމްޕޯލީއަށް އިތުރު މައްސަލަތަކެއް ކުރިމަތިވީ ދެވަނަ ހާފު ފަށައިގެން ހަތްވަނަ މިނެޓުގައި އެ ޓީމުގެ ސަމުއެލް ރިޗީއަށް ސީދާ ރަތް ކާޑެއް ދެއްކުމުންނެވެ. އެއާއެކު އެމްޕޯލީގެ ކުޅުންތެރިއަކު މަދުވުމުގެ ފައިދާނަގައި މެޗުގެ 66 ވަނަ މިނެޓުގައި އިންޓައިން ވަނީ ލީޑު ފުޅާކޮށްފައެވެ. ލަޓާރޯ މާޓީނޭޒް ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ފެޑެރީކޯ ޑިމާކޯއެވެ.

މި މޮޅާއެކު ތާވަލުގެ ތިންވަނައިގައި އިންޓަ އޮތީ 10 މެޗުން 21 ޕޮއިންޓާއެކުއެވެ. އެއްވަނައިގައޮ އޮތީ 10 މެޗުން 28 ޕޮއިންޓް ހަމަކޮށްފައިވާ އޭސީ މިލާނެވެ. އަދި ދެވަނައިގައި އޮތް ނާޕޮލީއަށް ނުވަ މެޗުން ލިބިފައިވަނީ 25 ޕޮއިންޓެވެ. އެހެންކަމުން ލީގުގައި ބުރާސްފަތި ދުވަހުގެރޭ ބޮލޯނިއާ ދެކޮޅަށް ކުޅޭ މެޗުން މޮޅުވެއްޖެނަމަ، ނާޕޮލީއަށް މިލާނާ ޕޮއިންޓުގެ ގޮތުން އެއްވަރުކޮށް، ތާވަލުގެ އެއްވަނައަށް އަލުން އެރޭނެއެވެ.