ވޮލީބޯޅަ އެކްސެލެންސް ޕްރޮގްރާމާއެކު ސީނިއާގައުމީ ވޮލީބޯޅަ ޓީމަށް ކުރިއެރުންތަކެއް އަންނާނެ ކަމަށް ގައުމީ ފިރިހެން ވޮލީބޯޅަ ޓީމުގެ ކޯޗުގެ މަގާމު އަދާކޮށްފައިވާ އަދި ކުރީގެ ކުޅުންތެރިޔާ މުޙައްމަދު ސާޖިދު (ކާއްޓޭ) ވިދާޅުވެއްޖެއެވެ.

ޒުވާން ގައުމީ ޓީމަށް ޖާޒީ ހަވާލުކުރުމަށްޒުވާނުންގެ މަރުކަޒުގައި ހޯމަ ދުވަހުގެރޭ ބޭއްވި ރަސްމިއްޔާތަށްފަހު "ރާއްޖެ.އެމްވީ" އަށް ދެއްވި އިންޓަވިއުއެއްގައި މީގެ ކުރިން ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ އިންޓަރިމް ކޮމިޓީގެ މެންބަރުކަންވެސް ފުރުއްވި ކާއްޓޭ ވިދާޅުވީ މިކަހަލަ ޕްރޮގްރާމެއް ފެށުން އެއީ ވޮލީބޯޅަ އާއިލާއަށް ލިބުނު އުފަލެއް ކަމަށެވެ. އަދި މިއީ ވަރަށް ކުރީއްސުރެ ވޮލީބޯޅަ އާއިލާއިން ދެކެމުން އައި ހުވަފެނެއް ހަގީގަތަކަށްވުން ކަމަށްވެސް ވިދާޅުވިއެވެ.

ކާއްޓޭ ވިދާޅުވީ މިއީ ގައުމީ ވޮލީބޯޅަ ޓީމަށް އޮތް ޗެލެންޖެއް ކަމަށާއި، އެގޮތުން ޖޫނިއާ ޕޫލުގެ ކުޅުންތެރިން ކުރިއަށް އޮތް ތަނުގައި ސީނިއާ ޓީމުން ޖާގަ ހޯދުމަށް މަސައްކަތްކުރާނެ ކަމަށެވެ. އެހެންކަމުން މީގެ ކުރިން ސީނިއާ ޓީމަށް އެރުން އެއީ ފަސޭހަކަމެއްގެ ގޮތުގައި އޮތް އޮތުން މި ޕްރޮގްރާމާއެކު ނިމިގެންދާނެ ކަމަށާއި، އޭގެ ސަބަބުން މުޅި ވޮލީބޯޅައަށްވެސް ބޮޑު ބަދަލެއް އަންނާނެ ކަމަށް ކާއްޓޭ ވިދާޅުވިއެވެ.

ކާއްޓޭ ވިދާޅުވީ މި ޕްރޮގްރާމަކީ މީގެ ކުރިންވެސް ވީއޭއެމުގެ ރައީސް މުޙައްމަދު ރަނޭޝް (ރަނޭ) ގެ ވަރަށް ބޮޑު ޕްލޭނެއް ކަމަށާއި، އެގޮތުން މީގެ ކުރިން ވީއޭއެމުގެ ނައިބު ރައީސްގެ މަގާމުގައި ރަނޭ ހުންނަވައި، މި ޕްރޮގްރާމުގެ ޕޭޕާ ވޯކްސްގެ މަސައްކަތް ކުރެއްވި ކަމަށެވެ. އަދި ޒުވާން ގައުމީ ޓީމުގެ ކޯޗުންގެ ގޮތުގައި ހަމަޖެއްސި ދެ ބޭފުޅުންނަކީ މި ވަގުތު ރާއްޖޭގައި ތިބި އެންމެ ފެންވަރު ރަނގަޅު ކޯޗުންގެ ތެރޭގައި ހިމެނޭ ކޯޗުން ކަމަށާއި، އެގޮތުން ފަތުހުﷲ ވަހީދު (ފައްލޯ) އާއި، އަޙްމަދު އަބްދުލްކަރީމް (ލޯންގޭ) އަށް ފުރިހަމަ އިތުބާރު އެބައޮތް ކަމަށްވެސް ވިދާޅުވިއެވެ.

"ރާއްޖެ.އެމްވީ" އަށް ދެއްވި އިންޓަވިއުއެއްގައި ވީއޭއެމުގެ ކޯޗާސް ކޮމިޝަނުގެ ހެޑް ޝުއައިބް އަޙްމަދު ވިދާޅުވީ އެ ކޮމިޝަނުން ބެލި ބެލުމުން މި ވަގުތު ރާއްޖޭގައި ތިބި އެންމެ ސީނިއާ އަދި އެންމެ ރަނގަޅު ދެ ކޯޗުންނަކީ ފައްލޯ އާއި ލޯންގޭ ކަމަށެވެ. އަދި ފައްލޯ އާއި ލޯންގޭއާއެކު، ޒުވާން ގައުމީ ޓީމަށް ރަނގަޅު ބަދަލުތަކެއް އަންނާނެކަމުގެ ޔަގީންކަން އެބައޮތް ކަމަށްވެސް ވިދާޅުވިއެވެ.

ޝުއައިބް އިތުރަށް ވިދާޅުވީ ވީއޭއެމުން ހުޅުވާލާ މިފަދަ ފުރުސަތުތަކަށް އިތުރު ކޯޗުންގެ އެއްބާރުލުން ކުރިއަށް އޮތް ތަނުގައި ލިބޭނެ ކަމަށް އުއްމީދުކުރައްވާ ކަމަށާއި، އެގޮތުން އަތޮޅުތެރޭގައި ތިބޭ ކޯޗުންނަށްވެސް މި ފުރުސަތު އޮންނާނެ ކަމަށެވެ.

ބޮޑު ޕްލޭނަކާއެކު ވީއޭއެމުން ޒުވާން ގައުމީ ވޮލީބޯޅަ ޓީމު އެކުލަވާލިއިރު، އަންނަ އަހަރު ގިނަ މުބާރާތްތަކެއްގައި ޒުވާން ގައުމީ ވޮލީބޯޅަ ޓީމު ވާދަކުރާނެއެވެ. އޭގެ ތެރޭގައި އަންނަ އަހަރު ޗައިނާގައި ބާއްވާ އޭޝިއަން ޔޫތު ގޭމްސް އާއި، އެ އަހަރުގެ އޮގަސްޓް މަހު ތުރުކީގައި ބާއްވާ އިސްލާމިކް ސޮލިޑާރިޓީ ގޭމްސް ހިމެނެއެވެ.