ގަދަ 16 ގެ ޖާގައެއް ޑޯޓްމުންޑަށް

ޖަރުމަން ކަޕުގައި އަންގާރަ ދުވަހުގެރޭ ކުޅުނު ދެވަނަ ބުރުގެ މެޗުން އިންގަލްޝްޓަޓް ބަލިކޮށް ގަދަ 16 ގެ ޖާގައެއް އެންމެ ފަހުގެ ޗެމްޕިއަން ބޮރޫޝިއާ ޑޯޓްމުންޑުން ހޯދައިފިއެވެ.

އަމިއްލަ ދަނޑުގައި ކުޅުނު މެޗުން ޑޯޓްމުންޑް މޮޅުވީ 2-0 ގެ ނަތީޖާއަކުންނެވެ.

މި މެޗު ފަށައިގެން ޑޯޓްމުންޑުން ގިނަ ހަމަލާތަކެއް އުފެއްދިއިރު، އޭރިއާ ބޭރުން އެ ޓީމުގެ މާރިއަސް ވޮލްފް ފޮނުވާލި ނުރައްކާތެރި ހަމަލާއެއް އިންގަލްޝްޓަޓުގެ ގޯލްކީޕަރު ވަނީ ދިފާއުކޮށްފައެވެ. އަދި އޭގެ ފަހުން ޑޯޓްމުންޑުގެ ޖޫޑް ބެލިންހަމް އޭރިއާ ބޭރުން ފޮނުވާލި ހަމަލާއެއް ވަނީ ގޯލުގެ ހުރަސް ދަނޑިއަށް އަމާޒުވެފައެވެ.

މި މެޗުގެ ފުރަތަމަ ހާފުގައި ލަނޑެއް ފެނިފައި ނުވާއިރު، ޑޯޓްމުންޑުން ދެ ލަނޑުވެސް ޖަހާފައިވަނީ ދެވަނަ ހާފުގައެވެ. އެގޮތުން ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އެރިތާ މިނެޓެއްގެ ތެރޭގައި ތޯގަން ހަޒާޑް ވަނީ ޑޯޓްމުންޑަށް ލީޑު ނަގައިދީފައެވެ. އަދި އޭގެ ނުވަ މިނެޓު ފަހުން ހޫލިއަން ބްރަންޓް ހުރަސްކޮށްދިން ބޯޅައަކުން ހަޒާޑް ވަނީ އިތުރު ލަނޑެއް ޖަހައި، ޑޯޓްމުންޑަށް ލީޑު ފުޅާކޮށްދީފައެވެ.

ޖަރުމަން ކަޕުގެ ދެވަނަ ބުރުގައި ކުޅުނު މެޗުން މޮޅުވެ ގަދަ 16 އަށް ޑޯޓްމުންޑް ދަތުރުކުރިއިރު، ގަދަ 16 ގެ މެޗުތައް ކުޅޭނީ އަންނަ އަހަރުގެ ޖެނުއަރީ މަހުގެ ތެރޭގައެވެ. މި ސީޒަނުގެ ޖަރުމަން ކަޕުގެ ގަދަ 16 އަށް ޑޯޓްމުންޑް ދަތުރުކޮށްފައިވާއިރު، އެ ޓީމަކީ މިދިޔަ ސީޒަނުގެ ޗެމްޕިއަން ޓީމެވެ. އެއާއެކު ޑޯޓްމުންޑުން ވަނީ މިހާތަނަށް ޖަރުމަން ކަޕް ފަސް ފަހަރު ކާމިޔާބުކޮށްފައެވެ.