ޖިރޫގެ ލަނޑުން މިލާން އެއްވަނައަށް

އިޓާލިއަން ލީގުގައި އަންގާރަ ދުވަހުގެރޭ ކުޅުނު މެޗުން ޓޮރީނޯ ބަލިކޮށް ތާވަލުގެ އެއްވަނައަށް އޭސީ މިލާން ޖެހިލައިފިއެވެ.

އަމިއްލަ ދަނޑުގައި ކުޅުނު މެޗުން މިލާން މޮޅުވީ 1-0 ގެ ނަތީޖާއަކުންނެވެ.

މި މެޗުގައި ފެނިގެންދިޔަ ހަމައެކަނި ލަނޑު މިލާނުން ކާމިޔާބުކޮށްފައިވަނީ މެޗު ފަށައިގެން 14 ވަނަ މިނެޓުގައެވެ. ރަޑް ކްރުނިޗުގެ އެހީތެރިކަމާއެކު މި ލަނޑު އެ ޓީމަށް ކާމިޔާބުކޮށްދިނީ މި އަހަރުގެ ހޫނު މޫސުމުގެ ޓްރާންސްފާ ބާޒާރުގައި ޗެލްސީ ދޫކޮށް މިލާނާ ގުޅުނު ފްރާންސްގެ ފޯވާޑް އޮލިވިއޭ ޖިރޫއެވެ.

އޭގެ ފަހުން ފުރަތަމަ ހާފުގައި މިލާނުގެ ރަފައެލް ލެއާއޯ ފޮނުވާލި ހަމަލާއެއް ޓޮރީނޯގެ ގޯލްކީޕަރު ދިފާއުކުރިއިރު، މި ހާފުގައި މިލާނުގެ ކްރުނިޗް ބޮލުން ފޮނުވާލި ހަމަލާއެއް ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.

މި މެޗުގެ ދެވަނަ ހާފުގައި ޓޮރީނޯއިން އެ ޓީމުގެ ކުޅުން ރަނގަޅުކުރިއިރު، މި ހާފުގައި ލަނޑެއް ޖެހުމަށް އެ ޓީމަށް ވަނީ ރަނގަޅު ފުރުސަތުތަކެއް ލިބި ބޭކާރުވެފައެވެ. އެގޮތުން ދެވަނަ ހާފުގައި ޓޮރީނޯގެ އަންދްރެއާ ބެލޮއްޓީއަށް ރަނގަޅު ފުރުސަތެއް ލިބި ބޭކާރުވިއިރު، މި ހާފުގައި އެ ޓީމުގެ އެންޓޯނިއޯ ސަނާބްރިއާ ފޮނުވާލި ނުރައްކާތެރި ހަމަލާގެ ހުރަހަކަށްވީ މިލާނުގެ ގޯލްކީޕަރެވެ.

މި މޮޅާއެކު ތާވަލުގެ އެއްވަނައަށް މިލާން ޖެހިލީ ކުޅުނު 10 މެޗުން 28 ޕޮއިންޓް ހޯދައިގެންނެވެ. ދެވަނައިގައި އޮތް ނާޕޮލީއަށް ނުވަ މެޗުން ލިބިފައިވަނީ 25 ޕޮއިންޓެވެ. އެހެންކަމުން ލީގުގައި ލީގުގައި ބުދަ ދުވަހުގެރޭ ބޮލޯނިއާ ދެކޮޅަށް ކުޅޭ މެޗުން މޮޅުވެއްޖެނަމަ، ނާޕޮލީއަށް މިލާނާ ޕޮއިންޓުގެ ގޮތުން އެއްވަރުކޮށް، ތާވަލުގެ އެއްވަނައަށް އަލުން އެރޭނެއެވެ.