އިގުތިސާދީ ކުރިއެރުންތަކާއެކު ވަޒީފާގެ ފުރުސަތުތައް އިތުރުވާނެ ކަމަށް ރައީސް ވިދާޅުވި: އާތިފް
26 އޮކްޓޯބަރު 2021 | އަންގާރަ 14:11އިގުތިސާދީ މަސައްކަތްތައް ފަށައިގަންނަންޖެހޭކަމަށް ރައީސް ވިދާޅުވި
ކުޅުދުއްފުށީ ސިޓީ ކައުންސިލްގެ މޭޔަރ މުހައްމަދު އާތިފް ރާއްޖެޓީވީގެ ފަލަސުރުޚީ ޕްރޮގްރާމުގައި
ބޮޑު ތިލަދުންމައްޗަށް އިގުތިސާދީ މަސައްކަތްތައް ތައާރަފުކޮށް، ވަޒީފާ އިތުރުކުރެވޭނެ ހުރިހާ ގޮތްތަކެއް ބަލައިދެއްވާނެކަމަށް ރައީސުލްޖުމްހޫރިއްޔާ ވިދާޅުވިކަމަށް ކުޅުދުއްފުށީ ސިޓީ ކައުންސިލްގެ މޭޔަރ މުހައްމަދު އާތިފް ވިދާޅުވެއްޖެއެވެ.
އާތިފް މިފަދައިން ވިދާޅުވީ ޒުވާނުންގެ ދުވަސް ފާހަގަކުރުމަށް ކުޅުދުއްފުށީގައި ބޭއްވި ޖަލްސާގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ދެއްކެވި ވާހަކަފުޅަށް އިޝާރަތްކުރައްވައި ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަދައްކަވަމުންނެވެ. ޒުވާނުންގެ ދުވަހާއި ގުޅިގެން ބޭއްވި ޖަލްސާގައި އާތިފް ވަނީ, ބޮޑުތިލަދުންމަތީގެ ޒުވާނުންނަށް ވަޒީފާގެ ފުރުސަތުތައް މަދުކަން ފާހަގަކުރައްވާފައެވެ. މިކަމަށް ހައްލު ހޯދުމަށް އެ ސަރަހައްދުގައި އިގުތިސާދީ ގިނަ މަސައްކަތްތަކެއް ކުރަންޖެހޭކަމަށް ރައީސް ވިދާޅުވިކަމަށް އާތިފް ވިދާޅުވިއެވެ.
މިގޮތުން ރާއްޖޭގެ ފަތުރުވެރިކަމުގެ ރަންޔޫބީލް ފާހަގަކުރުމަށް ތައްޔާރުވަމުންދާއިރު، އެ ސަރަހައްދުގައި ރަނގަޅަށް ހިނގާ ރިސޯޓެއް ނެތްކަމަށާއި، މަސްވެރިކަމަށް ބެލިޔަސް, މަސްވެރިންނަށް މަސް ކިރޭނެ ގޮތްތަކެއް ނެތް ކަމަށާއި އަދި ގޭދޮށު މަސް ފެކްޓްރީތަކެއް ވެސް ނެތް ކަމަށް އާތިފް ވިދާޅުވިއެވެ. އަދި އެ ސަރަހައްދުގައި ފަތުރުވެރިކަން އެހާ ބޮޑަށް ފަށައިގަނެވިފައިނުވާކަން ރައީސްވެސް ގަބޫލުފުޅުކުރައްވާކަމަށް އާތިފް ވިދާޅުވިއެވެ.
އާތިފް ވިދާޅުވީ, އެހެންކަމުން މި ހުރިހާ ކަމަކަށް ހައްލު ހޯދައިދެއްވުމަށް, ސަރުކާރުގެ ސިޔާސަތުތަކުގެ ތެރޭގައި މިކަން ހިމަނައިގެން މަސައްކަތްތަކެއް ކުރައްވާނެ ކަމަށް ރައީސް ވިދާޅުވިކަމަށެވެ. އަދި ބޮޑުތިލަދުންމައްޗަށް ޓުއަރިޒަމް ތައާރަފުކޮށް އިގުތިސާދީ މަންފާ ލިބޭނެ ގޮތް ފަހިކުރައްވާނެ ކަމަށާއި، ހދ. ހަނިމާދޫ އިންޓަރނޭޝަނަލް އެއާޕޯޓު ތަރައްގީވެގެންދިއުމާއެކު ވަޒީފާގެ ފުރުސަތުތައް ފަހިވެގެންދާނެ ކަމަށް ރައީސް ވިދާޅުވިކަމަށެވެ. މީގެ އިތުރުން ކުޅުދުއްފުށީގެ ޓާޝަރީ ހޮސްޕިޓަލް އިމާރާތްކުރެވި، އެތަނުގެ ޚިދުމަތް ދޭން ފެށުމުންވެސް ވަޒީފާގެ ފުރުސަތުތައް ފަހިވެގެންދާނެކަމަށް ވިދާޅުވިއެވެ.
އެ ސަރަހައްދަށް އިގުތިސާދީ މަސައްކަތްތައް ތައާރަފުކޮށް ވަޒީފާ އިތުރުކުރެވޭނެ ހުރިހާ ގޮތްތަކެއް ބަލައިދެއްވާނެކަމުގެ ޔަގީންކަން ރައީސް ދެއްވިކަމަށް އާތިފް ވިދާޅުވިއެވެ.
ޒުވާނުންގެ ދުވަހާ ގުޅިގެން ބޭއްވި ރަސްމިއްޔާތުގައި އާތިފް ވަނީ, އެރަށަށް ދިމާވެފައިވާ ބޯހިޔާވަހިކަމުގެ މައްސަލައަށްވެސް އަލިއަޅުވާލައްވާފައެވެ. މި މައްސަލައަށް ހައްލު ގެނެސްދިނުމަށް އަންނަ އަހަރުގެ ބަޖެޓުގައި ހިމަނައިގެން ކުޅުދުއްފުށީގައި 400 ހައުސިންގ ޔުނިޓް ގާއިމްކުރުމަށް ރިޒަރވް ކޮށްފައިވާކަމަށް ރައީސް ވިދާޅުވިއެވެ.
