އެސްޓީއޯގެ މުސާރައިގެ އޮނިގަނޑަށް ބަދަލުތަކެއް ގެނައުމުން މުވައްޒަފުންނަށް ލިބޭ މުސާރަ އިތުރުވެގެންދާނެ ކަމަށް އެ ކުންފުނިން ބުނެފި އެވެ.

އެސްޓީއޯ އިން ބުނީ އެ ކުންފުނި ހިންގުން ހަރުދަނާކޮށް ވިޔަފާރި ސްޓްރީމުލައިން ކުރުމަށްޓަކައި ގެންނަމުންދާ ބަދަލުތަކުގެ ތެރެއިން އެކުންފުނީގެ މުވައްޒަފުންގެ މުސާރައިގެ އޮނިގަނޑު މުރާޖައާ ކުރުމަށް އެކުންފުނިން ނިންމީ ކަމަށެވެ.

މިހާރު އެސްޓީއޯގެ މުސާރައިގެ އޮނިގަނޑު ބައްޓަން ކުރެވިފައިވަނީ ސިވިލް ސަރވިސް އަދި ސަރުކާރުގެ އެހެނިހެން މުއައްސަސާތައް ފަދަ އާންމުންނަށް ހިދުމަތް ދިނުމަށް އުފެދިފައިވާ އޮފީސްތަކުގެ ސްޓްރަކްޗަރާ އެއް ގޮތަށް ކަމަށް ވީ ނަމަވެސް، އެ ކުންފުނިން މުސާރައިގެ  އޮނިގަނޑަކީ މިޒަމާނުގެ ވިޔަފާރި ކުންފުނިތަކުގައި ބޭނުން ކުރާފަދަ އިންސެންޓިވް ބޭސްޑް އޮނިގަނޑަކަށް ހެދުމަކީ އެކުންފުނީގެ އެންމެ ބޮޑު މަސައްކަތް ކަމަށް އެސްޓީއޯ އިން ބުނެ އެވެ. އެގޮތުން މުވައްޒަފުންނަށް މުސާރައިގެ އޮނިގަނޑުގެ ތެރެއިން ސްލޭސް ކޮމިޝަން އަދި ޓާގެޓް އެޗީވް ކުރުމުން ލިބޭ އެހެނިހެން އެލަވަންސް ތައާރަފްކޮށް މުސާރައިގެ އޮނިގަނޑު އަލުން އެކުލަވާލާނެ ކަމަށް އެ ކުންފުނިން ބުނެ އެވެެ. މި ބަދަލުގެ ސަބަބުން މުވައްޒަފުންނަށް ލިބެމުންދާ މުސާރަ އިތުރުވެ، ކުންފުނިން ދެމުންދާ ހިދުމަތުގެ ފެންވަރު ރަނގަޅު ކުރެވި ކުންފުނީގެ ހިންގުން އިތުރަށް ހަރުދަނާވަގެންދާނެ ކަމަށް އެކުންފުނިން ބުނެ އެވެ.

އެސްޓީއޯ އިން މުސާރައިގެ އޮނިގަނޑަކަށް ބަދަލު ގެނައިކަން ފާހަގަކޮށްފައިވާ އިރު މި ބަދަލާ ގުޅިގެން މުސާރަ ކުޑަވާ ކަމަށް ބުނެ އެ ކުންފުނީގެ ބައެއް މުވައްޒަފުން ވަނީ ރާއްޖެއެމްވީއާ މައުލޫމާތު ހިއްސާކޮށްފަ އެވެ.

އެސްޓީއޯގެ މިއަހަރުގެ ތަފާސްހިސާބުތަކަށް ބަލާ އިރު މިއަހަރުގެ ފުރަތަމަ ކުއާޓަރުގައި ފައިދާގެ ގޮތުގައި 54 މިލިއަން ރުފިޔާ ވަނީ ލިބިފަ އެވެ. އަދި މިއަހަރުގެ ފުރަތަމަ ހަ މަސް ދުވަހު އެ ކުންފުންޏަށް ލިބުނީ 115.9 މިލިއަން ރުފިޔާ އެވެ.