ކުޅުދުއްފުށީ ރީޖަނަލް ހޮސްޕިޓަލުގައި މި މަހު 26ން 28ށް ނޮން އިންވޭސިވް ކާރޑިއޮލޮޖީ ކޭމްޕެއް ކުރިޔަށް ގެންދިޔުމަށް ނިންމާފައިވާކަމަށް އެ ހޮސްޕިޓަލުން ބުނެފިއެވެ.

އެ ހޮސްޕިޓަލުން ބުނީ މި ކޭމްޕަކީ އެ ހޮސްޕިޓަލުން އިސްނަގައިގެން އައިޖީއެމްއެޗާ ގުޅިގެން ބާއްވަން ހަމަޖެހިފައިވާ ކޭމްޕެއް ކަމަށެވެ. އެގޮތުން މި ކޭމްޕްގައި ބަލި މީހުން ބައްލަވާނީ ނޭޝަނަލް ކާރޑިއެކް ސެންޓަރުގައި މަސައްކަތް ކުރައްވާ ހިތުގެ ބަލީގެ ޚާއްސަ ޑަކްޓަރު މިޤްދާދް ޝަރީފްއެވެ.

ކުޅުދުއްފުށީ ރީޖަނަލް ހޮސްޕިޓަލުގެ ޑެޕިއުޓީ ސީއީއޯ އަހުމަދު ދާއޫދު ވިދާޅުވީ އުންމީދަކީ ކުއާރޓާލީކޮށް މި ކޭމްޕްތައް ކުރިޔަށް ގެންގޮސް، ފެންވަރު ރަނގަޅު ޚިދުމަތެއް ރައްޔިތުންނާ ގާތުން ދާއިމީ ގޮތެއްގައި ދިނުން ކަމަށެވެ. އެގޮތުން މިއީ މިފަދަ 3 ވަނަ ކޭމްޕްކަން ފާހަގަކުރެއްވިއެވެ.

މި ފަދަ ކޭމްޕްތަކުގެ ބޭނުމަކީ އައި.ޖީ.އެމް.އެޗްއާ އެކު އޮންނަ ގުޅުން އިތުރަށް ބަދަހިވެ، ރާއްޖޭގެ މައި ހޮސްޕިޓަލަށް ރެފާރ ކުރަންޖެހޭ ކޭސްތަކުގައި އަޅުގަނޑުމެންގެ ރައްޔިތުންނަށް ލުއިތަކެއް ލިބި ދެވި, އެންމެ އެކަށޭނެ ފަރުވާ ހޯދައިދިނުން ކަމަށް އަހުމަދު ވިދާޅުވިއެވެ.

ޑެޕިއުޓީ ސީއީއޯ އިތުރަށް ވިދާޅުވީ މި ފަހަރުގެ ކޭމްޕްގައި، ކޮންސަލްޓޭޝަން ޚިދުމަތުގެ އިތުރުން ނޮން އިންވޭސިވް ޓެސްޓްތައް ކުރިޔަށް ގެންދިޔުމަށް ހަމަޖެހިފައިވާނެކަމަށާއި، ފަހުން ގުޅުނު ކާރޑިއޮލޮޖިސްޓާ ގުޅިގެން މަސައްކަތްތައް ކުރިޔަށް ގެންގޮސް ކޭ.އާރު.އެޗް ގެ ކާރޑިއެކް ސެންޓަރާއި، އައި.ޖީ.އެމް.އެޗް ގެ ނޭޝަނަލް ކާރޑިއެކް ސެންޓަރާ ދެމެދު އޮންނަ ގުޅުން އިތުރަށް ބަދަހިކޮށް މަސައްކަތްތައް ސްޓްރީމްލައިން ކުރުމަށް މަސައްކަތް ކުރެވޭނެކަމަށެވެ.

26 ވަނަ ދުވަހު ކޭމްޕް ކުރިއަށް ދާނީ މެންދުރުފަހު 2:00 ން ހަވީރު 6:00 ށެވެ. އަދި 27 ވަނަ ދުވަހުގެ ހެނދުނު 9:00 ން 11:00ށް، އަދި މެންދުރުފަހު 2:00 ން ހަވީރު 6:00 ށެވެ. 28 ވަނަ ދުވަހު މި ކޭމްޕް ކުރިއަށް ދާނީ ހެނދުނު 9:00ން 11:00 ށެވެ.

ކޭއާރުއެޗުން ބުނީ މަސައްކަތް ކުރަމުންދަނީ ކޭމްޕުގެ ތެރެއިން ވީހާވެސް ގިނަ މީހުންނަށް ޚިދުމަތް ދިނުމަށް ކަމަށާއި، ކޭމްޕްގެ ތެރެއިން ސްކްރީނިން ވެސް ކުރިއަށްދާނެ ކަމަށެވެ.

އެގޮތުން މި ކޭމްޕަށް ވެއިޓް ލިސްޓްކުރުން މިމަހު 26 ވަނަ ދުވަހުގެ ހެނދުނު 6:00 އާ ހަމައަށް ކުރިއަށް ދާނެއެވެ. ވެއިޓްލިސްޓްކުރުން ކުރިޔަށް ދާނީ ކޮންމެ ދުވަހެއްގެ ވެސް ހަވީރު 4 ން ހެނދުނު 6 އާ ދެމެދުއެވެ. އަދި އެޕޮއިންޓްމެންޓް ކަށަވަރުވާ ފަރާތްތަކަށް އަންގާނެކަމަށް ކޭއާރުއެޗުން މައުލޫމާތު ދެއެވެ.