ކ. މާލެ
|
24 އޮކްޓޯބަރ 2021 | އާދީއްތަ 22:51
ބާސާ އާއި ރެއާލް ބައްދަލުކުރި މެޗުގެ ތެރެއިން
ބާސާ އާއި ރެއާލް ބައްދަލުކުރި މެޗުގެ ތެރެއިން
ގެޓީ އިމޭޖަސް
ސްޕެނިޝް ލީގު
ބާސާ ބަލިކޮށް ރެއާލް އެއްވަނައަށް
 
ބާސާ އަތުން ރެއާލް މޮޅުވީ 2-1 ގެ ނަތީޖާއަކުން
 
ތާވަލުގެ އެއްވަނައަށް ރެއާލް ޖެހިލީ 20 ޕޮއިންޓާއެކު

ސްޕެނިޝް ލީގުގައި އާދީއްތަ ދުވަހުގެރޭ ކުޅުނު އެލް ކްލަސިކޯ މެޗުން ބާސެލޯނާ ބަލިކޮށް ތާވަލުގެ އެއްވަނައަށް ރެއާލް މެޑްރިޑް ޖެހިލައިފިއެވެ.

ބާސާގެ ދަނޑުގައި ކުޅުނު މެޗުން ރެއާލް މޮޅުވީ 2-1 ގެ ނަތީޖާއަކުންނެވެ.

މި މެޗުން ރެއާލް މޮޅުވިއިރު، އެންމެ ފަހުން ކުޅުނު އެލް ކްލަސިކޯގެ ތިން މެޗުންވެސް އެ ޓީމު ވަނީ މޮޅުވެފައެވެ. އަދި މި ފަހަރުގެ ކްލަސިކޯ މެޗަކީ 2004 ވަނަ އަހަރުގެ ފަހުން އާޖެންޓީނާގެ ތަރި ލިއޮނަލް މެސީ އާއި ސްޕެއިނުގެ ތަޖުރބާކާރު ޑިފެންޑަރު ސާޖިއޯ ރާމޯސް ނެތި ކުޅުނު ފުރަތަމަ ކްލަސިކޯ މެޗެވެ.

އާދީއްތަ ދުވަހުގެރޭ ކުޅުނު މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، މެޗުގެ ފުރަތަމަ ހާފުގައި ރެއާލުން ވަނީ ލީޑު ނަގާފައެވެ. ކައުންޓަ އެޓޭކެއްގައި ރޮޑްރީގޯ ދިން ޕާހަކުން މެޗުގެ 32 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ޑިފެންޑަރު ޑޭވިޑް އަލަބާއެވެ. މިއީ މި އަހަރުގެ ހޫނު މޫސުމުގެ ޓްރާންސްފާ ބާޒާރުގައި ހިލޭ ޓްރާންސްފާއެއްގައި ބަޔާން މިއުނިކް ދޫކޮށް ރެއާލަށް ބަދަލުވި ފަހުން އަލަބާ ކާމިޔާބުކުރި ފުރަތަމަ ލަނޑެވެ.

އޭގެ ފަހުން މި މެޗުގައި ދެ ޓީމަށްވެސް ރަނގަޅު ފުރުސަތުތަކެއް ލިބިގެންދިޔައިރު، ރެއާލުން ލީޑު ފުޅާކޮށްފައިވަނީ މެޗުުގެ އިތުރު ވަގުތުގައެވެ. އޭރިއާ ތެރެއިން ލިބުނު ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ލޫކަސް ވަޒްކުއޭޒެވެ.

އެކަމަކު އޭގެ ހަތަރު މިނެޓު ފަހުން ބާސާއިން ވަނީ މި މެޗުގައި ލަނޑެއް ޖަހައި، ފަރަގު ކުޑަކޮށްފައެވެ. ސާޖީނިއޯ ޑެސްޓް ހުރަސްކޮށްދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ އިތުބާރު ފޯވާޑް ސާޖިއޯ އަގުއޭރޯއެވެ. މިއީ މި އަހަރުގެ ހޫނު މޫސުމުގެ ޓްރާންސްފާ ބާޒާރުގައި ހިލޭ ޓްރާންސްފާއެއްގައި މެންޗެސްޓާ ސިޓީ ދޫކޮށް ބާސާއަށް ބަދަލުވި ފަހުން އަގުއޭރޯ ކާމިޔާބުކުރި ފުރަތަމަ ލަނޑެވެ.

މި މޮޅާއެކު ތާވަލުގެ އެއްވަނައަށް ރެއާލް ޖެހިލިއިރު، އެ ޓީމާއި ދެވަނައިގައި އޮތް ސެވިއްޔާ އަދި ތިންވަނައިގައި އޮތް ރެއާލް ސޮސިއެޑާޑަށް ވަނީ ކުޅުނު ނުވަ މެޗުން 20 ޕޮއިންޓް ލިބިފައެވެ. ލީގުގައި އާދީއްތަ ދުވަހުގެރޭ ކުޅުނު މެޗުން ސެވިއްޔާ ވަނީ އަމިއްލަ ދަނޑުގައި ކުޅެ ލެވާންޓޭ އަތުން 5-3 ގެ ނަތީޖާއަކުން މޮޅުވެފައެވެ. އަދި ރެއާލް އަތުން ބަލިވި ބާސާ އޮތީ ތާވަލުގެ ނުވަވަނައިގައި ނުވަ މެޗުން 15 ޕޮއިންޓާއެކުއެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުސައިން ފަރިޔާޒް
0%
0%
0%
0%
0%
0%
ކޮމެންޓް