މުހައްމަދު ގާސިމް ޕްރީސްކޫލަކީ ޚާއްސަ ސްކޫލެއް: އެޑިއުކޭޝަން މިނިސްޓަރ
މި ސްކޫލަކީ ދެގޮތަކަށް ވަރަށް ޚާއްސަ ސްކޫލެއް
މުޙާއްމަދު ޣަސިމް ޕްރީސްކޫލް ހުޅުވުމަށް ނައިބުރައީސް ފައިސަލް ނަސީމާއި އެޑިއުކޭޝަން މިނިސްޓަރު ޑރ. އައިޝަތު އަލީ އެސްކޫލަށް ވަޑައިގަންނަވަނީ،
ހުޅުމާލޭގައި އަމިއްލަ ފަރާތަކުން އިމާރާތްކޮށްފައިވާ މުހައްމަދު ގާސިމް ޕްރީސްކޫލަކީ ޚާއްސަ ސްކޫލެއް ކަމަށް އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ.
އާދިއްތަ ދުވަހުގެ ހެނދުނު މުހައްމަދު ގާސިމް ޕްރީސްކޫލް ހުޅުވުމަށް އެ ސްކޫލްގައި ބޭއްވި ޚާއްސަ ރަސްމިއްޔާތުގައި މިނިސްޓަރު ޑރ.އައިޝަތު ވިދާޅުވީ މިއީ ތައުލީމީ ދާއިރާއަށް އެޅުނު އިތުރު ބިންގަލަކާއި، ލިބުނު ކުރިއެރުމެއް ކަމަށެވެ.
މުހައްމަދު ގާސިމް ޕްރީސްކޫލަށް އިޝާރާތް ކުރައްވައި މިނިސްޓަރު ވިދާޅުވީ އެސްކޫލަކީ ދެގޮތަކުން ވަރަށް ޚާއްސަ ސްކޫލެއް ކަމަށެވެ. އަދި މުހައްމަދު ގާސިމް ޕްރީސްކޫލަކީ ހަމައެކަނި ތުއްތު ކުދިންގެ އުމުރުފުރައަށް ޚާއްސަކޮށްގެން މިނިސްޓްރީ އޮފް އެޑިޔުކޭޝަނުން ހިންގަން ފަށާ ފުރަތަމަ ސްކޫލް ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ސްކޫލެއް ހުޅުވިގެން ދިއުމަކީ ތާރީޚީ ޚާއްސަ ކަމެއް ކަމަށެވެ. ސްކޫލުތަކަކީ ޒަމާންތަކަކަށް ދެމިގެންދާނެ ތަނެއްކަން ފާހަގަކުރައްވައި މިނިސްޓަރު ވިދާޅުވީ މުހައްމަދު ގާސިމް ޕްރީސްކޫލުގެ ހިޔާވަހިކަމުގެ ދަށުން އެތައް ހާހުން ދަރިވަރުން ތައުލީމް ހާސިލް ކުރާނެ ކަމަށާއި، ގައުމަށް ޚިދުމަތް ކުރާނެ ގިނަ ޒުވާނުންތަކެއް ނުކުންނާނެ ކަމަށެވެ.
ހުޅުމާލޭގައި އަމިއްލަ ފަރާތަކުން އިމާރާތްކޮށްފައިވާ މުހައްމަދު ގާސިމް ޕްރީސްކޫލް ހުޅުއްވައިދެއްވީ އާދީއްތަދުވަހުގެ ހެނދުނު ނާއިބުރައީސް ފައިސަލް ނަސީމެވެ.
ނާއިބްރައީސް ވަނީ އަލީ ފިރާގު އޭނާގެ ބައްޕަ އަލްމަރްޙޫމް މުހައްމަދު ގާސިމުގެ ހަނދާނުގައި އިމާރާތްކޮށް ސަރުކާރަށް ހަދިޔާކޮށްފައިވާ 10 ކްލާސްރޫމާއި، ހޯލު އަދި އިދާރީ ހިންގުމަށް ބޭނުންވާ ކޮޓަރިތައް ހިމަނައިގެން ބިނާކޮށްފައިވާ ސްކޫލަށްޓަކައި އެ އާއިލާއަށް ޝުކުރުއަދާކުރައްވައިފައެވެ.
