ކަނޑަށް ވެއްޓުނު ކުއްޖާ ހޯދުމުގެ މަސައްކަތް ހުއްޓާލައިފި
23 އޮކްޓޯބަރު 2021 | ހޮނިހިރު 15:21އެކުއްޖާ ހޯދުމަށް މިހާތަނަށް 4،706 އަކަނޯޓިކަލް މޭލުގެ ސަރަހައްދެއް ބަލާފައިވޭ
ލޯންޗުން ކުއްޖާ ވެއްޓުނު ތަން
ކަނޑަށް ވެއްޓުނު ކުއްޖާ ހޯދުމުގެ މަސައްކަތް ވަގުތީގޮތުން ހުއްޓާލާފައިވާކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)އިން ބުނެފިއެވެ.
އެމްއެންޑީއެފުން ބުނީ; މިމަހުގެ 16 ވަނަ ދުވަހު "ޑްރީމް ލޯންޗަށް" ރާޅެއް އަރައި ހަތަރު އަހަރުގެ ކުޑަ ކުއްޖަކު ގެއްލިފައިވާތީ, ކޯސްޓްގާޑުން މިހާތަނަށް ކަނޑުމަގުންނާއި ވައިގެ މަގުން 4،706 އަކަނޯޓިކަލް މޭލުގެ ސަރަހައްދެއް ބަލާފައިވާކަމަށެވެ.
އެކުއްޖާ ހޯދުމަށް މިހާތަނަށް ކުރެވުނު މަސައްކަތުން ކުއްޖާ ފެނިފައި ނުވާތީ، ކުއްޖާ ހޯދުމަށް ފަށާފައިވާ "ސަރޗް" ސަސްޕެންޑު ކޮށްފައިވާކަމަށް އެމްއެންޑީއެފުން ބުނެފައިވެއެވެ.
މި ހާދިސާގައި 3 މީހަކު ލޯންޗުން ބޭރަށް ވެއްޓިފައިވާއިރު, އޭގެ ތެރޭގައި ހިމެނެނީ ގެއްލިގެން ހޯދަމުންދާ ކުއްޖާއާއި އެކުއްޖާގެ މަންމަގެ އިތުރުން އެހެން ފިރިހެނެކެވެ. އެކުއްޖާގެ މަންމަ 33 އަހަރުގެ މަރިޔަމް ނާހިދާ ވަނީ މިހާދިސާގައި ނިޔާވެފައެވެ.
ހާދިސާ ހިނގިއިރު ތަންކޮޅެއް ދުރުން އެ ކުއްޖާ ފެނިފައިވާކަމަށާއި, އެހެންނަމަވެސް އޭގެ ފަހުން އެ ކުއްޖާ ފެނިފައިނުވާކަމަށް ލޯންޗުގައި ހުރި މީހަކު ބުނެފައިވެއެވެ.
