ވެރިކަން ކުރުމުގެ ތެރޭގައި ޖާހަތު ބޮޑުވެ ބައެއް ފަހަރު ރައްޔިތުންނަށް ކޮށްދޭން ޖެހޭ ކަންކަން ހަނދާނެއް ނުހުރެއެވެ. ވެރިކަމަކީ ދެވި ހިފައި ބޮޑާކަމާއި ކިބުވެރިކަމުގެ ތެރެއަށް މީހާ ވައްޓާލާއެއްޗެއް ކަމަށް މީހުން ބުނެއުޅެއެވެ. ނަމަވެސް ޒަމާންތައް ވޭތުވެ އެކަން މިހާރު ބަދަލުވެއްޖެއެވެ.

ރައްޔިތުން އިންތިޚާބު ކުރާ މީހަކީ ރައްޔިތުންގެ ހާދިމެކެވެ. ވެރިކަމަށް އަންނަނީ ރައްޔިތުންގެ ޖާހަތު ފުރިހަމަ ކުރުމަށެވެ. ރައްޔިތުންގެ ވެރިކަމެއް ކުރެވޭނީ ރައްޔިތުން ބުނާ ގޮތަށް ހަދައިގެންނެވެ. ނޫނީ އެމީހެއްގެ ސިޔާސީ ތަރި ެޮއޮއްސިދާނެއެވެ. މިއީ މާޒީގައި ވެސް ފެންނަން ހުރި ކަންކަމެވެ.

މިހާރު ރާއްޖޭގެ ވެރިކަމާއި ހަވާލުވެވަޑައިގެން ހުންނެވި ގައުމުގެ ރައީސަކީ ނަމޫނާއެކޭ ބުނުމަކުން ދޮގަކަށް ނުވާނެއެވެ. މިއީ ރައްޔިތުން ދައްކާ ވާހަކައެވެ. ރައްޔިތުންނަށްޓަކައި ވެރިކަން ކުރައްވާ މި ދީބަށް މިސާލެއްގެ ގޮތުގައި ރައްޔިތު މީހާ ސިފަކުރެއެވެ.

ދާދި ފަހުން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު އއ. ހިމަންދޫއަށް ވަޑައިގެން ދެއްކެވި ވާހަކަފުޅަށް އަލިއަޅުއްވާލާނަމެވެ. އެމަނިކުފާނު ވިދާޅުވީ ދަތުރުފުޅުގައި ކޮންމެ ރަށެއްގައިވެސް އިތުރަށް ކުރަންޖެހޭ ކަންތައްތައް އެބަހުރި ކަމަށެވެ. ދަތުރުފުޅުތަކުގެ ބޭނުމަކީ، ރައްޔިތުންގެ ފަރާތުން އެ ކަންތައްތައް އޮޅުންފިލުވުން ކަމަށެވެ.

ރައީސް ވިދާޅުވީ އެއްވެސް ކަމެއްގައި އަދި ސަރުކާރުގެ ތެރޭގައި ކުރަން ފަށާފައި ހުރި ކަމެއްގައި، ރައްޔިތުން ބޭނުން ނުވާގޮތަށް، މުޅި ސަރުކާރުގެ ތެރޭގައިވެސް ކަމެއް އިސްލާހު ކުރަންވެފައި އޮތް ކަމަށްވާނަމަ، އެކަމެއް ހިއްސާކޮށްދެއްވުމަށް އެދިވަޑައިގަންނަވާ ކަމުގައެވެ. އެމަނިކުފާނު ވިދާޅުވީ މިތިބީ ރައްޔިތުންނަށް ޚިދުމަތް ކުރަން އައިސް ކަމަށެވެ. އަދި ވަކި ކުލައެއް، ވަކި ރަށެއް، ވަކި ފިކުރެއްނެތި، ސަރުކާރުން އެ ކަންތައްތައް ކޮށްދެމުން ގެންދާނެ ކަމަށެވެ.

ރައީސް ވިދާޅުވީ އަހަރެއް ނިމި، އެހެން އަހަރަކަށް ކުރިމަތިލާއިރުގައި ސަރުކާރުން ކުރަންހުރި ކަންތައް ނިންމަން ޖެހޭ ކަމަށެވެ. އަދި ރަށްރަށުގެ ތަރައްގީއަށްޓަކައި ކުރަންހުރި ކަންތައްތައް އިސްކޮށް ތަރުތީބު ކުރަން ޖެހޭ ކަމަށެވެ. މިއީ އިގްތިސާދީ ފުން ވަޅުގަނޑެއްގައި ރާއްޖެއޮތް އިރު ވެސް އެމަނިކުފާނު ރައްޔިތުންގެ އުއްމީދުތަކުގައި ކުލަޖައްސަވަން ކުރައްވާ މަސައްކަތެވެ.

ރައީސް ސާލިހު ވިދާޅުވީ އަންނަ އަހަރުގެ އަމާޒަކީ، މިހާރު ފަށާފައި ހުރި މަސައްކަތްތައް ނިންމުމަށް މިސްރާބު ހިފުން ކަމަށެވެ. ރިޔާސީ އިންތިޚާބާއި، ރައްޔިތުންގެ މަޖިލީހުގެ އިންތިޚާބުގައި ވެފައި ހުރި ވައުދުތަކުގެ ގާތްގަނޑަކަށް 90 އިންސައްތަ މަސައްކަތް، އެކި ސްޓޭޖްތަކުގައި ފެށިފައި އެބަހުރި ކަމަށް އެމަނިކުފާނު ވިދާޅުވިއެވެ. އަދި ވޭތުވެދިޔަ ދޮޅު އަހަރެއްހާ ދުވަހުގެ ތެރޭގައި، މިކުރިމަތިވި ދަތި އުނދަގުލުގައި މިހިސާބަށް އާދެވިފައި ތިބުމަކީ، ސަރުކާރު ހިންގަން ތިއްބެވި ބޭފުޅުން ކުރެއްވި ބުރަ މަސައްކަތް ކަމަށް ރައީސް ވިދާޅުވިއެވެ.

އަންނަ އަހަރުގެ ބަޖެޓާއެކު މިހާރު ފެށިފައި ހުރި މަޝްރޫއުތައް ނިންމުމަށް އަމާޒު ހިފާފައިވާ ކަމަށާއި، ތަރައްގީގެ ވަރަށްގިނަ މަޝްރޫއުތަކެއް ނިމިގެންދާނެ ކަމަށް ވެސް ވިދާޅުވިއެވެ. 

މިއީ ރަށްރަށުގައި ތަރައްގީގެ ސަފުން ބާކީވެފައި ތިބި ރައްޔިތުންނަށް އެމަނިކުފާނު ދެއްވި އުއްމީދެކެވެ. ފާއިތުވި ދުވަސްތަކުގައި ވެސް މިފަދަ އެތައް ކަމެއް ވަނީ ކޮށްނިމިފައެވެ.