1 މިލިއަން ފަތުރުވެރިން ގެނަމުގެ އަމާޒު: ނުވަ ލައްކަ ފަސްދޮޅަސް ހާހަށްވުރެ ގިނަ ފަތުރުވެރިން އަތުވެއްޖެ

މިއަހަރުގެ މިހާތަނަށް ރާއްޖެ އައި ފަތުރުވެރިންގެ އަދަދު 960،000 އިން މައްޗަށް އަރައިފިއެވެ.

ޓުއަރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން މިހިނގާ އޮކްޓޯބަރު މަހުގެ 1ން 21ށް 91،628 ފަތުރުވެރިއަކު ވަނީ ރާއްޖެ އައިސްފައެވެ. މިމަހު ދުވާލެއްގެ މައްޗަށް 4،363 ފަތުރުވެރިން އައިސްފައިވާ ކަމަށް ވަނީ ރެކޯޑުކުރެވިފައެވެ.

މިއާއެކު މިއަހަރުގެ މިހާތަނަށް ރާއްޖެ އައި ފަތުރުވެރިންގެ އަދަދު 962،490 އަށް އަރާފައިވާކަމަށް ޓުއަރިޒަމް މިނިސްޓްރީން ބުނެފައިވެއެވެ. މިއަހަރުގެ މިހާތަނަށް ރާއްޖެ އައި ފަތުރުވެރިންގެ އެންމެ ބޮޑު ބައެއް ހިއްސާކުރަނީ އިންޑިއާ މާކެޓުންނެވެ. އިންޑިއާ މާކެޓުން 22.8 އިންސައްތަ ހިއްސާކުރާއިރު އެ މާކެޓުން އައި ފަތުރުވެރިންގެ އަދަދު 219،381 އަށް އަރައެވެ. ދެވަނައަށް އެންމެ ބޮޑު ބައެއް ހިއްސާކުރަނީ ރަޝިއާ މާކެޓުންނެވެ. އެއީ 18.8 އިންސައްތައާއެކު 180،517 ފަތުރުވެރިންނެވެ. ތިންވަނައިގައި 6.7 އިންސައްތަ ހިއްސާއާއެކު ހިމެނެނީ ޖަރުމަނު މާކެޓެވެ. އެ މާކެޓުން 64،200 ފަތުރުވެރިން އައިސްފައިވެއެވެ.

މިއަހަރު އެންމެ ގިނަ ފަތުރުވެރިން އައިސްފައިވަނީ އޮގަސްޓު މަހުއެވެ. އެއީ 143،599 ފަތުރުވެރިންނެވެ. އަދި ސެޕްޓެމްބަރު މަހު 114،896 ފަތުރުވެރިން އައިސްފައިވާކަމަށް ވަނީ ރެކޯޑުކޮށްފައެވެ. ތިންވަނައަށް އެންމެ ގިނަ ފަތުރުވެރިން އައީ މާޗް މަހުއެވެ. އެއީ 109،585 ފަތުރުވެރިންނެވެ.

ރާއްޖޭގައި މިވަގުތު ހުރި 1،107 ޓުއަރިސްޓް އެކޮމޮޑޭޝަން ފެސިލިޓީތަކުގެ ތެރެއިން މިވަގުތު ޚިދުމަތް ދެމުންދަނީ 893 ތަނަކުން ކަމަށް ޓުއަރިޒަމް މިނިސްޓްރީން ހާމަކޮށްފައިވެއެވެ. އަދި 55،921 ބެޑް ކެޕޭސިޓީ ހުރިއިރު 51،276 އެނދު ޚިދުމަތަށް ހުޅުވާލާފައިވާކަމަށް ޓުއަރިޒަމް މިނިސްޓްރީން ބުނެފައިވެއެވެ. މީގެތެރޭގައި ހިމެނެނީ 157 ރިސޯޓަކުން 36،974 އެނދާއި، 592 ހޮޓާ އަދި ގެސްޓްހައުސްއިން 11،456 އެނދުގެ އިތުރުން 144 ސަފާރީއަކުން 2،846 އެނދެވެ.

ރާއްޖެއިން ވަނީ ކޮވިޑް-19ގެ ހާލަތުގައިވެސް ރައްކާތެރިކަމާއެކު ރާއްޖެ ފަތުރުވެރިކަމަށް ހުޅުވާލާފައެވެ. އަދި ރާއްޖެއިން ވަނީ މިއަހަރުގެ ވޯލްޑް ޓްރެވަލް އެވޯޑްސްއިން އިންޑިއަން އޯޝަން ކެޓެގަރީން 4 އެވޯޑެއް ހާސިލްކޮށްފައެވެ. އެއީ އިންޑިއަން އޯޝަން ލީޑިންގ ޑެސްޓިނޭޝަން އެވޯޑް، އިންޑިއަން އޯޝަން ލީޑިންގ ބީޗް ޑެސްޓިނޭޝަން އެވޯޑް، އިންޑިއަން އޯޝަން ލީޑިންގ ޑައިވް ޑެސްޓިނޭޝަން އެވޯޑް އަދި އިންޑިއަން އޯޝަން ލީޑިން ޓުއަރިސްޓް ބޯޑް އެވޯޑެވެ.

ފަތުރުވެރިކަމުގެ ސިނާއަތުގައި ރާއްޖެއިން ކުރިއެރުންތައް ހޯދަމުން އަންނައިރު، މިއަހަރު ނިމުމުގެ ކުރިން 1 މިލިއަނަށްވުރެ ގިނަ ފަތުރުވެރިން ރާއްޖެ ގެނައުމީ ސަރުކާރުގެ އަމާޒެކެވެ. މިއަހަރު ނިމުމުގެ ކުރިން މި އަމާޒަށް ވާސިލްވާނެ ކަމަށް ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެފައިވެއެވެ.