ކަރެކްޝަންސްގެ ލޭބަރ ފޯސް އިތުރަށް ޕްރޮފެޝަނަލް ކުރުމަށް ގިނަ މަސައްކަތްތަކެއް ކުރަންޖެހިފައިވާ ކަމަށް ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅު ވިދާޅުވެއްޖެއެވެ.
މޯލްޑިވްސް ކަރެކްޝަނަލް ސަރވިސް (އެމްސީއެސް) ގެ އިންސްޓިޓިއުޓް ފޯރ ކަރެކްޝަނަލް ސްޓަޑީޒް (އައިކޯސްޓް) އިން މިޑްލް މެނޭޖްމަންޓް ލެވެލްގެ އޮފިސަރުން ތާޒާކުރުމަށާއި ތަރައްޤީކުރުމަށް ކުރިއަށްގެންދިޔަ ”މިޑްލް މެނެޖަރސް ރިފްރެޝަރ” ޕްރޮގްރާމް ނިންމުމުގެ ރަސްމިއްޔާތުގައި ވާހަކަ ދައްކަވަމުން ކޮމިޝަނަރ ވިދާޅުވީ ހަލުވިކަމާ އެކު ބަދަލުވަމުންދާ މާހައުލުގައި އުފެދޭ މައްސަލަތަކަށް ހައްލުހޯދޭނެ ޤާބިލު މުވައްޒަފުންތަކެއް މުވައްސަސާގައި ތިބުމަކީ ކޮންމެހެން ވެސް ބޭނުން ތެރިކަމެއް ކަމަށާއި އަދި މުވައްޒަފުންގެ މެދުގައި ހެޔޮގޮތުގައި ކުރިއަރާ ދިއުމުގެ ވާދަވެރި ރޫހެއް އުފަންކުރަންޖެހޭ ކަމަށާއި ލިބެން ހުރި ވަސީލަތްތަކާއި، ފުރުޞަތުގެ ބޭނުން ހެޔޮގޮތުގައި ހިފައި އެންމެ ފުރިހަމަ ނަތީޖާ ނެރެ ދެއްކުމަށް މިހާރަށް ވުރެ ބޮޑަށް މަސައްކަތް ކުރަން ޖެހިފައިވާ ކަމަށް ވިދާޅުވިއެވެ.
މީގެ އިތުރުން މުވައްސަސާގައި ތަޢުލީމީ ޤާބިލުކަން އިތުރު ކުރަންޖެހިފައިވާ ކަމަށާއި ތަފާތު ފަންނުތަކުގެ ދާއިރާތަކުން ޢިލްމީ، ޤާބިލު މީހުން މިމުވައްސަސާއަށް ބޭނުންވާ ކަމުގައި ފާހަގަ ކުރެވިފައެވެ. އަދި މިވަގުތު މުވައްސަސާގައި މަސައްކަތް ކުރާ މެނޭޖީރިއަލް މަޤާމުތަކަށް ބަލާއިރު 22.7 އިންސައްތައަކީ ގުރޭޖުވޭޓުން ކަމަށާއި، އަދި މިޑްލް މެނޭޖްމަންޓުގެ މަޤާމުތަކުގައި ގްރޭޖުވޭޓުންގެ އަދަދު ހުރީ 4.3 އިންސައްތާގައި ކަމަށާއި އަދި ޖޫނިއަރ ލެވަލްގެ މަޤާމްތަކުގައި ގްރޭޖުވޭޓުންގެ ނިސްބަތް ހުރީ 2 ޕަސަންޓުގައި ކަން ފާހަގަ ކުރައްވައި ވިދާޅުވީ މިއަދަދުތަކަށް ބެލުމުން މުވައްސަސާގެ ލޭބަރ ފޯސް އިތުރަށް ޕްރޮފެޝަނަލް ކުރުމަށް ގިނަ މަސައްކަތްތަކެއް ކުރަންޖެހިފައިވާ ކަމަށް ދެކިވަޑައިގަންނަވާ ކަމަށެވެ.
މީގެ އިތުރުން ތަޖުރިބާއަކީ މިހާރު ދެގޮތަކަށް ވަޒަން ކުރާ ކަމެއްކަމަށާއި އެގޮތުން ކަމެއްގެ ފަންނުވެރިކަން ކިޔަވާ އަދި ފުރިހަމަ މަޢުލޫމާތާއި ޢިލްމު ހޯދައިގެން ކުރާ މަސައްކަތުގެ ނަތިޖާއިން އައު އީޖާދީ ހިޕޔާލުތަކާ އެކު ކަންކަމަށް އަވަސް ހައްލު ހޯދޭނެ ކަމަށާއި އަދި ވިސްނުންތެރި ލޭބަރ ފޯސްއެއް ބިނާކުރުމަށް އިތުރަށް މަސައްކަތް ކުރަންޖެހޭ ކަމުގައި ފާހަގަ ކުރެއްވިއެވެ. އަދި މި ރިފްރެޝައިން ހާޞިލް ކުރެވުނު މަޢުލޫމާތާއި ހުނަރުން ޢަމަލީ މައިދާނުގައި އެކަންކަން ދައްކުވައި ދެއްވުމަށް ކޮމިޝަނަރ އެދިވަޑައިގެންނެވިއެވެ.
އެމްސީއެސްގެ މަސައްކަތްތަކަށް ފާރަވެރިވުމަށް ގިނަ ވުޒާރާތަކާއި ނިޒާމުތައް އުފެދިފައިވާކަމަށާއި، މިނިޒާމްތަކަށް ޖަވާބުދާރީވުމާ އެކު ޤާއިދީންނާއި ބަންދުމީހުންގެ ކަންކަން ހަމަޖެއްސުމަށް ކުރަންޖެހޭ މަސައްކަތް އިތުރަށް ދެގުނަ ވެގެން އަންނަކަމަށެވެ. އެހެންކަމުން މަސައްކަތުގެ ފެންވަރު ރަނގަޅުކޮށް ހަލުވިކުރުމަށް ކުރެވެން ހުރި މަސައްކަތްތައް ކޮށްދިނުމަށާއި، ކަންކަމުގެ ހައްލު ކޮންމެފަހަރަކު މަތިން ތިރިއަށް ދާނެ ކަމަށް ނުބައްލަވާ ތިރިން މައްޗަށް ވެސް ކަންކަމުގެ ހައްލު ފޮނުއްވައިދެއްވުމަށް އެދި ވަޑައިގެންނެވިއެވެ.
05 ދުވަހުގެ މުއްދަތަށް ކުރިއަށް ގެންދިޔަ މި ޕްރޮގްރާމްގައި އެކި ޖަލުތަކުން ޖުމްލަކޮށް 18 ޕްރިޒަން އޮފިސަރުން ވަނީ ބައިވެރިވެފައެވެ. މި ޕްރޮގްރާމްގެ މައިގަނޑު މަޤްޞަދުތަކަކީ އަސާސީ ތަމްރީނުގައި ކިޔަވައިދެވިފައިވާ މާއްދާތައް އަލުން މުރާޖަޢާކޮށް، މޯލްޑިވްސް ކަރެކްޝަނަލް ސަރވިސްގެ ޤަވައިދުތަކާއި އުޞޫލުތަކަށް އަހުލުވެރިކޮށް، ޤައިދީންނާއި ބަންދުމީހުންނަށް ފޯރުކޮށްދޭންޖެހޭ ޚިދުމަތްތައް ވީ އެންމެ ފުރިހަމައަށް ފޯރުކޮށްދިނުމަށް ބާރުއަޅައި، ޖަލުތަކުގެ މަސައްކަތްތަކަށް އައިސްފައިވާ ބަދަލުތަކާއި ހިންގުންތެރިކަމުގެ ހުނަރުތައް ދަސްކޮށްދީ، އަހުލުވެރިކުރުމާއި ތަޢުލީމު އުނގެނުމާއި ތަމްރީނު ފުރިހަމަކުރުމުގެ މުހިއްމުކަމުގެ އިތުރުން އޮފިސަރުންނަކީ ރިވެތި އަޚުލާގު ހުންނަ، ހަށިހެޔޮ އަދި ދުޅަހެޔޮ ބައެއްގެ ގޮތުގައި ތިބެންޖެހޭނެ ބައެއްކަން އަންގައިދިނުމެވެ.
ޕްރޮގްރާމް ނިންމުމުގެ މި ރަސްމިއްޔާތު ޝަރަފްވެރި ކޮށްދެއްވީ ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅުއެވެ. ކޮމިޝަނަރގެ އިތުރުން ޑެޕިއުޓީ ކޮމިޝަނަރ އޮފް ޕްރިޒަންސް އަލް އުސްތާޛް އިބްރާހިމް މުޙައްމަދު ދީދީއާއި އެސިސްޓަންޓް ކޮމިޝަނަރ އޮފް ޕްރިޒަންސް މުޙައްމަދު އާޞިފްގެ އިތުރުން މާފުށީ ޖަލުގެ ޑައިރެކްޓަރ އެސިސްޓަންޓް ސުޕްރިންޓެންޑަންޓް އޮފް ޕްރިޒަންސް އަޙްމަދު ޖާދުﷲ އާއި ސީނިއަރ މެނޭޖްމަންޓް އަދި އައިކޯސްޓްގެ ޑެޕިއުޓީ ޑައިރެކްޓަރ ސީނިއަރ ޕްރިޒަން އޮފިސަރ އަޙްމަދު ލުޤްމާން މި ރަސްމިއްޔާތުގައި ބައިވެރިވެވަޑައިގެންނެވިއެވެ.
