ރައީސްގެ އއ. ދަތުރުފުޅު: ބޮޑުފޮޅުދޫ މިސްކިތް ރަސްމީކޮށް ރައީސް ހުޅުވައިދެއްވައިފި

ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވައުދުވެވަޑައިގެންނެވި ގޮތަށް ބޮޑުފޮޅުދޫގައި އިމާރާތްކުރެއްވި މިސްކިތް ރަސްމީކޮށް ހުޅުވައި ބޭނުން ކުރަން ފަށައިފިއެވެ.

ބޮޑުފޮޅުދޫގައި މި ސަރުކާރުން އިމާރާތްކުރި މިސްކިތް ރަސްމީކޮށް ހުޅުވައިދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙެވެ. އއ. އަތޮޅުގެ 6 ރަށަކަށް ކުރައްވަމުން ގެންދަވާ ދަތުރުފުޅުގެ ތެރެއިން ބުރާސްފަތި ދުވަހު މެންދުރު ބޮޑުފޮޅުދޫއަށް ވަޑައިގެން އެންމެ ފުރަތަމަ އެމަނިކުފާނު ކުރެއްވި ކަމަކީ މިސްކިތް ހުޅުވައިދެއްވައި މިސްކިތުގައި މެންދުރު ނަމާދު ކުރެއްވުމެވެ.

މި މިސްކިތަކީ 300 މީހުންގެ ޖާގައިގެ މިސްކިތެކެވެ. ފުރަތަމަ މި މަސައްކަތް ހަވާލު ކުރި ކުންފުނިން މަސައްކަތް ނުނިންމާ ލަސްވުމުގެ ސަބަބުން ފަހުން ހައިމަން ކޮންސްޓްރަކްޝަނާއި މި މަސައްކަތް ހަވާލުކުރިއެވެ. މިސްކިތް އިމާރާތްކުރަން ފުރަތަމަ މާރިސް ކުންފުންޏާ ހަވާލުކުރީ 4.3 މިލިއަން ރުފިޔާއަށެވެ. އެއްބަސްވުމުގައިވާ ގޮތުން އެމަސައްކަތް ނިންމަން ޖެހެނީ 210 ދުވަސް ތެރޭގައެވެ.

ނަމަވެސް މަސައްކަތުގެ 20 އިންސައްތަ މަސައްކަތް ނިންމުމަށްފަހު އެ ކުންފުނިން މަސައްކަތް ކުރިއަށް ނުގެންދާތީ އަލުން ހައިމަން ކޮންސްޓްރަކްޝަނާ މި މަސައްކަތް ހަވާލު ކުރީ 3.7 މިލިއަން ރުފިޔާއަށް 180 ދުވަހުގެ ތެރޭގައި ނިންމާ ގޮތަށެވެ.

މި ރަސްމިއްޔާތުގައި ވާހަކަ ދައްކަވަމުން އިސްލާމިކް މިނިސްޓަރ ޑރ. އަޙްމަދު ޒާހިރު ވިދާޅުވީ މިސްކިތްތަކަކީ ހުރިހާ އެންމެން ބަލަހައްޓަން ޖެހޭ ތަނެއް ކަމަށާއި، ހުރިހާ ފަރާތްތަކުން ވެސް އެކަން ކޮށްދެއްވުމަށް އެދޭކަމަށެވެ. މީގެ އިތުރުން ކުޑަކުދިން ނަމާދުކުރަން ބާރުއަޅުއްވައި އަހުލުވެރިކުރުވުމަށް މިނިސްޓަރ ވަނީ އެދިވަޑައިގަންނަވާފައެވެ.