ޖަމްޝާދާއި ޝާރިހު ހައްޔަރުކުރީ ޑްރަގް ޓްރެފިކިންގެ މައްސަލައެއްގައި!
20 އޮކްޓޯބަރު 2021 | ބުދަ 10:59ދެ ފިރިހެނުންގެ ބަންދަށް 7 ދުވަސް ޖަހާފައިވޭ
ޖަމްޝާދާއި، ޝާރިހު، މީގެ ކުރިން ވެސް ބޮޑެތި ކުށްތައް ކޮށްފައިވާކަމުގެ ތުހުމަތުތައް ކޮށްފައިވޭ
އދ. ދަނގެތިން މުހައްމަދު ޖަމްޝާދާއި، ޝާރިހު އަލީ ހައްޔަރުކުރީ ޑްރަގް ޓްރެފިކިން މައްސަލައެއްގައިކަން ހާމަވެއްޖެއެވެ.
ރާއްޖެއެމްވީއަށް އިތުބާރުހުރި ފަރާތަކުން މައުލޫމާތު ދިން ގޮތުގައި 31 އަހަރުގެ ޖަމްޝާދާއި، 20 ޝާރިހު ހައްޔަރުކޮށްފައިވަނީ ޑްރަގް ޓްރެފިކިންގެ މައްސަލައެއްގައެވެ. ފުލުހުންގެ މީޑިއާ އޮފިސަރު ވިދާޅުވީ ބަލަމުންދާ މައްސަލަކާ ގުޅިގެން ދަނގެތިން ތިން މީހަކު ހައްޔަރު ކޮށްފައިވާ ކަމަށެވެ. އެއީ ދެ ފިރިހެނުންނާއި، އަންހެނެއް ކަމަށެވެ. އަދި އޮކްޓޫބަރު މަހުގެ 15 ވަނަ ދުވަހު ތިން މީހުންގެ ބަންދުގެ މުއްދަތު ޖަހާފައިވާ ކަމަށާއި، ދެ ފިރިހެނުންގެ ބަންދަށް 7 ދުވަސް، އަންހެން މީހާގެ ބަންދަށް 5 ދުވަސް ޖަހާފައިވާ ކަމަށެވެ.
އޮކްޓޫބަރު މަހުގެ 14 ވީ ބުރާސްފަތި ދުވަހުގެ މެންދުރުފަހުގެ ވަގުތެއްގައި ދަނގެތީގެ ވިޔަފާރިވެރިޔާ 57 އަހަރުގެ މަހުމޫދު އަބޫބަކުރު ގެއްލިގެން ހޯދަނިކޮށް ފެނުނީ ބޮލަށާއި ފަޔަށް ގޯއްޏެއް ލައްވައި، ވަޅެއްގައި އެކޮޅުކޮޅުން އެލުވާފައިވަނިކޮށެވެ. އޭނާއަށް ވަރަށް ބޮޑަށް އަނިޔާކޮށްފައިވާ ކަމުގެ ނިޝާންތައް ހަށިގަނޑުގެ ބޭރުފުށުން ފެންނަން ހުރި ކަމަށް މަންޒަރު ދުށް މީހުން ބުނެއެވެ. އަދި ވަޅުން ނެގި ވަގުތު ވަރަށް ގިނަ ލޭ ފޭބިއެވެ.
މިމަރާ ގުޅިގެން އެރަށުގެ ރައްޔިތުން ޖަމްޝާދާއި، ޝާރިހަށް ތުހުމަތު ކުރިއެވެ. އެ މައްސަލައާ ގުޅިގެން އެ ދެމީހުންގެ އިތުރުން އިތުރު އަންހެނަކަށް ހިމާޔަތް ދީގެން އދ. މަހިބަދޫ ގެންދިޔައެވެ. އަދި އެހެން މައްސަލައެއްގައި ހައްޔަރުކުރި ކަމަށް ފުލުހުން ހާމަކުރި އެވެ. ނަމަވެސް އިތުރު ތަފްސީލެއް ނުދެއެވެ.
މަހުމޫދު މަރުގެ މައްސަލައާ ގުޅިގެން އެރަށުގައި ގިނަ އަދަދެއްގެ ފުލުހުން ދަނީ ހަރަކާތްތެރިވަމުންނެވެ. ރަށުގެ އެކި ސަރަހައްދުތައް ބަންދުކޮށްފައިވާއިރު، ތަހުގީގަށް ބޮޑެތި ކުރިއެރުންތަކެއް ލިބިފައިވެއެވެ. އަދި ތަހުގީގަށް ބޭނުންވާ ބައެއް ހެކިތައް ހޯދިފައިވެއެވެ. އެގޮތުން މަހުމޫދުގެ މޯބައިލް ފޯނު ހޯދާފައިވާ ކަމަށް މައުލޫމާތު ލިބެއެވެ.
