ރައްޔިތުންގެ މަޖިލީހުގެ މިއަހަރުގެ ތިން ވަނަ ދައުރަށް ސަރުކާރުން ހުށަހަޅާނެކަމަށް ހާމަކޮށްފައިވާ 32 ބިލުގެ ތެރެއިން މިދައުރަށް މިހާތަނަށް އައިއިރު ހުށަހަޅާފައިވަނީ 4 ބިލެއްކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ބުދަ ދުވަހުގެ ޖަލްސާ ފައްޓަވަމުން ރައީސް ނަޝީދު ވިދާޅުވީ މިދައުރުގައި ދެން މިބިލްތައް ލިބޭނެކަމަށް ލަފާނުކުރެއްވޭކަމަށެވެ. އަދި މަޖިލީހަށް މިހާރު ލިބިފައިވާ ބިލްތަކުގެ މަސައްކަތް ބާރަށް ކުރިޔަށްދާކަމަށެވެ. އެގޮތުން ހެއްކާ ބެހޭ ބިލާއި މަދަނީ އިޖުރާއަތުގެ ބިލްގެ މަސައްކަތް ޖުޑީޝަރީ ކޮމިޓީން ކުރަމުންދާކަމަށް ނަޝީދު ވިދާޅުވިއެވެ. ނަޝީދު ވިދާޅުވީ މަޖިލީހުގެ ތަޅުމުގައި ކުރަންޖެހޭ މަސައްކަތްތައް މިހާރު މަދުވެފައިވާކަމަށެވެ. ބުދަ ދުވަހުގެ ޖަލްސާ 9 ޖެހިއިރު ފެށުމަށްފަހު 10:30ގައި ހުސްވަގުތުކޮޅަކަށް ދިޔުމަށްފަހު ދެން ފަށާފައިވަނީ 12 ޖެހިއިރު ވޯޓަށް އެހުމަށެވެ. ވޯޓަށް އެހުމަށް ހުރިކަންކަމަށް ވޯޓަށް އެހުމަށްފަހު ޖަލްސާ ވަނީ ނިންމަވާލައްވާފައެވެ. އާންމު ގޮތެއްގައި ވޯޓަށް އެހުން އޮންނާނީ 1 ޖަހާއިރުއެވެ. ނަމަވެސް ބުދަ ދުވަހުގެ ޖަލްސާގައި އެޖެންޑާގައި ހުރި ކަންކަން ނިމުމާއެކު 12 ޖެހިއިރު ވަނީ ވޯޓަށް އަހާފައެވެ.
އޮގަސްޓް މަހުގެ 16 ވަނަ ދުވަހު ފަށާފައިވާ މިއަހަރުގެ ތިން ވަނަ ދައުރަށް 32 ބިލެއް ހުށަހަޅާނެކަމަށް ބަންޑާރަނާއިބު އޮފީހުން ވަނީ ހާމަކުރައްވާފައެވެ. އޭގެ ތެރޭގައި ގާނޫނީ އަދި ޝަރުއީ ދާއިރާއާ ގުޅުންހުރި ބިލުތަކާއި ދީނީ އަދި އިޖްތިމާއީ ދާއިރާއާގުޅޭ ބިލުތަކާއި އިޤްތިޞާދީ އަދި ތިމާވެށީގެ ދާއިރާއާގުޅޭ ބިލުތައް ހިމެނެއެވެ. އޭގެތެރެއިން މިދައުރަށް ހުށަހަޅާފައިވާ ބިލްތަކުގެ ތެރޭގައި ހެއްކާ ބެހޭ ބިލާއި، ކާބޯތަކެތީގެ ރައްކާތެރިކަމުގެ ބިލާއި އިލެކްޓްރޯނިކް މުއާމަލާތްކުރުމާ ބެހޭ ބިލާއި ގާނޫނުލް އުގޫބާތަށް އިސްލާހު ގެނައުމަށް ހުށަހަޅާފައިވާ ބިލް ހިމެނެއެވެ.
19 ވަނަ ރައްޔިތުންގެ މަޖިލީހަށް މިހާތަނަށް އައިއިރު ސަރުކާރުން ވަނީ 102 ބިލެއް ހުށަހަޅާފައެވެ. އޭގެތެރެއިން 75 ބިލެއް މަޖިލީހުން ވަނީ ފާސްކޮށްފައެވެ. އަދި 27 ބިލެއްގެ މަސައްކަތް މަޖިލީހުގެ އެކި ކޮމިޓީތަކުގައި އަންނަނީ ކުރަމުންނެވެ. އޭގެތެރޭގައި 2019 ވަނަ އަހަރު މަޖިލީހަށް ހުށަހަޅާފައިވާ ބިލްތައް ވެސް ހިމެނެއެވެ. އެގޮތުން ޖަމިއްޔާތަކުގެ ބިލާއި އެއްމެދު އިމާރާތްކުރުމުގެ ބިލް އަދި ގައުމީ ޗެމްބަރ އޮފް ކޮމާސް އެންޑް އިންޑަސްޓްރީ ބިލް ހިމެނެއެވެ.
ސަރުކާރުން މިދައުރަށް ހުށަހަޅާނެކަމަށް ހާމަކޮށްފައިވާ 32 ބިލުގެ ތެރޭގައި ކުރީ ދައުރުތަކަށް ހުށަހަޅާނެކަމަށް ހާމަކޮށްފައިވާ މުހިންމު ބިލުތައް ވެސް ހިމެނެއެވެ. އޭގެތެރޭގައި އަބުރާބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނުމުގެ ބިލާއި، މޯލްޑިވްސް މީޑިއާ އެންޑް ބްރޯޑްކާސްޓިންގ އޮތޯރިޓީގެ ބިލާއި، ޤާނޫނީ އެހީތެރިކަން ފޯރުކޮށްދިނުމުގެ ބިލް ފާހަގަކޮށްލެވެއެވެ.
މީގެއިތުރުން މިދައުރަށް ހުށަހަޅާނެކަމަށް ސަރުކާރުން ހާމަކޮށްފައިވާ މުހިންމު ބިލްތަކުގެ ތެރޭގައި އިންޑަސްޓްރިއަލް ރިލޭޝަންގެ ބިލާއި މަސައްކަތުގެ މާހައުލުގެ ސަލާމަތާއި ރައްކާތެރިކަމުގެ ބިލް ހިމެނެއެވެ. މިއީ މިއަހަރުގެ މޭޑޭ އާ ދިމާކޮށް އިކޮނޮމިކް މިނިސްޓަރ ފައްޔާޒު އިސްމާއީލް މިއަހަރު މަޖިލީހަށް ހުށަހަޅާނެކަމަށް ހާމަކޮށްފައިވާ ބިލްތަކެއް ވެސް މެއެވެ.
މިދައުރުގެ ޖަލްސާތައް ނޮވެމްބަރ މަހުގެ ނިޔަލަށް ކުރިޔަށްދާއިރު ސަރުކާރުން މިހާރު ތައްޔާރުވަމުން އަންނަނީ އަންނަ އަހަރަށް ލަފާކުރާ ދައުލަތުގެ ބަޖެޓް ރައްޔިތުންގެ މަޖިލީހަށް ހުށަހެޅުމަށެވެ. އެގޮތުން އޮކްޓޯބަރ މަހުގެ 31ގެ ކުރިން ބަޖެޓް ހުށަހަޅުއްވާނެކަމަށް ފިނޭންސް މިނިސްޓަރ އިބްރާހީމް އަމީރު ވަނީ ވިދާޅުވެފައެވެ.
