100 ކިލޯގެ ހެރޮއިންގެ މައްސަލައިގައި ހައްޔަރުކުރި 10 މީހުންގެ ތެރެއިން 2 މީހަކު ދޫކޮށްލުމަށް ކްރިމިނަލް ކޯޓުން ނިންމި ނިންމުން އިސްތިއުނާފުނުކުރުމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ނިންމައިފިއެވެ.

ޑްރަގް އެންފޯސްމެންޓް ޑިޕާޓްމެންޓާއި ޑްރަގް އިންޓެލިޖެންސާއި މެރިން ޕޮލިސް އަދި ފޮރެންސިކް ޓީމުން ހިންގި އޮޕަރޭޝަނެއްގައި 100 އެއްހާ ކިލޯގެ ހެރޮއިން އަތުލައިގެންފައިވާއިރު، މި މައްސަލައިގައި 10 މީހަކު ހައްޔަރުކުރިއެވެ. އޭގެ ތެރެއިން 2 މީހަކު ކްރިމިނަލް ކޯޓުން ވަނީ ދޫކޮށްލާފައެވެ.

އެކަމާ ގުޅޭގޮތުން ޕީޖީ އޮފީހުން ބުނީ، އިސްތިއުނާފުނުކުރުމަށް ނިންމި ނިންމުން ބިނާވަނީ 2 ސަބަބެއްގެ މައްޗަށް ކަމަށެވެ. އެގޮތުން ހައިކޯޓު މަރުޙަލާގައި އިތުރު ހެކި ހުށަހެޅުމުގެ ފުރުޞަތު ނޯންނާނެތީއާއި، ދަށުކޯޓަށް ހުށަހެޅުނު ހެކި ޤަރީނާގެ މައްޗަށް ބަލައި ބަންދުން ދޫކޮށްލި އަމުރު އިސްތިއުނާފު ކޮށްގެން ވަކި ތަފާތު ނަތީޖާއެއް ނެރެވިދާނެކަމަށް ނުފެނުން އެއީ އެއް ސަބަބެއްގެ ގޮތުގައި ޕީޖީ އޮފީހުން ފާހަގަކުރިއެވެ.

އޭގެ އިތުރުން، މި ދެމީހުންގެ މައްޗަށް އިތުރު ހެކި ޤަރީނާ ހޯދިއްޖެނަމަ ހައްޔަރުކުރުމުގެ އައު އަމުރަކަށް އެދި ދަށުކޯޓަށް ހުށަހެޅުމުގެ ފުރުޞަތު އޮންނާނެކަން ވެސް ޕީޖީ އޮފީހުން ވަނީ ފާހަގަކޮށްފައެވެ.

އެކަމާ ގުޅޭ ފަހުގެ މައުލޫމާތުތައް ހިއްސާކޮށް ފުލުހުން ބުނީ، މި މައްސަލައާ ގުޅިގެން ހައްޔަރުކޮށްފައިވަނީ 19 އަހަރުގެ މީހަކާއި 24 އަހަރުގެ ދެ މީހުންނާއި 25 އަހަރުގެ މީހަކާއި، 26 އަހަރުގެ މީހަކާއި، 27 އަހަރުގެ މީހަކާއި، 30 އަހަރުގެ މީހަކާއި، 34 އަހަރުގެ މީހަކާއި، 35 އަހަރުގެ މީހަކާ އަދި 61 އަހަރުގެ މީހެއް ކަމަށެވެ. އެގޮތުން މި މީހުންގެ ތެރޭގައި ހިމެނެނީ 8 ދިވެހިންނާއި ދެ ބިދޭސިންކަން ފާހަގަކޮށް ފުލުހުން ބުނީ މި އެންމެންނަކީ ވެސް ފިރިހެނުން ކަމަށެވެ.

މި މައްސަލައާ ގުޅިގެން ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ހަތަރު މީހެއްގެ ބަންދަށް 15 ދުވަސް ތިން މީހެއްގެ ބަންދަށް 10 ދުވަސް އަދި އެކަކަށް ފަސް ދުވަހުގެ މުއްދަތު ދީފައިވެއެވެ. ކޯޓުން ދޫކޮށްލާފައިވަނީ މިކަމުގައި އިސްކޮށް އުޅުނުކަމުގެ ތުހުމަތު ކުރެވޭ ދެ މީހުންނެވެ.