މިދިޔަ އަހަރު ބޯޑަރު ހުޅުވިފަހުން، އެއްދުވަހެއްގެ މައްޗަށް އެންމެ ގިނަ ފަތުރުވެރިން އައީ އޮކްޓޯބަރު 16 ވަނަ ދުވަހު
އޮކްޓޯބަރު 16 ވަނަ ދުވަހު 6،197 ފަތުރުވެރިން ރާއްޖެއައިސްފައިވޭ
ފަތުރުވެރިންތަކެއް އެއާޕޯޓުގައި
މިދިޔަ އަހަރުގެ ޖުލައި 15 ވަނަ ދުވަހު ރާއްޖޭގެ ބޯޑަރު ހުޅުވިފަހުން އެއްދުވަހެއްގެ މައްޗަށް އެންމެ ގިނަ ފަތުރުވެރިން އައީ އޮކްޓޯބަރު 16 ވަނަ ދުވަހު ކަމަށް ޓޫރިޒަމް މިނިސްޓްރީން ބުނެފިއެވެ.
ޓޫރިޒަމް މިނިސްޓްރީން ބުނީ އޮކްޓޯބަރު 16 ވަނަ ދުވަހު ރާއްޖެއަށް 6،197 ފަތުރުވެރިން އައިސްފައިވާ ކަމަށެވެ. އަދި ރާއްޖޭގައި ފަތުރުވެރިކަން އަލުން އަނބުރާ ކޮޅަށް ޖެހުމަށްޓަކައި މަސައްކަތް ކުރާ ހުރިހާ އެންމެންނަށް އެ މިނިސްޓްރީން ވަނީ މަރުހަބާ ކިޔާފައެވެ.
މިނިސްޓްރީން މިހެން ބުނެފައިވާއިރު އަހަރުގެ މިހާތަނަށް ރާއްޖެ އައި ފަތުރުވެރިންގެ އަދަދު ވަނީ 9 ލައްކައަށްވުރެ އިތުރުވެފައެވެ. ޓޫރިޒަމް މިނިސްޓްރީން އާންމުކުރި ތަފާސްހިސާބުތައް ދައްކާގޮތުން މި ހިނގާ އޮކްޓޯބަރު މަހުގެ 13 ވަނަ ދުވަހުގެ ނިޔަލަށް މި އަހަރު ރާއްޖެ އައި ފަތުރުވެރިންގެ އަދަދު ވަނީ 923،146 އަށް އަރާފައެވެ. ރާއްޖެއަށް ފަތުރުވެރިން އަންނަ މާރކެޓްތަކުގެ ތެރެއިން އެންމެ ކުރީގައި އުޅެނީ އިންޑިއާ މާރކެޓެވެ. އިންޑިއާއިން 211،062 ފަތުރުވެރިން މިހާތަނަށް ރާއްޖެ އައިސްފައިވެއެވެ. 177،321 ފަތުރުވެރިންނާއެކު ރަޝިއާ އޮތީ ދެވަނައިގައެވެ. އަދި 60،463 ފަތުރުވެރިންނާއެކު ޖަރުމަނުވިލާތް ހިމެނެނީ ތިންވަނައިގައެވެ.
މި ހިނގާ އޮކްޓޯބަރު މަހުގެ 1ން 13ށް ރާއްޖެ އައިސްފައިވަނީ 52،284 ފަތުރުވެރިން ކަމަށް ޓޫރިޒަމް މިނިސްޓްރީން ހާމަކޮށްފައިވެއެވެ. މިއީ 2019 ވަނަ އަހަރުގެ މި މުއްދަތާ އަޅައިބަލާއިރު 11 އިންސައްތައިގެ ދަށްވުމެކެވެ. އަދި 2020 ވަނަ އަހަރުގެ މި މުއްދަތާ އަޅައިބަލާއިރު 585.8 އިންސައްތައިގެ ކުރިއެރުމެކެވެ. މި މުއްދަތުގައި ދުވާލެއްގެ މައްޗަށް 4،022 ފަތުރުވެރިން އަންނަކަމަށް ރެކޯޑުކުރެވިފައިވާއިރު، އެމީހުން 8 ދުވަހު ރާއްޖޭގައި މަޑުކުރާ ކަމަށް ޓޫރިޒަމް މިނިސްޓްރީން ބުނެފައިވެއެވެ.
ރާއްޖޭގެ ފަތުރުވެރިކަން އިތުރަށް ފުޅާކުރުމަށް އަންނަ އަހަރު ހޯމް ސްޓޭ ޓޫރިޒަމް ފަށަން ސަރުކާރުން ވަނީ ނިންމާފައެވެ. މިކަމުގެ ސަބަބުން ފަތުރުވެރިކަމުގެ ޚިދުމަތަށް އިތުރު އެނދުތައް އަންނާނެ ކަމަށް ޓޫރިޒަމް މިނިސްޓަރ ޑރ. ޢަބްދުﷲ މަޢުޞޫމް ވަނީ ވިދާޅުވެފައެވެ. އަދި ހޯމް ސްޓޭ ޓޫރިޒަމް އިޝްތިހާރުކުރުމުގެ މަސައްކަތްތައް ފަށަން ތައްޔާރުވެފައިވާކަމަށާއި، މީގެ ސަބަބުން އަތޮޅުތެރެއަށް އިތުރު ކުރިއެރުންތަކާއި، ފައިދާތައް ލިބިގެންދާނެ ކަމަށް ވިދާޅުވިއެވެ. އަދި ކުޑަ އަގެއްގައި ރާއްޖޭގައި ޗުއްޓީ ހޭދަކޮށްލުމަށް އަންނަ ފަތުރުވެރިންގެ އަދަދު ވެސް އިތުރުވެގެންދާނެއެވެ.
