ނުރައްކާތެރި ހާދިސާއެއް، ބ. އަތޮޅަށް ދަތުރުކުރި ބޯޓަކުން ޒުވާނަކު ކަނޑަށް ވެއްޓިގެން ހޯދަނީ!
18 އޮކްޓޯބަރު 2021 | ހޯމަ 07:40ކަނޑަށް ވެއްޓުނީ 25 އަހަރުގެ ޒުވާނެއް
އެމްއެންޑީއެފްގެ ކޯސްޓްގާޑް ކަނޑުމަތީގައި ހަރަކާތްތެރިވަނީ،
ބ. އަތޮޅަށް ދަތުރުކުރި ބޯޓަކުން ޒުވާނަކު ކަނޑަށް ވެއްޓިގެން ހޯދަން ފަށައިފިއެވެ.
އެމްއެންޑީއެފުން ބުނީ ހުޅުމާލެއިން ފުރައިގެން ބ. އަތޮޅަށް ދަތުރުކޮށްފައި ދިޔަ ބޯޓަކުން 25 އަހަރުގެ ޒުވާނެއް ކަނޑަށް ވެއްޓިފައިވާ ކަމަށެވެ. އަދި އެޒުވާނާ ހޯދުމުގެ މަސައްކަތް ކޯސްޓްގާޑުން ކުރަމުންދާ ކަމަށެވެ.
އެމްއެންޑީއެފުން ބުނީ މި ބޯޓު ދަތުރުކުރީ ކާށިދޫގެ ހުޅަނގުން ހަނޯޓިކަލް މޭލު ބޭރުން ކަމަށެވެ. މިއީ މުދާ އުފުލާ ބޯޓެއް ކަމަށް އެމްއެންޑީއެފުން ބުނެއެވެ.
ކަނޑަށް ވެއްޓުނު މީހާ ލައިގެން ހުރީ ކަޅު ކުލައިގެ ޓީޝާޓަކާއި އަޅި ކުލައިގެ ޓްރެކްޝޫޓެއް ކަމަށް އެމްއެންޑީއެފްއިން ބުނެއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި މި ހާދިސާ ހިނގާފައިވަނީ ހޯމަ ދުވަހުގެ ހެނދުނު 10:45 ހާއިރުއެވެ.
މޫސުން ގޯސްވެ، ކަނޑުމަތީގެ ހިތާމަވެރި ހާދިސާތައް ދަނީ ހިނގަމުންނެވެ. އިތުރަށް ސަމާލުމަށް އިލްތިމާސްކޮށްފައިވާއިރު، މިހާރު ވެސް ކަނޑަށް ގެއްލުނު ކުޑަ ކުއްޖަކު ހޯދުމުގެ މަސައްކަތް އެމްއެންޑީއެފުން ދަނީ ކުރަމުންނެވެ.
