މަހުމޫދުގެ މަރު: ''ދާދި އަވަހަށް ގާތިލަކީ ކާކުކަން އެނގިގެންދާނެ ކަމަށް އުންމީދު ކުރެވޭ ''

އދ. ދަނގެތީގެ ވިޔަފާރިވެރިޔާ މަހުމޫދު އަބޫބަކުރުގެ މަރުގެ މައްސަލައާ ގުޅިގެން ކުރިއަށް ގެންދާ ތަހުގީގަށް ބޮޑެތި ކުރިއެރުންތަކެއް ލިބިއްޖެއެވެ.

މަހުމޫދު މަރާލި މައްސަލައިގެ ތުހުމަތުގައި ބަންގްލަދޭޝްގެ މުހައްމަދު ސާލިމް މިމަހުގެ 16 ވީ ހޮނިހިރު ދުވަހު ވަނީ ހައްޔަރުކޮށްފައެވެ. އަދި އޭނާގެ ބަންދަށް 15 ދުވަސް ވަނީ ޖަހާފައެވެ. ސާލިމްއަކީ މަހުމޫދުގެ ހަށިގަނޑު ފެނުނު ގެޔާ ޖެހިގެން ހުރި ގެއެއްގައި އުމުރުން ދުވަސްވީ މީހަކު ބަލަން ހުންނަ މީހެކެވެ.

ރާއްޖެއެމްވީއަށް އިތުބާރު ހުރި ފަރާތަކުން ވިދާޅުވީ އާދިއްތަ ދުވަހުގެ ވަގުތެއްގައި ސާލިމް، މަހުމޫދު މަރާލާފައި އޮއްވާ ފެނުނު ވަޅު ކައިރިއަށް ގެންގޮސްފައިވާ ކަމަށެވެ. ފުލުހުން ބަންދު ކޮށްފައިވާ އެކި ސަރަހައްދުތަކަށް ގެންދިޔައިރު ކޮންމެވެސް ވާހަކަތަކެއް ސާލިމް ކިޔައިދެމުންދިޔަ ކަމަށެވެ. އަދި ތަހުގީގަށް ބޭނުންވާ ބޮޑެތި ހެކިތަކެއް ހޯދިފައިވާ ކަމަށް އޭނާ ވިދާޅުވިއެވެ.

އެރަށުގެ ކައުންސިލްގެ ރައީސް މުއާވިޔަތު ރަޝީދު ވިދާޅުވީ މިމަރާ ގުޅިގެން ގިނަ އަދަދެއްގެ ފުލުހުން ރަށުގައި ހަރަކާތްތެރިވަމުންދާއިރު، ތަހުގީގަށް ބޮޑެތި ކުރިއެރުންތަކެއް ހޯދިފައިވާ ކަމަށް ގަބޫލުކުރާ ކަމަށެވެ. މުއާވިޔަތު ވިދާޅުވީ ސާލިމް ކުށަށް އިއުތިރާފްވިކަން ފުލުހުން ކަށަވަރު ކޮށްދީފައި ނުވާ ކަމަށެވެ. ނަމަވެސް ދާދި އަވަހަށް ގާތިލަކީ ކާކުކަން އެނގިގެންދާނެ ކަމަށް އުންމީދު ކުރާ ކަމަށް އޭނާ ވިދާޅުވިއެވެ.

މީގެ އިތުރުން މުއާވިޔަތު ވިދާޅުވީ ސާލިމް ދިރިއުޅުނު ގެ ހިމެނޭ ގޮތަށް އެސަރަހައްދު އެއްކޮށް ބަންދުކޮށްފައިވާ ކަމަށެވެ. އަދި މިހާރު އެސަރަހައްދާ ދުރު ރަށުގެ އެކި ހިސާބުތައް ވެސް އާއްމުންނަށް ނުވަދެވޭނެ ގޮތަށް ބަންދުކޮށްފައިވާ ކަމަށް މުއާވިޔަތު ވިދާޅުވިއެވެ. އެގޮތުން އެރަށުގައި ހުންނަ ބޮޑު ދެ ނިކަގަސް ހިމެނޭ ސަރަހައްދު ބަންދު ކޮށްފައިވާކަން އޭނާ ފާހަގަކުރެއްވިއެވެ.

އޮކްޓޫބަރު މަހުގެ 14 ވީ ބުރާސްފަތި ދުވަހުގެ މެންދުރުފަހުގެ ވަގުތެއްގައި 57 އަހަރުގެ މަހުމޫދު ގެއްލިގެން ހޯދަނިކޮށް ފެނުނީ ބޮލަށާއި ފަޔަށް ގޯއްޏެއް ލައްވައި، ވަޅެއްގައި އެކޮޅުކޮޅުން އެލުވާފައިވަނިކޮށެވެ. އޭނާއަށް ވަރަށް ބޮޑަށް އަނިޔާކޮށްފައިވާ ކަމުގެ ނިޝާންތައް ހަށިގަނޑުގެ ބޭރުފުށުން ފެންނަން ހުރި ކަމަށް މަންޒަރު ދުށް މީހުން ބުނެއެވެ. އަދި ވަޅުން ނެގި ވަގުތު ވަރަށް ގިނަ ލޭ ފޭބިއެވެ.

މަހުމޫދުގެ މަރުގެ މައްސަލައިގައި އެރަށުގެ ރައްޔިތުން އެންމެ ފުރަތަމަ ދެމީހަކަށް ތުހުމަތު ކުރިއެވެ. އެ ދެމީހުން ވެސް ތިބީ ފުލުހުން ބަންދުގައެވެ.