ކަނޑުމަތީގެ ނުރާއްކާތެރި ހާދިސާތައް ހިނގަމުންދާތީ އިތުރަށް ސަމާލުވުމަށް އިލްތިމާސްކޮށްފި
18 އޮކްޓޯބަރު 2021 | ހޯމަ 06:22ހޯމަ ދުވަހުގެ ހެނދުނުގެ ވަގުތު ވެސް ނުރައްކާތެރި ދެ ހާދިސާއެއް ހިނގާފައިވޭ
ކޯސްޓްގާޑުން ކަނޑުމަތީގައި ހަރަކާތްތެރިވަނީ،
މޫސުން ގޯސްވެ، ކަނޑުމަތީގެ ނުރާއްކާތެރި ހާދިސާތައް ހިނގަމުންދާތީ އިތުރަށް ސަމާލުވުމަށް އެމްއެންޑީއެފުން އިލްތިމާސްކޮށްފިއެވެ.
އެމްއެންޑީއެފުން ބުނީ ހޯމަ ދުވަހުގެ ހެނދުނުގެ ވަގުތު ނުރައްކާތެރި ދެ ހާދިސާއެއް މިހާތަނަށް މާލެ ސަރަހައްދުގައި ހިގައިފައިވާ ކަމަށެވެ. އެތަނުން އެއް ހާދިސާއަކީ، އެކަނި ބޯވަ ނަގަން ގޮސްއުޅުނު މީހަކު މާލޭ އުސްފަސްގަނޑާ ދިމާލުން އޮޔާދިޔަ ކަމަށެވެ. މި މީހާ ފެނިފައިވަނީ ވާދޫ ކަނޑުގެ ތެރޭގައި ފަތަމުންދަނިކޮށް އެވަގުތު އެސަރަހައްދުން ދަތުރުކުރި ބަޔަކަށް ކަމަށް އެމްއެންޑީއެފުން ބުނެއެވެ.
މައުލޫމާތު ލިބޭގޮތުގައި އެއީ ދިވެއްސެކެވެ. އޭނާ ވަނީ މޯލްޑިވްސް ޕޮލިސް ހެޑްކްއޯޓަރޒްއާ ހަވާލުކޮށްފައެވެ.
މީގެ އިތުރުން ދެވަނަ ހާދިސާއަކަށް މާރުކޭޓު ބޭރުތޮށިމަތީ މަސްބާނަން ތިބި 2 މީހުންގެ ތެރެއިން އެކަކު ތޮށިމަތިން ބޭރަށް ވެއްޓިގެން ހިނގި ހާދިސާއެވެ. މިހާދިސާގައި މޫދަށް ވެއްޓުނު މީހާ ސިފައިންގެ އެހީތެރިކަމާއެކު މޫދުން ނަގާ، ސީޕީއާރ ދީ، ޕޮލިހުންގެ އެހީތެރިކަމާއެކު ހޮސްޕިޓަލް ގެންގޮސްފައިވެއެވެ. އަދި ހޮސްޕިޓަލަށް ގެންގޮސް ފަރުވާ ދެމުންދަނިކޮށް އެމީހާ ވަނީ ނިޔާވެފައެވެ. މި ހާދިސާގައި ނިޔާވެފައިވަނީ އުމުރުން 59 އަހަރުގެ ދިވެހި ފިރިހެނެކެވެ.
އެމްއެންޑީއެފުން ބުނީ މިދުވަސްވަރަކީ ވަރަށް ކަނޑުގަދަ ވިއްސާރަ ދުވަސްވަރަކަށްވުމުން ކަނޑުދަތުރުފަތުރު ކުރާ ފަރާތްތަކާ އަދި ކަނޑާ ގުޅުންހުރި އެހެނިހެން ކަންކަމުގައި ހަރަކާތްތެރިވާ ހުރިހާ ފަރާތްތަކުން ވެސް ސަލާމަތާ ރައްކާތެރިކަމަށް އިސްކަން ދޭން ޖެހޭ ކަމަށެވެ. އަދި ވިސްނާލުމެއްނެތި ކުރާކަމަކުން ފުރާނައަށް ނުރައްކާވާ ހާލަތަށް ހުށަހެޅިގެން ދިއުމަކީ ކައިރީގައިވާ ކަމެއް ކަމަށެވެ.
އެހެންކަމުން ތިމާއާ އަނެކާގެ ސަލާމަތާ ރައްކާތެރިކަމަށް ސަމާލުކަންދީ، ފަރުދީ ޒިންމާ އަދާކުރުމަށް އެމްއެންޑީއެފުން ވަނީ އިލްތިމާސްކޮށްފައެވެ.
