ކޮމަންވެލްތު ގޭމްސްގެ ރާއްޖޭގެ ޗެފް ޑި މިޝަނަރަކަށް ޖަވާ

އަންނަ އަހަރު ބާއްވާ ކޮމަންވެލްތު ގޭމްސްގައި ދިވެހި ކޮންޓިންޖެންޓުގެ ޗެފް ޑި މިޝަނަރަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ހަމަޖައްސައިފިއެވެ.

ކޮމަންވެލްތު ގޭމްސް އޮންނާނީ އަންނަ އަހަރުގެ ޖުލައި މަހުގެ 28 ވަނަ ދުވަހުން ފެށިގެން އޯގަސްޓް މަހުގެ އަށްވަނަ ދުވަހުގެ ނިޔަލަށް އިންގްލެންޑުގެ ބާމިންހަމްގައެވެ. މި ގޭމްސްގައި ރާއްޖޭން ބައިވެރިވާ ކުޅިވަރުތައް ކަނޑައަޅާނީ އަންނަ އަހަރުގެ ކުރީކޮޅުގައެވެ.

އާދީއްތަ ދުވަހުގެ ވަގުތެއްގައި މޯލްޑިވްސް އޮލިމްޕިކް ކޮމިޓީ (އެމްއޯސީ) އިން ވަނީ ކޮމަންވެލްތު ގޭމްސްގައި ދިވެހި ކޮންޓިންޖެންޓުގެ ޗެފް ޑި މިޝަނަރަށް ޖަވާ ހަމަޖައްސާފައެވެ. މިއީ މިފަދަ ގޭމްސްއެއްގައި ޗެފް ޑި މިޝަނަރުގެ މަގާމު ޖަވާ އަދާކުރާނެ ފުރަތަމަ ފަހަރެވެ. "ރާއްޖެ.އެމްވީ" އަށް ދެއްވި އިންޓަވިއުއެއްގައި ޖަވާ ވިދާޅުވީ ކޮމަންވެލްތު ގޭމްސްގެ ރާއްޖޭގެ ޗެފް ޑި މިޝަނަރުގެ މަގާމަށް ހަމަޖެއްސުމުން ވަރަށް އުފާވާ ކަމަށެވެ. އަދި މިހާ ދުވަހު ކުޅިވަރުގެ ތެރޭގައި އުޅުނުއިރު، މިފަދަ ގޭމްސްއެއްގައި ދިވެހި ކޮންޓިންޖެންޓުގެ ކަންކަން ބަލަހައްޓަން ލިބިގެންދިޔުމަކީ ލިބޭ ފަޚުރެއް ކަމަށްވެސް ވިދާޅުވިއެވެ.

ގައުމީ ފުޓްބޯޅަ ޓީމުގެ މެނޭޖަރުކަންވެސް މީގެ ކުރިން އަދާކޮށްފައިވާ ޖަވާ އެންމެ ފުރަތަމަ އެފްއޭއެމާ ހަވާލުވީ 1999 ވަނަ އަހަރު އިދާރީ މުވައްޒަފެއްގެ ގޮތުގައެވެ. އޭގެ ފަހުން 2014 ވަނަ އަހަރު އެފްއޭއެމުގެ ކުރީގެ ރައީސް އިލްހާމް އަޙްމަދުގެ ދައުރުގައި ޖަވާ ވަނީ އެ އިދާރާގެ ޖެނެރަލް ސެކްރެޓެރީގެ މަގާމަށް އައްޔަނުކޮށްފައެވެ. އޭގެ ފަހުން އެފްއޭއެމުގެ ރައީސްގެ މަގާމަށް 2016 ވަނަ އަހަރު ބައްސާމް އަދީލް ޖަލީލް އިންތިޚާބުވެވަޑައިގަތުމަށްފަހުވެސް އެ އިދާރާގެ ޖެނެރަލް ސެކްރެޓެރީގެ މަގާމަށް އައްޔަނުކޮށްފައިވަނީ ޖަވާއެވެ.

މިހާރު އެފްއޭއެމުގެ ޖެނެރަލް ސެކްރެޓަރީގެ މަގާމު ޖެހިޖެހިގެން ދެވަނަ ދައުރަކަށް ފުރުއްވަމުން އަންނަ ޖަވާއަކީ އެ އިދާރާގެ ޖެނެރަލް ސެކްރެޓަރީގެ ޖެހިޖެހިގެން ދެވަނަ ދައުރަކަށް ކުރައްވަމުން އަންނަ ފުރަތަަމަ ބޭފުޅާއެވެ.

އަންނަ އަހަރު ބާއްވާ ކޮމަންވެލްތު ގޭމްސްގެ ރާއްޖޭގެ ޗެފް ޑި މިޝަނަރަކަށް ޖަވާ ހަމަޖެއްސިއިރު، ދުނިޔޭގެ 53 ގައުމަކުން ބައިވެރިވާ ކޮމަންވެލްތު ގޭމްސްއަކީ ދުނިޔޭގައި ބާއްވާ ކުޅިވަރުގެ އެންމެ ބޮޑު އެއް ހަރަކާތެވެ. 18 ކުޅިވަރެއްގެ 261 އިވެންޓް އޮންނަ މި ގޭމްސްގައި 4،000 ށްވުރެ ގިނަ އެތުލީޓުން ބައިވެރިވެއެވެ.

ރާއްޖެއިން 1986 ވަނަ އަހަރުން ފެށިގެން ވާދަކުރަމުން އަންނަ ކޮމަންވެލްތު ގޭމްސް އަދި ކޮމަންވެލްތު ޔޫތު ގޭމްސްއަކީ ރާއްޖޭގެ އެތުލީޓުން ދުނިޔޭގެ ފެންވަރުގެ އެތުލީޓުންނާ ވާދަކޮށްލަން ލިބޭ ރަނުގެ ފުުރުސަތެކެވެ. މި ފުރުސަތު ރާއްޖެއަށް ގެއްލުނީ 2016 ވަނަ އަހަރުގެ އޮކްޓޯބަރު މަހު ކޮމަންވެލްތުން ވަކިވާން ރާއްޖެއިން ނިންމުމާ ގުޅިގެންނެވެ. ހަތަރު އަހަރުގެ މެދުކެނޑުމަކަށްފަހު، ރާއްޖޭން އަލުން ކޮމަންވެލްތާ ގުޅުނީ މިދިޔަ އަހަރުގެ ފެބްރުއަރީ މަހުގެ އެއްވަނަ ދުވަހުއެވެ. އަދި މިދިޔަ އަހަރުގެ އޯގަސްޓް މަހުގެ ތެރޭގައި ރާއްޖެއަށް ވަނީ ކޮމަންވެލްތު ގޭމްސް ފެޑެރޭޝަނުގެ މެންބަރުކަން ލިބިފައެވެ.