ބިދޭސީން ގާނޫނީ ގޮތުން ހޭލުންތެރިކޮށް ގާނޫނީ އެހީތެރިކަން ފޯރުކޮށްދިނުމުގެ ޚާއްސަ ހަަރަކާތެއް ޕީއައިއެލްސީން ފަށައިފި

ދިވެހިރާއްޖޭގައި މަސައްކަތްކުރާ ބިދޭސީންނަށް އަމާޒުކޮށް ޤާނޫނީ ގޮތުން ހޭލުންތެރިކުރުވުމަށާއި، ޤާނޫނީ އެހީތެރިކަން ފޯރުކޮށްދިނުމުގެ މަޤުޞަދުގައި ޕަބްލިކް އިންޓްރެސްޓް ލޯ ސެންޓަރ (ޕީ.އައި.އެލް.ސީ) އިން 'މައިގްރަންޓްސް މެޓަރ' ގެ ނަމުގައި ކެމްޕެއިނެއް އިފްތިތާޙްކޮށްފިއެވެ.

މި ކެމްޕެއިންގައި މީސްމީޑިއާ މެދުވެރިކޮށް، ބިދޭސީންގެ އިތުރުން އާންމުންނަށް މަޢުލޫމާތު ފޯރުކޮށްދެވޭނެ ކަމަށް އެ ސެންޓަރުން ބުނެއެވެ. އެގޮތުން ބިދޭސީންނަށް އަމާޒުކޮށް ފޯރުކޮށްދެވޭ މައުލޫމާތުތައް އެމީހުންނަށް ފަހުމްވާނެ ގޮތަށް، ގިނަ އަދަދެއްގެ ބިދޭސީން ނިސްބަތްވާ ތިން ގައުމެއްގެ މާދަރީބަހުންނާއި އިނގިރޭސި ބަހުން މައުލޫމާތު ހިއްސާކުރެވި މީސްމީޑިއާގައި އާންމުކުރެވެމުން ދާނެއެވެ. މިގޮތުން އެއް އަހަރު ދުވަހަށް ދެމިގެންދާ މިކެމްޕޭނުގައި އިސްކަންދެވޭނީ، ބިދޭސީންނަށް ލިބެންޖެހޭ އަސާސީ ހައްޤުތަކާއި، ދިރިއުޅުމުގައި އަދި މަސައްކަތުގައި ދިމާވާ ގޮންޖެހުންތައް، ހިއުމަންޓްރެފިކިންގ (އިންސާނީ ވަގުފާރި) އަދި ލޭބަރ ވައޮލޭޝަންސްއާ ގުޅޭ މައުލޫމާތު ހިއްސާކޮށްދިނުމަށެވެ.  ހަމައެއާއެކު، މިކެމްޕޭނުގެ ދަށުން ހިލޭސާބަހަށް ޤާނޫނީ އެހީތެރިކަން ފޯރުކޮށްދިނުމަށް ލީގަލް އެއިޑް ކޭމްޕްތަކެއް ރާއްޖޭގެ 5 ރަށެއްގައި ހިންގުމަށް މިހާރު ދަނީ ތައްޔާރުވަމުންނެވެ.

މި ކެމްޕޭނަކީ އޭޝިޔާ ފައުންޑޭޝަންގެ ސްމޯލް ގްރާންޓްސް ޕްރޮޖެކްޓްގެ ދަށުން ޕަބްލިކް އިންޓަރެސް ލޯ ސެންޓަރުން ކުރިއަށް ގެންދާ "ލޭބަރ މައިގްރޭޝަން އިން މޯލްޑިވްސް ޕްރޮޖެކްޓް" ގެ ދަށުން ހިންގޭ ކެމްޕޭނެކެވެ. މި ޕްރޮޖެކްޓްގެ ދަށުން ރާއްޖޭގައި މަސައްކަތްކުރާ ދެކުނު އޭޝިޔާގެ މަސައްކަތްތެރިން، ޚާއްސަކޮށް ބަންގްލަދޭޝްގެ މަސައްކަތްތެރިންނަށް ދިމާވާ އެކިއެކި ގޮންޖެހުންތަކާއި އެއާ ގުޅޭ ހައްލުތައް ފާހަގަކޮށް، އެކްޝަން ޕްލޭނެއް ތައްޔާރުކުރުމަށް ރޭވިފައިވެއެވެ.

މީގެ އިތުރުން ފާހަގަ ކުރެވޭ މައިގަނޑު ކަންތައްތައް ރިކޮމެންޑޭޝަންތަކެއްގެ ސިފައިގައި ސަރުކާރަށް ފޯރުކޮށްދިނުމަށް ވެސް ރޭވިފައިވެއެވެ. މިގޮތުން ސަރުކާރުގެ ކަމާ ގުޅޭ މުއައްސަސާތަކާ ގުޅިގެން، އެފަރާތްތަކުން ފޯރުކޮށްދޭ މައުލޫމާތުތަކާއި ދިމާވާ ގޮންޖެހުންތަކަށް އަލިއެޅުވުމަށްފަހު، ބިދޭސީ މަސައްކަތްތެރިންނާއި ގުޅުންހުރި ކަންކަން ހައްލުކުރުމަށްޓަކައި ކުރެވެމުންދާ މަސައްކަތަށް އެހީއެއްގެ ގޮތުގައި މިޕްރޮޖެކްޓުގެ ފަރާތުން އެއްކުރެވޭ މައުލޫމާތު ވެގެންދިޔުމަކީ ޕީ.އައި.އެލް.ސީގެ އެއް އަމާޒެވެ.

އެންމެފަހުގެ އަންދާޒާގެ ދަށުން ދިވެހިރާއްޖޭގައި މިހާރު 234،000 ބިދޭސީން މަސައްކަތްތެރީންގެ ގޮތުގައި ދިރިއުޅެމުން އެބަދެއެވެ. ދިވެހިރާއްޖޭގައި ބިދޭސީންގެ ހައްޤުގައި ދިވެހިންނާއި ބިދޭސީން މީސްމީޑިއާގައި ވަކާލާތުކުރަމުންދާއިރު، ޕީ.އެލް.އައި.ސީގެ މިޕްރޮޖެކްޓަކީ، އިންސާނީ ވަގުވިޔަފާރި ހުއްޓުވުމަށް ޤައުމީ ފެންވަރުގައި ކުރާ މަސައްކަތްތަކަށާއި ބިދޭސީ މަސައްކަތްތެރިންގެ ހައްޤުތަކަށް ދާއިމީ ހައްލަކަށް ދިއުމަށް އެޅޭނެ މުހިއްމު ފިޔަވަޅެކެވެ.