ކެރެލާގެ އެކި ސަަހައްދުތަކުގައި ފެން ބޮޑުވެ، 6 މީހަކު މަރުވެއްޖެ
17 އޮކްޓޯބަރު 2021 | އާދީއްތަ 01:58ފެން ބޮޑުވެ އެތައް ބަޔަކު ގެއްލިފައިވާކަމަށް ވަނީ ރިޕޯޓުކޮށްފައި
ކެރެލާގެ ކޮޓާޔަމް ސިޓީގައި ފެން ބޮޑުވެފައި
އިންޑިއާގެ އެކި ސަރަހައްދުތަކަށް ކުރަމުންދާ ވިއްސާރައިގައި އެ ގައުމުގެ ސްޓޭޓެއް ކަމަށްވާ ކެރެލާގެ އެކި ސަރަހައްދުތަކުގައި ފެން ބޮޑުވެ، 6 މީހަކު މަރުވެފައިވާކަމަށް ރިޕޯޓުކޮށްފިއެވެ.
މި ވިއްސާރައިގެ އަސަރު އެންމެ ބޮޑަށް ކުރަމުންދަނީ ކެރެލާގެ ދެކުނަށާއި، މެދުތެރެއަށް ކަމަށް ރިޕޯޓުތައް ބުނެއެވެ. ވިއްސާރައިގައި ކެރެލާގެ ގިނަ ސިޓީތަކެއްގައި ފެން ބޮޑުވެފައިވާއިރު، ގިނަ އަދަދެއްގެ ބަޔަކު ގެއްލިގެން ހޯދުމުގެ މަސައްކަތް ވެސް ދަނީ ކުރަމުންނެވެ.
ކެރެލާ ސަރުކާރުން ވަނީ ގެއްލުނު މީހުން ހޯދުމުގެ މަސައްކަތް ކޮށްދިނުމަށް އިންޑިއާގެ އެއަރ ފޯހުގެ އެހީތެރިކަމަށް ވެސް އެދިފައެވެ. ގެއްލުނު މީހުން ހޯދުމުގެ މަސައްކަތް ކުރަމުންދާއިރު، މިހާތަނަށް އައި އިރު 6 މީހަކު މަރުވެފައިވާކަމަށް ވަނީ އިންޑިއާގެ ނޫސްތަކުން ވަނީ ރިޕޯޓުކޮށްފައެވެ.
މީގެ އިތުރުން ކޮޓާޔަމް، އިއްދުއްކީ އަދި ޕަތަނަމްތިއްޓާ ފަދަ ސަރަހައްދުތަކުގައި ފެން ބޮޑުވެފައިވާއިރު، ކޮޓާޔަމްގެ މީނާޗިލް ކޯރާއި މަނިމާލާ ކޯރު ފުރިގެން ބަންޑުންވަމުންދާކަމަށް އިންޑިއާގެ ނޫސްތަކުން ރިޕޯޓުކުރަމުންދެއެވެ.
މިއީ ސީރިއަސް ހާލަތެއް ކަމަށް ކެރެލާގެ ޗީފް މިނިސްޓަރ ޕިނަރާއީ ވިޖަޔަން ވަނީ ސިފަކުރައްވާފައެވެ. އަދި އަރަބި ކަނޑުގައި އުފެދިފައިވާ ކޮޅިގަނޑެއްގެ ސަބަބުން ކެރެލާގެ އެކި ސަރަހައްދުތަކަށް ވިއްސާރަ ކުރަމުންދާނެ ކަމުގެ އިންޒާރު އިންޑިއާގެ މީޓިއޮރޮލޮޖިކަލް ޑިޕާޓްމެންޓުން ދީފައިވާކަމަށް ވެސް ޕިނަރާއީ ވިދާޅުވިއެވެ. އެހެންނަމަވެސް އެންމެ ފަހުން ބެލި ބެލުމުން މި ހާލަތު އިތުރަށް ގޯސްވެދާނެކަމަށް ދައްކާފައި ނުވާކަމަށް އޭނާ ވިދާޅުވިއެވެ.
