މާލެ ސަރަހައްދުގައި މޫސުން ގޯސްވުމުގެ ސަބަބުން މާލެ-ވިލިގިނލި ފެރީ ދަތުރުތައް ކެންސަލުކޮށްފި
މިއީ މޫސުން ގޯސް ދުވަސްވަރަކަށް ވުމާއެކު ކަނޑުދަތުރުކުރާ ފަރާތްތަކުން މޫސުމަށް ސަމާލުވުމަށް ކަމާބެހޭ ފަރާތްތަކުން އަންނަނީ އިލްތިމާސްކުރަމުން
ވިލިމާލެ ފެރީ ޓާމިނަލް
މާލެ ސަރަހައްދުގައި މޫސުން ގޯސްވުމުގެ ސަބަބުން, މާލެއާ ވިލިނގިއްޔާ ދެމެދު ދަތުރުކުރާ ފެރީތައް, މޫސުން ރަނގަޅުވަންދެން ކެންސަލްކޮށްފައިވާކަމަށް ފެރީގެ ޚިދުމަތް ދެމުންދާ އެމްޓީސީސީން ބުނެފިއެވެ.
މިދުވަސްވަރަކީ ރާއްޖެއަށް މޫސުން ގޯސް ދުވަސްވަރަކަށް ވުމާއެކު, ކަނޑުދަތުރުކުރާ ފަރާތްތަކުން މޫސުމަށް ސަމާލުވުމަށް ކަމާބެހޭ ފަރާތްތަކުން އަންނަނީ އިލްތިމާސްކުރަމުންނެވެ.
މީގެއިތުރުން މޫސުމާބެހޭ ގައުމީ އިދާރާއިން ވަނީ މުޅި ރާއްޖެއަށް ނެރެފައިވާ ޔެލޯ އެލަރޓްގެ ވަގުތު ހޮނިހިރު ދުވަހުގެ ރޭ ދަންވަރު 12:30އާ ހަމައަށް އިތުރުކޮށްފައެވެ. މެޓް އޮފީހުން ބުނީ ވިލާގަނޑުގައި ގަޑިއަކު 55 މޭލަށް ވައިގަދަވާނެކަމަށް ލަފާކުރެވޭކަމަށެވެ. އަދި ކަނޑުތައް ވަރަށް ގަދަވާނެކަމަށް ލަފާކުރެވޭކަމަށާއި, ގަޑިއަކު 28 މޭލާއި 35 މޭލާ ދެމެދުގެ ބާރުމިނުގައި ވައިގަދަވާނެކަމަށް ލަފާކުރެވޭކަމަށްވެސް މެޓް އޮފީހުން ބުނެއެވެ.
މީގެއިތުރުން, އާދިއްތަ ދުވަހުގެ ހެނދުނު 10 ޖެހުމާ ހަމައަށް އުތުރާއި މެދުރާއްޖެތެރޭގެ އެކި ހިސާބަށް ވިއްސާރަކުރުމާއެކު ގުގުރުން އެކަށީގެންވާކަމަށެވެ. އަދި ބައެއް ރަށްތަކަށް ގަދަވަޔާއެކު ބޯކޮށް ވާރޭވެހޭނެކަމަށް ލަފާކުރެވޭކަމަށެވެ.
ވައިޖެހޭނެކަމަށް ލަފާކުރެވެނީ ހުޅަނގާއި ހުޅަނގުއުތުރުން ގަޑިއަކު 18 މޭލާ 28 މޭލާ ދެމެދުގެ ބާރު މިނުގައި ކަމަށާއި, ވިލާގަނޑުގައި ގަޑިއަކު 45 މޭލާ 55 މޭލާ ދެމެދުގެ ބާރުމިނަށް ވައިގަދަވުން އެކަށީގެންވާކަމަށް މެޓް އޮފީހުން ބުނެއެވެ.
އެ އިދާރާއިން ހާމަކުރާ ގޮތުގައި ރާޅުގެ އުސްމިން ހުންނާނެކަމަށް ބެލެވެނީ 6 ފޫޓާ 8 ފޫޓާ ދެމެދުގައެވެ. ބައެއް ރަށްތަކަށް އުދައިގެ އަސަރު ކުރުން އެކަށީގެންވާކަމަށެވެ.
ކަނޑުމަތީގެ ނުރައްކާތެރި ހާދިސާއެއްގައި ހޮނިހިރު ދުވަހު ވަނީ އަންހެނަކު ނިޔާވެފައެވެ. އަދި 4 އަހަރުގެ ކުޑަކުއްޖަކު ކަނޑަށް ވެއްޓިގެން ހޯދުމުގެ މަސައްކަތް މިހާރުވެސް އަންނަނީ ކުރަމުންނެވެ.
