ލޯންޗުން މޫދަށް ވެއްޓުނު އުމުރުން 4 އަހަރުގެ ކުޑަކުއްޖާ ހޯދުމަށް އާންމުންގެ އެހީއަށް އެމްއެންޑީއެފުން އެދިއްޖެއެވެ.

މި ހާދިސާގައި ގެއްލިފައިވަނީ ވ. ފުލިދޫއަށް ނިސްބަތްވާ އުމުރުން 4 އަހަރުގެ ޖައިޝް ޖިނާހްއެވެ. އެމްއެންޑީއެފް އިން ބުނީ ހޮނިހިރު ދުވަހު މާލެއިން ވ. އަތޮޅަށް ދަތުރުކުރި ލޯންޗަކުން 4 އަހަރުގެ ފިރިހެން ކުއްޖަކު ކަނޑަށް ވެއްޓި ގެއްލުމާ ގުޅިގެން ,އެކުއްޖާ ހޯދުމުގެ މަސައްކަތް އެމްއެންޑީއެފް ކޯސްޓްގާޑާއި އާއިލާގެ ފަރާތުން ކުރަމުންދާ ކަމަށެވެ. އަދި އެކުއްޖާއާ ބެހޭ އެއްވެސް ޚަބަރެއްވޭތޯ އެސަރަޙައްދުން ދަތުރުކުރާ އުޅަނދު ފަހަރުންނާއި އެހިސާބުގެ ރަށްތަކުން ބަލައިދިނުމަކީ ކޯސްޓްގާޑްގެ ވަރަށް ބޮޑު އެދުމެއް ކަމަށެވެ.

އެކުއްޖާއާ ބެހޭ އެއްވެސް މަޢުލޫމާތެއް ލިބިއްޖެނަމަ ލަސްނުކޮށް, ކޯސްޓްގާޑްގެ ހިލޭ ގުޅޭ ނަމްބަރު 191 ނުވަތަ 3395981 އަދި 3398898 ފޯނަށް ގުޅުމަށާއި, އަދި ފެކްސް ކުރައްވާނަމަ 3391665 ނަމްބަރަށް ފެކްސް ކުރުމަށް އެމްއެންޑީއެފް އިން އެދެއެވެ.

މި ހާދިސާ ހިނގާފައިވަނީ ޅ. އޮޅުވެލި ރިސޯޓުގެ އިރު ދެކުނުން 1 ނޯޓިކަލް މޭލުންކަމަށް ލަފާކުރެވޭ ކަމަށާއި, އެކުއްޖާ ލައިގެން ހުރީ ކަޅު ކުލައިގެ ޓީޝާޓެއް ކަމަށް އެމްއެންޑީއެފުން މައުލޫމާތުދެއެވެ.

މިހާދިސާގެ މަޢުލޫމާތު ކޯސްޓްގާޑުގެ މެރިޓައިމް ރެސްކިއު ކޯޑިނޭޝަން ސެންޓަރަށް ލިބިފައިވަނީ 17:10ގައި ކަމަށާއި, އަދި ކޯސްޓްގާޑް ޝިޕް ޝަހީދު އަލީ މިހާރު އެސަރަހައްދުގައި އެ ކުއްޖާ ހޯދުމަށް މަސައްކަތް ކުރަމުންދާ ކަމަށްވެސް ބުނެފައިވެއެވެ.

މި ހާދިސާގައި އެ އެ ލޯންޗުން މޫދަށް ވެއްޓުނު ތިން މީހުންގެ ތެރެއިން ދެ މީހުން މިހާރު ފެނިފައިވާއިރު, ފެނުނު މީހުންގެ ތެރޭގައި އެކުއްޖާގެ މަންމަ ހިމެނެއެެވެ. އެހެންނަމަވެސް ކުއްޖާގެ މަންމަ ފެނުނު އިރު އޮތީ ނިޔާވެފައެވެ. އެއީ ކ. މާލެ ގްރީންޕީކް، 33 އަހަރުގެ މަރިޔަމް ނާހިދާއެވެ.

ރާއްޖެއެމްވީއަށް ކ. ގުރައިދޫ ހެލްތު ސެންޓަރުން ބުނީ, އަންހެން މީހާ އެ ސެންޓަރަށް ގެނެސްފައިވަނީ ހޮނިހިރު ދުވަހުގެ އިރުއޮއްސި 6:35 ހާއިރު ކަމަށާއި، ގެނައި އިރުވެސް ނިޔާވެފައިވާ ކަމަށެވެ. އަދި އިތުރު ފިރިހެނެއްވެސް އެ ސެންޓަރަށް ގެނެސްފައިވެއެވެ. އޭނާގެ ބޯފަޅައިގެން ގޮސްފައިވެއެވެ.

ފުލުހުން ބުނީ މާލެއިން ވ. އަތޮޅަށް ދަތުރުކުރި ލޯންޗެއް އޮޅުވެލި ކައިރިން ދިޔަވެ އަޑިއަށް ދާކަމުގެ މައުލޫމާތު ހޮނިހިރު ދުވަހުގެ 5:06ހާއިރު ލިބިފައިވާ ކަމަށެވެ.

މިދުވަސްވަރަކީ ރާއްޖެއަށް މޫސުން ގޯސް ދުވަސްވަރަކަށް ވާއިރު ކަނޑުދަތުރުކުރާއިރު ސަމާލުވުމަށް ކަމާބެހޭ ފަރާތްތަކުން އަންނަނީ އިލްތިމާސްކުރަމުންނެވެ.