މަހްމޫދްގެ އަންހެނުން، ރައީސަށް: "އެދެނީ ރަހުމްކުޑަ ގޮތަށް ފިރިމީހާ މަރާލި މީހުން އިންސާފުގެ ކުރިމައްޗަށް ގެންނަން"
މުއުމިނާ ރައީސްގެ ކިބައިން މިފަދައިން އެދިފައިވަނީ ރައީސް އާއިލާއަށް ތައުޒިޔާ ވިދާޅުވުމަށް މުއުމިނާއަށް ގުޅުއްވުމުން
އދ. ދަނގެތީގެ ވިޔަފާރިވެރިޔާ މަހުމޫދު އަބޫބަކުރު
އދ. ދަނގެތީގެ ވިޔަފާރިވެރިޔާ މަހުމޫދު އަބޫބަކުރު ރަހުމްކުޑަ ގޮތަކަށް މަރާލާފައިވާއިރު އެދެނީ ވީހާވެސް އަވަހަކަށް ފިރިމީހާ މަރާލި މީހުން އިންސާފު ކުރިމައްޗަށް ގެނައުމަށް ކަމަށް އޭނަގެ އަންހެނުން މުއުމިނާ އުމަރު ރައީސުލްޖުމްހޫރިއްޔާ އިބްރާހީމް މުހައްމަދު ސާލިހަށް ދަންނަވައިފިއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި މުއުމިނާ ރައީސްގެ ކިބައިން މިފަދައިން އެދިފައިވަނީ ރައީސް އާއިލާއަށް ތައުޒިޔާ ވިދާޅުވުމަށް އޭނާއަށް ގުޅުއްވުމުންނެވެ.
މި ހިތާމައިގައި ބައިވެރިވެވަޑައިގަންނަވާ ކަމަށާއި, ތަހުގީގު ކުރިއަށް ގެންދަވާނެ ކަމަށް ރައީސް ވިދާޅުވެފައިވާ ކަމަށް ވެސް ވަނީ މައުލޫމާތު ލިބިފައެވެ.
ހުރިހާ ވަސީލަތްތަކެއް ބޭނުންކުރައްވައިގެން މިކަން ކުރި ބަޔަކު ހޯއްދެވުމަށް މަސައްކަތް ކުރައްވާނެ ކަމަށް ރައީސް ވިދާޅުވި ކަމަށާއި ތަހުގީގު ކުރިއަށްދާ ގޮތް އާއިލާއާ ހިއްސާ ކުރައްވާނެ ކަމުގެ ޔަގީންކަން އާއިލާއަށް ރައީސް ދެއްވިކަމަށް ރާއްޖެއެމްވީއަށް ވަނީ މައުލޫމާތު ލިބިފައެވެ.
މުއުމިނާ ވަނީ ރައީސް ގުޅުއްވުމުން އުފާ ކުރާ ކަމަށާއި އެދެނީ ރަހުމް ކުޑަގޮތަކަށް ފިރިމީހާ މަރާލި މީހުން އިންސާފުގެ ކުރިމައްޗަށް ގެނައުން ކަމަށް ރައީސް އަށް ދަންނަވާފައެވެ.
އޮކްޓޫބަރު މަހުގެ 14 ވީ ބުރާސްފަތި ދުވަހުގެ މެންދުރުފަހުގެ ވަގުތެއްގައި 57 އަހަރުގެ މަހުމޫދު ގެއްލިގެން ހޯދަނިކޮށް ފެނުނީ ބޮލަށާއި، ފަޔަށް ގޯއްޏެއް ލައްވައި، ވަޅެއްގައި އެކޮޅުކޮޅުން އެލުވާފައިވަނިކޮށެވެ. އޭނާއަށް ވަރަށް ބޮޑަށް އަނިޔާކޮށްފައިވާ ކަމުގެ ނިޝާންތައް ހަށިގަނޑުގެ ބޭރުފުށުން ފެންނަން ހުރި ކަމަށް މަންޒަރު ދުށް މީހުން ބުނެއެވެ. އަދި ވަޅުން ނެގި ވަގުތު ވަރަށް ގިނަ ލޭ ފޭބިއެވެ.
އދ. ދަނގެތީގެ ވިޔަފާރިވެރިޔާ މަހުމޫދު އަބޫބަކުރުގެ މަރުގެ މައްސަލާގައި ފުލުހުންގެ ބެލުމުގެ ދަށަށް ބިދޭސީއަކު ވަނީ ގެންގޮސްފައެވެ. ފުލުހުން ބުނީ މަހުމޫދު މަރާލި މައްސަލާގައި ތުހުމަތުގައި ބިދޭސީ ފިރިހެނަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.
