ޅަވިޔަނި ފުޓްބޯޅަ ޗެމްޕިއަންޝިޕުގައި ބައިވެރިވާން ހުޅުވާލައިފި

ޅ. ހިންނަވަރު ކޮމިއުނިޓީ ސެންޓަރުން އިސްނަގައިގެން ހިންނަވަރު ކައުންސިލާއި ގުޅިގެން ބާއްވާ "ޅަވިޔަނި ފުޓްބޯޅަ ޗެމްޕިއަންޝިޕް 2021" ގައި ބައިވެރިވުމުގެ ފުރުސަތު ހުޅުވާލައިފިއެވެ.

ހިންނަވަރު ކޮމިއުނިޓީ ސެންޓަރުން ބުނީ މި މުބާރާތަކީ ޅ. އަތޮޅުގެ ރަށްތަކަށް ހުޅުވާލައިގެން ބާއްވާ މުބާރާތެއް ކަމަށާއި، މި މުބާރާތުގައި ބައިވެރިވާ ޓީމުތަކުގައި ރަށުން ބޭރުގެ ދެ ކުޅުންތެރިން ހިމެނުމުގެ ފުރުސަތު އޮންނާނެ ކަމަށެވެ. އަދި ކޮންމެ ރަށަކުންވެސް އެއް ޓީމަށްވުރެ ގިނަ ޓީމަށް ބައިވެރިވެވޭނެ ކަމަށްވެސް ހިންނަވަރު ކޮމިއުނިޓީ ސެންޓަރުން މައުލޫމާތުދެއެވެ.

މި މުބާރާތުގެ މަގުސަދަކީ ޅ. އަތޮޅުގައި ކުޅިވަރުގެ ރޫހު އާލާކުރުމާއި، އަތޮޅުގެ ރަށްތަކުގެ ޒުވާނުންގެ މެދުގައި ކުޅިވަރުގެ ޝައުގުވެރިކަމާއި އެކުވެރިކަން އުފައްދައި، ކުޅިވަރުގެ ރީތި އާދަތަކުން އަތޮޅުގެ ރަށްތަކުގެ މެދުގައި ގުޅުން ބަދަހިކުރުމުގެ އިތުރުން، ކޮވިޑް-19 އާ ގުޅިގެން އައިސްފައިވާ ހީނަރުކަމުން މުޖުތަމައުއަށް ނިއު ނޯމަލްގައި ދިރިއުޅުމުގެ ތެރެއިން ކުޅިވަރު ކުޅުމަށް މަގުފަހިކޮށްދިނުން ކަމަށް ހިންނަވަރު ކޮމިއުނިޓީ ސެންޓަރުން ބުނެއެވެ.

މި މުބާރާތުގެ މެޗުތައް ކުޅޭނީ ހިންނަވަރު ޓާފް ދަނޑުގައެވެ. މުބާރާތުގެ ޗެމްޕިއަން ޓީމަށް 50،000 ރުފިޔާގެ ފައިސާގެ އިނާމެއް ދިނުމަށް ހަމަޖެހިފައިވާއިރު، މުބާރާތުގައި ބައިވެރިވާ ކޮންމެ ޓީމަކަށްވެސް 5،000 ރުފިޔާ ދިނުމަށް ވަނީ ކަނޑައަޅާފައެވެ.

މި މުބާރާތުގައި ބައިވެރިވުމަށް އެދި ފޯމު ހުށަހަޅަންޖެހޭ ސުންގަޑިއަކީ އަންނަ ނޮވެމްބަރު މަހުގެ ހަތަރެއްވާ ބުރާސްފަތި ދުވަހުގެރޭ 23:00 ގެ ކުރިން ހިންނަވަރު އިޖުތިމާއީ މަރުކަޒުގެ އޮފީހަށެވެ. ނުވަތަ 7513137 ފޯނު ނަންބަރަށް ވައިބާ ކުރެވިދާނެ ކަމަށްވެސް ހިންނަވަރު ކޮމިއުނިޓީ ސެންޓަރުން މައުލޫމާތުދެއެވެ.

ޅ. އަތޮޅަކީ 15،000 އަށްވުރެ ބޮޑު އާބާދީއެއް ހިމެނޭ އަތޮޅެކެވެ. އެހެންކަމުން މި މުބާރާތް ބެލުމަށް އެކި ރަށްތަކުން 2،000 އަށްވުރެ ގިނަ މީހުން ހިންނަވަރަށް އަންނާނެ ކަމަށް ހިންނަވަރު ކޮމިއުނިޓީ ސެންޓަރުން ވަނީ ލަފާކޮށްފައެވެ.