ކަމެއް ފެށިގެން އަންނައިރު އެއީ ކިހާ ވަރެއްގެ ކަމެއްކަން ހޯދުމަށް ފުލުހުން ފާރަވެރިވާން ޖެހެއެވެ. އަލިފާންގަނޑެއް އޭގެ ޒާތުގައި ބޮޑުވެ މުޅިތަން އަނދާ އަޅިއަށް ހަދާއިރު ފުރަތަމަ ފެންނާނީ ދުމެވެ. އެ ދުންގަނޑު އަރާ ހިސާބުން ދެން އަޅަން ޖެހޭ ފިޔަވަޅުތައް ނޭޅިއްޖެނަމަ ލިބޭނީ އިއާދަ ނުކުރެވޭ ވަރުގެ ބޮޑު ގެއްލުމެކެވެ. މުޖުތަމައުގައި މިފަދަ ކަންކަން ބަލާ ފާރަވެރިވާން ތިބޭ ބަޔަކީ ފުލުހުންނެވެ. ރައްޔިތުން ރިޕޯޓު ކުރިޔަސް ނުކުރިޔަސް ރައްޔިތުންނަށް ރައްކާތެރިކަމާއި, ސަލާމަތްތެރިކަން ފޯރުކޮށްދިނުމަށް ހުވާކޮށްގެން ތިބޭ ބަޔަކީ ފުލުހުންނެވެ.
އެކަން އެމަގުން ނުދާނަމަ ރައްޔިތުން އެ މުއައްސަސާއަށް އިތުބާރެއް ނުކުރާނެއެވެ. މިހާރު ވަނީވެސް އެހެންނެވެ. ވެށީގައި ކުށް ގިނަވެ, ފުލުހުންނަށް އެކަންކަން ނުބެލޭކަން ރައްޔިތުންނަށް ވަނީ ޔަގީންވެފައެވެ. ކުދި މުޖުތަމައުތަކުގައި ހިނގާ ކުށްތައް ފުލުހުންނަށް ނުބެލި މީހެއްގެ ފުރާނަ އަނިޔާވެރި ގޮތަކަށް ދުއްވާލާތާ އެތައް ގަޑިއިރެއް ފަހުން ދެން ފުލުހުން އެކްޓިވޭޓްވުމުގެ މާބޮޑު ބޭނުމެއް ވެސް ނޯވެއެވެ. އޭރު އޮންނަނީ ވާނެ ހުރިހާ ކަމެއް ވެ ނިމިފައެވެ. ކުދި އާބާދީތަކުގައި މިކަންކަން މިހެން އޮތް އިރު, ބޮޑެތި އާބާދީތަކުގައި ކަން އޮންނާނީ އަދި މިއަށްވުރެވެސް ގޯސްކޮށެވެ. އެހެންކަމުން ރައްކާތެރިކަން ލިބިދެވެނީ ކިހާވަރަކަށްތޯ މިވަނީ ސުވާލު އުފެދިފައެވެ.
ފުލުހުންގެ މަސައްކަތް ފެށެނީ މީހަކު މައްސަލއެއް ހުށަހަޅާ ހިސާބުންތޯ މީހުން ސުވާލު ކުރެއެވެ. ފުލުހުންގެ މޮޓޯ "ޓު ޕްރޮޓެކްޓް އެންޑް ސާރވް" ފެށެނީ މިހާހިސާބުން ތޯއެވެ. ކުޑަ ރަށެއްގައި ހިނގާ ދިޔަ އެކްސިޑެންޓަކާ ގުޅިގެން ހިނގާ ކަންތަކުގައި ރަށުގެ ރައްޔިތުން އެމީހާ ހަވަރަށްދީ, ހުރިހާ ކަމެއް ކުރާއިއިރު, މީހަކު މައްސަލައެއް ހުށަނާޅާތީ އެމައްސަލަ ބެލުން ފުލުހުންގެ ސިޔާސަތުގެ ތެރޭގައި ނޯންނަނީ ހެއްޔެވެ. އެކަން ހަމަ އެހެންވާން އެ ރަށެއްގައި އުޅޭ ފުލުހުން ދޫކޮށްލަނީ ހެއްޔެވެ.
ކުޑަ ރަށަކަށް ބަޔަކު ގޮސް އެރަށުގައި މަސްތުވާތަކެތީގެ ވިޔަފާރިކޮށް, އެރަށުގެ ޒުވާން ޖީލު ހަލާކު ކުރަމުންދާއިރު ބަޔަކު އެކަމުގެ ރިޕޯޓު ނުކުރާނަމަ އެކަމުގައި ފުލުހުން އެމީހުންގެ ޒިންމާ އަދާ ކުރުން ނޯންނަނީ ތޯއެވެ. މީހަކު ރިޕޯޓު ނުކުރާނަމަ ފުލުހުންނަށް ހަމަ އެކަން ނޭގެނީ ތޯއެވެ. ފުލުހުންނަށް ރައްޔިތުންގެ އިތުބާރު ގެއްލެނީ މިހެން މިކަންކަން ހިނގާތީއެވެ.
ރަށްރަށުގައި ފުލުހުން ބައިތިބައިގެން ދައުލަތުން ބޮޑެތި ޚަރަދު ކުރަނީ ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމަށެވެ. އެ ނޫން ބޭނުމެއްގައެއް ނޫނެވެ. ފުލުހުންނަކީ ހަމައެކަނި ދިވެހި ރައްޔިތުންގެ ސަލާމަތާ ރައްކާތެރި ކަށަވަރުކުރުމަށް ގާނޫނުން އެމީހުންގެ މައްޗަށް ލާޒިމް ކޮށްފައިވާ ބައެކެވެ. ހަނގުރާމައެއް ކުރަން ޖެހެނީއެއް ނޫނެވެ. ދިވެހިންގެ ސަލާމަތާ ރައްކާތެރިކަން ކަށަވަރު ނުވާނަމަ އެ ޚިދުމަތް އޮތުމުގެ ބޭނުމެއްވެސް ނެތެވެ. ރަށެއްގައި ހިނގާ ކޮންމެ ނުބައި ކަމަކާ އެރަށެއްގައި އުޅޭ ފުލުހުންނާ ގުޅުވަނީ އެކަމުގައި ކޮންމެވެސް ސަބަބެއް އޮންނާތީއެވެ. މީހުން ބުނެއެވެ. އަޑެއް ކިޔާފިއްޔާ ރެނދެއް ލާނެއެވެ. ކަމެއް ނުވެ ރަށެއްގެ ރައްޔިތުން އެވާހަކަ އެހެން ނުދާއްކާނެކަން ޔަގީނެވެ. ދައްކަން ވެއްޖެނަމަ ރަށުގައި ވިއްކާ ހުރިހާ މަސްތުވާ ތަކެއްޗާ ރަށު މުދިންބެއާވެސް ގުޅުވަންވީ ނޫން ހެއްޔެވެ. އެކަމަކު އެހެން އެވާހަކަ ނުދައްކައެވެ. ފުލުހުންނާ ގުޅުވައިގެން ވާހަކަ ދައްކާނީ ކޮންމެވެސް ކަމެއްވީމައެވެ. ރަށްރަށުގައި ވަޒީފާއަދާ ކުރާ ފުލުހުންނަށް ލިބޭ އާދަޔާ ޚިލާފު މުއްސަނދިކަން ބަލާނެ ކޮމިޝަނެއްވެސް ނެތެވެ. އެއީ ކިހިނެއް ލިބޭ ފައިސާއެއްތޯ ސުވާލު ކޮށްލާނެ މީހަކުވެސް ނެތީއެވެ.
ދަނގެތީގެ ހާދިސާއށް އެކަނި ބެލި ނަމަވެސް މިކަމުގައި އިހުމާލު އެބައޮތެވެ. ފުލުހުން ރިފޯމް ކުރުމުގެ މަސައްކަތް ފެށިކަމަށް ފުލުހުން ބުނާއިރު ރައްޔިތުންގެ އިތުބާރު އެ މުއައްސަސާއަށް ލިބޭނެފަދަ ގޮތަކަށް ރިފޯމް ކުރުން މުހިއްމެވެ. ރައްޔިތުން މިއަދު އުފައްދާނެ ސުވާލަކީ ރިފޯމް ކުރަނީ ކޮންކަންކަމެއް ތޯއެވެ. ކުޑަ ރަށެއްގައި މިދިޔަ ހަފުތާގައި ހިނގާދިޔަ އަނިޔާވެރި މަރުގެ ހާދިސާއަށް ނަޒަރު ހިންގާލިޔަސް ފުލުހުންގެ އިހުމާލު ފެނެއެވެ. ކަމާ ގުޅުންހުރި އިދާރާއިން ކުރިއާލާ އަޅަންޖެހޭ ފިޔަވަޅުތައް އެޅިނަމަ މިއަދު އެހާދިސާ އެހެން ހިނގައި ދިޔުން ދުރުކަމަށް ގިނަ ބަޔަކު ގަބޫލު ކުރެއެވެ. ރަށުތެރޭގައި އެމީހުން ކުރާ ކަންކަމަށް ފުލުހުންގެ މޮޓޯގައި ބުނާ ފަދައިން ރައްކާތެރިކަން ދިނުމަށް ފާރަވެރިވި ނަމަ މަހުމޫދުބެގެ ދުނިޔޭގައި ހުރީސް ކަމަށް އެރަށު މީހުން ގަބޫލު ކުރެއެވެ.
