އަވަހާރަކޮށްލި އިނގިރޭސިވިލާތުގެ ގާނޫނު ހަދާ މަޖިލީހުގެ މެމްބަރަކީ ރާއްޖޭގެ ހައްގުގައި ވަކާލާތު ކުރެއްވި ރާއްޖެއާ ގާތް ބޭފުޅެއް
16 އޮކްޓޯބަރު 2021 | ހޮނިހިރު 02:40ސަރ ޑޭވިޑް ވަނީ ރާއްޖެއިން އިނގިރޭސިވިލާތަށް ބޭރުކުރާ މަހުން ނަގާ ޑިޔުޓީ އެހެން ގައުމުތަކަށްވުރެ ބޮޑުކަމުން އެއީ ގަބޫލުކުރެވޭނެކަމެއް ނޫންކަމަށް ވިދާޅުވެ ވާހަކަދައްކަވާފައި
ސަރ ޑޭވިޑް އޭމެސް
އަނިޔާވެރިގޮތަކަށް އަވަހާރަކޮށްލި އިނގިރޭސިވިލާތުގެ ގާނޫނު ހަދާ މަޖިލީހުގެ މެމްބަރ ސަރ ޑޭވިޑް އޭމެސް އަކީ އެކި ގޮތްގޮތުން ރާއްޖެއަށް ދަތިވެފައިވާ ކަންކަން ހައްލުކުރުމުގައި ވަކާލާތު ކުރެއްވި ބޭފުޅެކެވެ. ޔޫކޭ-މޯލްޑިވްސް އޯލް ޕާޓީ ޕާލަމަންޓްރީ ގްރޫޕްގެ ޗެއަރ ގެ ހައިސިއްޔަތުން ރާއްޖެއާއި އިނގިރޭސިވިލާތުގެ ގުޅުން ބަދަހިކުރުމުގައި އިސްރޯލެއް ވަނީ އަދާކުރައްވާފައެވެ. ރާއްޖެއާއި ގާތްގުޅުމެއް ބާއްވަމުން ގެންދެވި ސަރ ޑޭވިޑް އޭމެސް އަކީ ރާއްޖޭގެ ހައްގުގައި ވަކާލާތު ކުރައްވަމުން ގެންދެވި ބޭފުޅެއްވެސްމެއެވެ.
ސަރ ޑޭވިޑް އޭމެސް އަނިޔާވެރިގޮތަކަށް އަވަހާރަކޮށްލުމާއި ގުޅިގެން ރާއްޖޭގެ ސިޔާސީ ފަރާތްތަކުން އެކަމުގެ ހިތާމަފާޅުކުރައްވަމުން ފާޅުކުރައްވާ އެންމެ ބޮޑު ޝުއޫރަކީވެސް ސަރ ޑޭވިޑް ރާއްޖެއަށް އެކި ގޮތްގޮތުން ވެވަޑައިގެންނެވި އެހީތެރިކަމާއި ޒަމާނުއްސުރެ ރާއްޖެއާއެކު ބާއްވަވަމުން ގެންދެވި އެކުވެރިކަމުގެ ގުޅުމުގެ ވާހަކައެވެ. ރާއްޖޭގެ ފޮރިން މިނިސްޓަރ އަދި އދ ގެ 76 ވަނަ ސެޝަންގެ ރައީސް އަބްދުﷲ ޝާހިދު ވަނީ ސަރ ޑޭވިޑް ރާއްޖޭގެ ހައްގުގައި ވަކާލާތު ކުރައްވަމުން ދެއްކެވި ވާހަކަފުޅެއްގެ ވީޑިއޯއާއެކު ޓްވީޓެއް ކުރައްވާފައެވެ. 29 ސިކުންތުގެ އެވީޑިއޯގައި ސަރ ޑޭވިޑް ވަނީ ކޮވިޑްގެ ދަތި ދަނޑިވަޅުގައިވެސް ރާއްޖެއިން އިނގިރޭސިވިލާތަށް ބޭރުކުރާ މަހުން ނަގާ ޑިޔުޓީ އެހެން ގައުމުތަކަށްވުރެ ބޮޑުކަމުން އެއީ ގަބޫލުކުރެވޭނެކަމެއް ނޫންކަމަށް ވިދާޅުވެފައެވެ. އެގޮތުން އެހެން ގައުމުތަކަށް 5 އިންސައްތައިގެ ޓެރިފެއް ކަނޑައަޅާފައިވާއިރު ރާއްޖެއިން ބޭރުކުރާ މަހަށް 20 އިންސައްތަ ނަގަމުންދިޔުމަކީ ގަބޫލުކުރެވޭކަމެއް ނޫންކަމަށް ވިދާޅުވެ ވަކާލާތުކުރައްވައެވެ.
އެންމެކުޑަކޮށް ތަރައްގީވެފައިވާ ގައުމުތަކުގެ ލިސްޓުން، ތަރައްގީވަމުން އަންނަ ގައުމުތަކުގެ ލިސްޓަށް ރާއްޖެ އެރުމުގެ ސަބަބުން، ރާއްޖެއިން ޔޫރަޕުގެ ގައުމުތަކަށް އެކްސްޕޯޓުކުރާ މަހުގެ ބާވަތްތަކަށް ލިބެމުން އައި ޑިއުޓީގެ ޢިނާޔަތްވަނީ، 2013 ވަނަ އަހަރުގެ ޑިސެމްބަރު މަހުން ފެށިގެން ކަނޑާލާފައެވެ. އޭގެސަބަބުން ރާއްޖެއިން ޔޫރަޕަށް މަސް އެކްސްޕޯޓުކުރުމުން ލިބެމުންދިޔަ މަންފާ ވަނީ ވަރަށް ބޮޑަށް ދަށްވެފައެވެ. ޔޫރަޕިއަން ޔޫނިއަނުން އިނގިރޭސިވިލާތް ވަކި ވުމާއި އެކު އެގައުމަށް ރާއްޖެއިން އެކްސްޕޯޓުކުރާ މަހުގެ ޑިއުޓީ ކުޑަ ކުރުމަށް ސަރުކާރުން ގިނަ މަސައްކަތްތަކެއްކޮށް ކުރިން ނަގަމުން އައި 24 އިންސައްތައިގެ ބަދަލުގައި މިހާރު ނަގަމުން އަންނަނީ 20 އިންސައްތައެވެ. ރާއްޖެއިން މަސައްކަތްކުރަމުން އަންނަނީ ޑިޔުޓީ މިއަށްވުރެ ކުޑަކުރުމަށެވެ.
މިކަމުގައި ރާއްޖޭގެ ބަސް އިއްވަވަމުން ސަރ ޑޭވިޑް ގެންދެވިއިރު ޑޭވިޑްގެ ކުއްލި ވަކިވެގެންދިޔުމާއެކު މިއީ ރާއްޖެއަށް ލިބުނު ވަރަށް ބޮޑު ހިތާމައެއްގެ ގޮތުގައި ރާއްޖެއިން ގެންދަނީ ބުނަމުންނެވެ. އެގޮތުން ޝާހިދުގެ ޓްވީޓްގައި އެކަމާއި ހިތާމަކުރައްވާކަމަށް ވިދާޅުވެ ސަރ ޑޭވިޑަށް ދެވުނު ހަމަލާ ވަނީ ކުށްވެރިކުރައްވާފައެވެ.
މީގެއިތުރުން ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުވެސް ވަނީ އެކަމުގެ ހިތާމަފާޅުކުރައްވާ އާއިލާއަށް ތައުޒިޔާ ވިދާޅުވެފައެވެ. އަދި ދެވުނު ހަމަލާ ކުށްވެރިކުރައްވާފައެވެ.
މީގެއިތުރުން ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދުވެސް ވަނީ ސަރ ޑޭވިޑް އަވަހާރަވުމާއި ގުޅިގެން އެކަމުގެ ހިތާމަފާޅުކުރައްވާ އެއީ ރާއްޖޭގެ ޒަމާންވީ އެކުވެރިއެއްކަމަށް ވިދާޅުވެފައެވެ.
ކުރީގެ ރައީސް މައުމޫން އަބްދުލްގައްޔޫމްވެސް ވަނީ ސަރ ޑޭވިޑް އަނިޔާވެރިގޮތަކަށް އަވަހާރަކޮށްލުމާއި ގުޅިގެން ތައުޒިޔާ ވިދާޅުވެ ދެގައުމުގެ ގުޅުން ބަދަހިކުރުމުގައި އިސްރޯލެއް އަދާކުރެއްވި ބޭފުޅެއްކަމަށް ވިދާޅުވެފައެވެ.
މީގެއިތުރުން ރާއްޖެއިން އިނގިރޭސިވިލާތަށް ކަނޑައަޅުއްވާފައި ހުންނަވާ ސަފީރު ޑރ ފަރަހަނާޒް ފައިސަލްވެސް ވަނީ ސަރ ޑޭވިޑް އަވަހާރަވުމާއި ގުޅިގެން އެކަމުގެ ހިތާމަފާޅުކުރައްވާފައެވެ. އަދި އެއީ އެކަމަނާ އާއި ރާއްޖޭގެ ގާތް ރަހުމަތްތެރިއެއްކަމަށް ވިދާޅުވިއެވެ.
ސަރ ޑޭވިޑް އަށް ހަމަލާ ދީފައިވަނީ ދާއިރާގެ ރައްޔިތުންނާ ބައްދަލުކުރެއްވުމަށް ލެއި އޮން ސީގެ ބެލްފެއާ މެތޮޑިސްޓް ޗާޗްގައި ބައްދަލުވުމެއް ކުރިއަށް ގެންދަވަނިކޮށެވެ. ރިޕޯޓުތައް ބުނާ ގޮތުގައި އޭނާ އަވަހާރަކޮށްލާފައިވަނީ އެެއް ފަހަރަށްވުރެ ގިނަ ފަހަރު ވަޅިން ހަމަލާދިނުމަށްފަހެވެ. އުމުުރުން 69 އަހަރުގެ އޭމެސްއަކީ 1983ވަނަ އަހަރުން ފެށިގެން ކޮންޒަވޭޓިވް ޕާޓިގެ މެމްބަރެއްގެ ގޮތުގައި މަޖިލިސް މެމްބަރުކަން ކުރައްވަމުން ގެންދެވި ބޭފުޅެކެވެ. މިހަމަލާއާއި ގުޅިގެން 25 އަހަރުގެ ފިރިހެނަކު ހައްޔަރުކޮށްފައިވާކަމަށް ފުލުހުން ވަނީ ބުނެފައެވެ.
