ކީރިތި ގުރްއާން ކިޔެވުމުގެ ގައުމީ މުބާރާތުގައި ބައިވެރިވުމަށް އެދޭ މުއައްސަސާތަކުން ޕޯޓަލްގައި ރަޖިސްޓްރީވުމަށް ހުޅުވާލައިފި

ކީރިތި ޤުރްއާން ކިޔެވުމުގެ ގައުމީ މުބާރާތުގައި ބައިވެރިވުމަށް އެދޭ މުއައްސަސާތަކުން ޕޯޓަލްގައި ރަޖިސްޓްރީވުމަށް ހުޅުވާލައިފިއެވެ.

ކީރިތި ޤުރްއާނާބެހޭ ޤައުމީ މަރްކަޒުން ބުނީ މި މުބާރާތުގައި ބައިވެރިވުމަށް އެދޭ މުއައްސަސާތަކުން ޕޯޓަލްގައި ރަޖިސްޓްރީވުމުގެ ފުރުސަތު ހުޅުވާލާފައިވާ ކަމަށެވެ. އެގޮތުން މި މަހުގެ 14ން 18ގެ ނިޔަލަށް ރަޖިސްޓްރީވެވޭނެ ކަމަށެވެ. މި މުބާރާތުގައި ބައިވެރިވާން އެދޭ އަތޮޅު ކައުންސިލްތަކާއި، ގްރޭޓަރ މާލޭ ސަރަހައްދުގެ ސުކޫލްތައް އަދި ޤުރްއާން ކުލާސްތަކާއި ޤުރްއާން އުނގަންނައިދޭ މަރުކަޒުތަކާއި ކުލަބް ޖަމްޢިއްޔާތަކާއި ކޮލެޖްތަކާއި ޔުނިވަރސިޓީތަކުން މި މުއްދަތުގައި ރަޖިސްޓްރީ ކުރަންވާނެ ކަމަށް ވެސް ވަނީ ބުނެފައެވެ. މި ލިންކްwww.qc.nchq.gov.mvމެދުވެރިކޮށް ރަޖިސްޓަރ ކުރެވޭނެއެވެ.

މުއައްސަސާ ރަޖިސްޓްރީކޮށް ނިމުމުން މުބާރާތުގައި ރަޖިސްޓްރީވާ މުއައްސަސާތަކަށް އެ މުއައްސަސާތަކުން ބައިވެރިން ރަޖިސްޓަރީ ކުރުމަށް 20 އޮކްޓޯބަރުން 26 އޮކްޓޯބަރު ގެ ނިޔަލަށް ފުރުޞަތު ހުޅުވާލެވޭނެ ކަމަށް ވެސް ކީރިތި ޤުރްއާނާބެހޭ ޤައުމީ މަރްކަޒުން ބުންޏެވެ.

މުބާރާތުގައި ބައިވެރިވާ ބައިވެރިންގެ ތެރެއިން ބަލައިގެން ކިޔެވުމުގެ ބައިގައި ބައިވެރިވާ ބައިވެރިންގެ ކިޔެވުމުގެ ރެކޯޑިންގ ހުށަހަޅާނީ 15 ނޮވެމްބަރުން 28 ނޮވެމްބަރުގެ ނިޔަލަށް ޕޯޓަލްއަށެވެ. އަދި ނުބަލާ ކިޔެވުމުގެ ބައި ކުރިއަށް ދާނީ 19 ޑިސެމްބަރުން 25 ޑިސެމްބަރުގެ ނިޔަލަށް ލައިވް ކޮށެވެ.

ކީރިތި ޤުރްއާނާބޭހޭ ޤައުމީ މަރުކަޒުން އިންތިޒާމު ކޮށްގެން ބާއްވާ ކީރިތި ޤުރްއާން ކިޔެވުމުގެ 34 ވަނަ ޤައުމީ މުބާރާތަކީ ދިވެހިންގެ ހިތްތަކުގައި ކީރިތި ޤުރްއާން ކިޔެވުމަށް ލޯބިޖައްސުމަށާއި، ކީރިތި ޤުރްއާން ހިތުދަސްކުރުމަށާއި، ތަޖްވީދުމަގަށް ޤުރްއާން ކިޔެވުމަށް ހިތްވަރުދިނުމަށާއި، ޤާރީންނާއި ޙާފިޡުން  އުފެއްދުމަށް ބާރު އެޅުމާއި ހިތްވަރު ދިނުމަށާއި، ބައިނަލް އަޤްވާމީ މުބަރާތްތަކަށް ބޭނުންވާ ބައިވެރީންގެ އާރެއް އުފެއްދުމުގެ މަޤްޞަދުގައި ބާއްވާ މުބާރާތެކެވެ.