ވީޑިއޯ ކުރުމަށް ފަހު ބަޔަކު ރާވައިގެން، ރަހީނުކޮށް ފައިސާ ހޯދާފައިވޭ: ރައީސް ނަޝީދު

ދުރާލާ ރާވައިގެން، އިންތިޒާމްކޮށްގެން ބަދު އަހުލާގީ އަމަލު ހިންގާ މަންޒަރު ވީޑިއޯކުރުމަށް ފަހު އެ ވީޑިއޯތައް ބޭނުންކޮށް، މީހުން ރަހީނުކޮށްގެން ފައިސާ ހޯދަން މަސައްކަތްކޮށްފައިވާ ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ބިދޭސީ ފިރިހެނަކާއި އެކު ގިނަ އަދަދެއްގެ ބަޔަކު ބަދުއަހުލާގީ އަމަލު ހިންގާ މަންޒަރު ފެންނަ ވީޑިއޯތަކެއް މީސްމީޑިއާގައި ދައުރުވާން ފެށުމާއި އެކު ފުލުހުން ވަނީ އެ މައްސަލަ ބަލަން ފަށާފައެވެ. އަދި އެ ވީޑިއޯތައް ބޭނުންކޮށްގެން ބްލެކްމެއިލް ކުރަމުންދާ މައްސަލައެއް މިދިޔަ މަރޗް މަހު ފުލުހުންގެ ސަމާލުކަމަށް ވަނީ އައިސްފައެވެ. އެއާއި އެކު އެ މައްސަލައިގައި ހިމެނޭ ބިދޭސީ ފިރިހެން މީހާ އާއި ބައެއް ދިވެހިން ހައްޔަރުކޮށް މައްސަލަ ތަހުގީގުކުރަމުން ދާއިރު، މި މައްސަލައިގައި ހައްޔަރު ކުރި މީހުންގެ ތެރޭގައި ސިޔާސީ މަޤާމުތަކުގައި ތިއްބެވި ބޭފުޅުންނާއި، އިދާރާތަކާއި މުއައްސަސާތަކުގެ އިތުރުން ތައުލީމީ ދާއިރާ އަށް ނިސްބަތްވާ ބައެއް މީހުން ވެސް ހިމެނެއެވެ.

މި މައްސަލައާ މެދު ވާހަކަފުޅުދައްކަވަމުން ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ރައީސް ނަޝީދު ވިދާޅުވީ މި މައްސަލަ ޤާނޫނީ ހަމަތަކުގެ ތެރެއިން ބަލަން ޖެހޭ ކަމަށެވެ.

މި ވީޑިއޯތަކާއި ގުޅިގެން ބްލެކްމެއިލްގެ މައްސަލައެއް ބަލަމުންދާ ކަމަށް ފުލުހުން ވަނީ ހާމަކޮށްފައެވެ. ފުލުހުން އެކަން ހާމަކޮށްފައިވަނީ މި ވީޑިއޯތައް ބޭނުންކޮށްގެން އެކި ފަހަރު މަތިން ބޮޑެތި އަދަދުތަކުން މީހުން އަތުން ފައިސާ އަތުލާފައިވާކަމަށް އަޑުތަކެއް ފެތުރިފައިވަނިކޮށެވެ.

ނަމަވެސް މިވީޑިއޯތަކުގެ މައްސަލައިގައި ފައިސާ ހޯދުމަށް ބަޔަކު ރަހީނުކުރިކަމަށް ސިޔާސީ ބޭފުޅަކު ހާމަކުރެއްވި މިއީ ފުރަތަމަ ފަހަރެވެ.

ބަދުއަހުލާގީ ވީޑިއޯތަކުގެ މައްސަލައިގައި ހައްޔަރުކޮށްފައިވާ ބިދޭސީ މީހާއަކީ ބަންގްލަދޭޝްގެ ރައްޔިތެއްކަމަށްވާ އެމްޑީ އަލަމްގީރުއެވެ. މިހާތަނަށް އައި އިރު އޭނާއާ އިއުތިރާފުގެ އެއްބަސްވުމެއް ހަދާފައި ނުވާނެ ކަމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ވަނީ ބުނެފައެވެ. އަލަމްގީރު ވަނީ އެތައް ބަޔަކާ އެކު ބަދުއަހުލާގީ އަމަލު ހިންގާ، އެ މަންޒަރު ރެކޯޑުވެސް ކޮށްފައެވެ. އަދި އެ މީހުން ދެނެގަތުމުގެ މަސައްކަތް ކަމާއި ބެހޭ ފަރާތްތަކުން ކުރާ އިރު މި މައްސަލަ އާއި ގުޅިގެން ބައެއް ވުޒާރާތަކާއި، ތައުލީމި ދާއިރާ އަދި އެމްއެންޑީއެފް އާއި ފުލުހުންގެ އިދާރާ ފަދަ ޔުނިފޯމް އެޅި މުއައްސަސާތަކުގެ މީހުން ވެސް ވަނީ ސަސްޕެންޑްކޮށްފައެވެ.