ލިމިޓް ކަނޑައެޅުމާއި ބޮންޑަކަށް ބަދަލުކުރުމުގެ ބާރު މަޖިލީހަކަށް ނެތް - ރައީސް ނަޝީދު
ގާނޫނީ ބޭފުޅުންގެ ލަފާ އެކަމުގައި އެގޮތަށް ވަނީ ލިބިފައި
މާލިއްޔަތު ކޮމިޓީގެ ބައްދަލުވުމެއް
އޯވަރޑްރޯ ލިމިޓް ކަނޑައެޅުމާއި، އެމޯޓައިޒިންގ ބޮންޑަކަށް ބަދަލު ކުރުމުގެ ބާރު މަޖިލީހަށް ނޯންނާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ، ދައުލަތުގެ ޚަރަދަށް ޒިންމާވުމުގެ ގާނޫނުގެ ބައެއް މާއްދާތަކުން އިސްތިސްނާ ވުމަށް ހުށަހަޅާފައިވާ ހުށަހެޅުން މާލިއްޔާތު ކޮމިޓީން ދިރާސާ ކުރުމަށްފަހު އެކުލާވާލި ރިޕޯޓުގެ މާއްދާއަކަށް އިޝާރާތް ކުރައްވައެވެ. ރައީށް ނަޝީދު ވިދާޅުވީ، ގާނޫނީ ބޭފުޅުންގެ ލަފާ އެކަމުގައި އެގޮތަށް ލިބިވަޑައިގެންފައިވާ ކަމަށެވެ.
އެ ގާނޫނުގެ 32 ވަނަ މާއްދާގެ (ހ)ގައި ބުނަނީ ޕަބްލިކް އެކައުންޓުން ނަގާ ފައިސާ އަނބުރާ 90 ދުވަހުގެ ތެރޭގައި ދެއްކުމަށް އޮންނަ އޮތުމަށް މަޖިލީހުން އިސްތިސްނާ ދިނުމަށް ނިންމުމަށްފަހު، އެކަން ހިންގާނެ ގޮތް ކަނޑައަޅާނީ، އެމްއެމްއާއި ފިނޭންސުން ކަމަށެވެ. އެހެންނަމަވެސް މިހާރު އޮތް ކޮމިޓީ ރިޕޯޓުގައި އެކަން ނިންމުމެއްގެ ގޮތުގައި ކަނޑައަޅާފައިވާ ކަމަށެވެ. އެހެންކަމުން އެއީ މަޖިލީހުން އަރުވާ ލަފައެއްގެ ގޮތުގައި ހިމެނުމަށް ރައީސް ނަޝީދު އެދިވަޑައިގެންނެވިއެވެ.
ކޮމިޓީ ރިޕޯޓުގެ ނިންމުމުގެ 5.2 ގައި ބުނެފައިވަނީ، 2021 ވަނަ އަހަރުގެ ޑިސެންބަރު މަހުގެ 31 ވަނަ ދުވަހުގެ ނިޔަލަށް ޕަބްލިކް ބޭންކް އެކައުންޓް އޯވަޑްރޯވެފައި ހުންނަ މިންވަރު ސެކިއުރިޓައިޒްކޮށް، މޯލްޑިވްސް މަނިޓަރީ އޮތޯރިޓީން ސަރުކާރަށް އިޝޫކޮށްފައިވާ 50 އަހަރުގެ މޯޓައިޒިންގ ބޮންޑަކަށް ބަދަލުކުރުމަށާއި، އަދި މި ބޮންޑުގެ ކޫޕަން ރޭޓަކީ އަހަރަކަށް 2.5 (ދޭއް ޕޮއިންޓް ފަހެއް) ޕަސަންޓް ކަމުގައި ކަނޑައެޅުމަށެވެ. 5.3 ގައި ބުނެފައިވަނީ، އޯޑީ ލިމިޓަކީ 2.5 ބިލިއަން ރުފިޔާ ކަމަށް ކަނޑައެޅުމަށެވެ.
ރައީސް ނަޝީދު ވިދާޅުވީ، އެ ތަފްސިލަކީ، އެމްއެމްއޭގެ މިނިވަން ކަމަށް އަރައިގަނެވޭ ފަދަ ތަފްސީލެއް ކަމަށް ދެކިވަޑައިގަންނަވާ ކަމަށެވެ.
އެހެންކަމުން އެކަމާމެދު މާލިއްޔަތު ކޮމިޓީގެ މުގައްރިރާއެކު ކުރެވުނު މަޝްވަރާގައި ވޯޓަށް އެހުމުގެ ކުރީގައި ރިޕޯޓްގެ ޖުމްލަތަކަށް ނުވަތަ ބަސްތަކަށް ބަދަލު ގެނައުމަށް އެދިވަޑައިގެންފައިވާ ކަމަށެވެ. އެގޮތުން އެއީ ލަފައެއް ކަމަށް ރިޕޯޓުގައި ހިމެނުމަށް މުގައްރިރު އަރިހުގައި އެދިވަޑައިގެންފައިވާނެ ކަމަށް ރައީސް ނަޝީދު ވިދާޅުވިއެވެ.
