މާލޭގެ ރައްޔިތުންނަށް އަތޮޅުތެރޭގެ ރަށްރަށުގައި ވަޒަންވެރިވެ، ބިން ލިބޭނެ ގޮތެއް ނެތުމުން މިނިސްޓަރގެ ކަންބޮޑުވުން
13 އޮކްޓޯބަރު 2021 | ބުދަ 05:28މާލޭގެ ރައްޔިތުންނަށް ވެސް ރަށްރަށް ގޮސް ރަށްރަށް ވެސް ތަރައްޤީވުމުގެ ފުރުސަތު ލިބެންޖެހޭ
މުހައްމަދު އަސްލަމް - މިނިސްޓަރ އޮފް ނޭޝަނަލް ޕްލޭނިންގ ހައުސިން އެންޑް އިންޕްރާސްޓްރަކްޗަރ
ރަށްރަށުން އެހެން ރަށެއްގެ ރައްޔިތުންނަށް ގޯތި ނުދޭން މަސައްކަތް ކުރާތީ އެކަމާ ކަންބޮޑުވާ ކަމަށް މިނިސްޓަރ އޮފް ނޭޝަނަލް ޕްލޭނިންގ ހައުސިނގ އެންޑް އިންފްރާސްޓަރަކްޗަރ މުހައްމަދު އަސްލަމް ވިދާޅުވެއްޖެއެވެ.
މިނިސްޓަރ ވިދާޅުވީ، މާލެ ތަރައްޤީ ވެފައިވަނީ ރަށްރަށުން މީހުން މާލެއައިސްގެން ކަމަށާއި، މާލޭގެ ރައްޔިތުންނަށް ވެސް ރަށްރަށް ގޮސް ރަށްރަށް ވެސް ތަރައްޤީވުމުގެ ފުރުސަތު ލިބެންޖެހޭކަމަށެވެ. ބުދަ ދުވަހުގެ ޖަލްސާގައި، މެމްބަރު އަލީ އާޒިމް ކުރެއްވި ސުވާލަށް ޖަވާބު ދެއްވަމުން އަސްލަމް ވިދާޅުވީ، މާލެ ތަރައްގީވެ ކުރިއަރާފައިވަނީ އަތޮޅު ތެރޭގެ ރައްޔިތުން މާލެ އައިސް މާލެ ތަރައްގީކުރުމަށް ކުރި މަސައްކަތުން ކަމަށެވެ. ނަމަވެސް މާލޭގެ ރައްޔިތުންނަށް އަތޮޅު ތެރޭގެ ރަށްތަކުގައި ވަޒަންވެރިވެ، ބިން ލިބޭނެ ގޮތެއް ނެތުމަކީ ކަންބޮޑުވުމެއް ކަމަށް އަސްލަމް ވިދާޅުވިއެވެ.
މިނިސްޓަރ ވިދާޅުވީ، މިއީ 21 ވަނަ ގަރުނު ކަމަށާއި، ރާއްޖޭގެ އެއްވެސް ރައްޔިތަކަށް އެމީހަކު ބޭނުން ތަނެއްގައި ވަޒަންވެރިވުމުގެ ފުރުސަތު މަނާވެގެން ނުވާނެކަމަށެވެ. މިނިސްޓަރ ވިދާޅުވީ، އެއްވެސް ގާނޫނަކުން އެކަން މަނާ ނުކުރި ނަމަވެސް ރަށްރަށުގެ ކައުންސިލުން އެ ފުރުސަތު ނުދޭ ކަމަށެވެ. ހިއްކާ ބިންތަކުން ވެސް ވަކި ޕަސެންޓެއް އެކަމަށް ކަނޑައެޅުއްވުމަށް ކުރެއްވި މަސައްކަތްޕުޅު ވެސް ކާމިޔާބު ނުވި ކަމަށް މިނިސްޓަރ ވިދާޅުވިއެވެ. މިކަމުގައި ވިސްނުން ތަރައްގީކުރަން ޖެހޭ ކަމަށް ވިދާޅުވިއެވެ.
މާލެއިން ލިބިފައިވާ ބިން ދޫކޮށްލުމުން ފުލެޓެއް ނުވަތަ ގޯއްޗެއް ދިނުމަށް މި ސަރުކާރުން ވެފައިވާ ވައުދު ފުއްދުމުގެ ގޮތުން ހިންގާ ޕްރޮގުރާމުގެ ދަށުން ދޫކުރާނީ 1،200 ގޯތިކަމަށް މިއަދުގެ ޖަލްސާގައި މިނިސްޓަރ އަސްލަމް ވަނީ ވިދާޅުވެފައެވެ. އަސްލަމް ވިދާޅުވީ ރައީސް ނަޝީދުގެ ވެރިކަމުގައި ހިންގެވި ވެށިފަހި މާލެ ޕްރޮގުރާމުގެ ދަށުން ގޯތި ދޫކޮށްލި ބައެއް ފަރާތްތަކަށް ގޯތި ދޫނުކުރެވި އެބަހުރި ކަމަށެވެ. އެމަސައްކަތް ކުރައްވަން ބޭނުންފުޅުވިޔަސް މިހާރު އެކަމުގައި އެމަނިކުފާނުގެ އަތްޕުޅު ބަނދެވިފައިވާ ކަމަށް ވިދާޅުވިއެވެ. އެމަސައްކަތް ކުރެވޭނީ ގާނޫނީ އިދާރާތަކުން ކަނޑައަޅުއްވާ އިންތަކުގެ ތެރެއިން ކަމަށެވެ.
ރައީސް ނަޝީދުގެ ވެރިކަމުގައި ހިންގެވި ވެށިފަހި ޕްރޮގުރާމުގެ ދަށުން ގޯތި ދޫކޮށްލުމުން ގޯތި ލިބިފައި ނެތް ފަރާތްތަކަށް ގޯތި ދިނުމުގެ އިތުރުން މާލެއިން ގޯތި ދޫކޮށްލާ ފަރާތްތަކަށް ގޯތި ދިނުމަށް މި ސަރުކާރުން ހިންގަން ރާވާފައިވާ ހަމައެކަނި މަޝްރޫޢަކީ ގުޅިފަޅުގައި ހިއްކާ ސަރަހައްދުން ގޯތި ދޫކުރުމަށް ހިންގާ މަޝްރޫޢު ކަމަށާއި، އެ މަޝްރޫޢުގެ ދަށުން ދޫކުރާނީ 1،200 ގޯތި ކަމަށް ވެސް މިނިސްޓަރު އަސްލަމް ވިދާޅުވިއެވެ.
