ދިއްފުށީ ބިން ހިއްކަން މި އަހަރު ނިމުމުގެ ކުރިން ހަވާލު ކުރާނެކަމަށް މިނިސްޓަރ އޮފް ނޭޝަނަލް ޕްލޭނިންގ ހައުސިން އެންޑް އިންޕްރާ ސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި، ދިއްފުށީ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަސައްކަތާ ބެހޭ ގޮތުން ތުލުސްދޫ ދާއިރާގެ މެންބަރު އިބްރާހީމް ނަސީމް ކުރެއްވި ސުވާލަށް ޖަވާބު ދެއްވަމުން މިނިސްޓަރ އަސްލަމް ވިދާޅުވީ، ދިއްފުށީގެ ބިން ހިއްކުމާއި ގޮނޑުދޮށް ހިމާޔަތްކުރުމަށް 1 މިލިއަން ރުފިޔާ ބަޖެޓްގައި ހިމަނާފައިވާނެ ކަމަށެވެ. އަދި މިއަހަރުގެ 3 ވަނަ ކުއާޓަރގައި ހަވާލުކުރުމަށް މަސައްކަތް ކުރެއްވި ނަމަވެސް އެކަން އަދި ނުވެ އޮތް ކަމަށެވެ. އެހެންނަމަވެސް މި އަހަރު ނިމުމުގެ ކުރިން އެ މަސައްކަތް ކޮންޓްރެކްޓަރަކާ ހަވާލު ކުރައްވާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، ބިން ހިއްކުމުގެ މަޝްރޫއުތައް މިހާރު ހިންގަމުންދާއިރު، ލޯކަލް ޓޫރިޒަމަށް މަގުފަހިވާނެ ގޮތަށް ގޮނޑުދޮށް ހިމާޔަތް ކުރުން ކުރިއަށް ގެންދިޔުމުގެ ވިސްނުންފުޅު ގެންގުޅުއްވާ ކަމަށާއި، މިހާރު ކޮންސެޕްޓް ޑިޒައިން ކުރައްވަނީ ވެސް އެގޮތަށް ކަމަށެވެ.
ދިއްފުށީގެ ކޮންސެޕްޓް ތައްޔާރުކޮށް ނިމިފައިވާ ކަމަށާއި، ކުރިއަށް އޮތް ހަފްތާގައި ކައުންސިލާއި ދާއިރާގެ މެމްބަރާއެކު އެކަން ހިއްސާކުރައްވާނެ ކަމަށް ވިދާޅުވިއެވެ.
މިނިސްޓަރ ވިދާޅުވީ، މިހާރު ރާއްޖޭގައި ބިން ހިއްކުމާއި ގޮނޑުދޮށް ހިމާޔަތްކުރުމުގެ ޑިމާންޑާ އެއްވަރަށް އެކަމަށް ބޭނުންވާ އުޅަނދުފަހަރު ނެތް ކަމަށެވެ. މިކަމަކީ ވެސް އެއްފަހަރާ ގިނަ ޕްރޮޖެކްޓްތައް ކުރިއަށް ނުގެންދެވޭ ސަބަބެއް ކަމަށް މިނިސްޓަރ ވިދާޅުވިއެވެ.
ބިން ހިއްކުމުގެ 8 ޕްރޮޖެކްޓެއް ޓެންޑަރުގައި އެބައޮތް ކަމަށާއި، 3 ޕްރޮޖެކްޓް މިހާތަނަށް ނިމިފައިވާކަމަށް އަސްލަމް ވިދާޅުވިއެވެ. ބިން ހިއްކުމުގެ 4 މަޝްރޫއުގެ އަމަލީ މަސައްކަތް މިހާރު ކުރިއަށްދާ ކަމަށާއި، 7 މަޝްރޫއު ކޮންޓްރެކްޓް ކުރެވި، 6 މަޝްރޫއެއް ކޮންސެޕްޓް ޑިޒައިން މަރުހަލާގައި އޮތް ކަމަށް އަސްލަމް ވިދާޅުވިއެވެ.
