ކުޑަ އަންހެން ކުއްޖަކު ބްލެކްމެއިލްކުރި މައްސަލައެއް ފުލުހުން ތަހުގީގު ކުރަން ފަށައިފި
ފުލުހުންނަށް މި މައްސަލަ ހުށަހަޅާފައިވަނީ އާދީއްތަ ދުވަހުގެ ވަގުތެއްގައި
މޯލްޑިވްސް ޕޮލިސް ސަރވިސްގެ ހެޑް ކުއާޓާރ، ޝަހީދު ހުސެއިން އާދަމް ބިލްޑިންގ
ކުޑަ އަންހެން ކުއްޖަކު ބްލެކްމެއިލް ކުރި މައްސަލައެއް ފުލުހުން ތަހުގީގު ކުރަން ފަށައިފިއެވެ.
ފުލުހުން ބުނީ ދެކުނު ޕޮލިސް ރީޖަން ހިމެނޭ ރަށެއްގައި ކުޑަ ފިރިހެން ކުއްޖަކު ކުޑަ އަންހެން ކުއްޖަކު ބްލެކްމެއިލް ކުރި ކަމަށް ބުނާ މައްސަލައެއް އާދިއްތަ ދުވަހުގެ ވަގުތެއްގައި ފުލުހުންނަށް ހުށަހަޅާފައިވާ ކަމަށެވެ. އަދި މި މައްސަލަ ތަހުގީގު ކުރަމުންދާ ކަމަށެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި މި މައްސަލަ ހުށަހަޅާފައިވަނީ ގއ. ވިލިނގިލީ ޕޮލިސް ސްޓޭޝަނަށެވެ. ރާއްޖެއެމްވީއަށް މައުލޫމާތު ދެމުން އެ އަންހެން ކުއްޖާގެ އާއިލާ މީހަކު ބުނީ އަންހެން ކުއްޖާއާ ފިރިހެން ކުއްޖާ ދިމާވީ ޕަބްޖީ ގޭމް ކުޅެނިކޮށް ކަމަށެވެ. އަދި ބައްދަލުކުރުމަށްފަހު ހަތަރު ނޫނީ ފަސް މީހުން ހިމެނޭ ގްރޫޕަކުން އެ ކުއްޖާގެ ފޮޓޯ ނެގި ކަމަށެވެ. އެއަށްފަހު އެ ފޮޓޯތައް ލީކޮށްލާނެ ކަމަށް ބުނެ އިންޒާރު ދީ، އާއިލާގެ މީހުން މަރާލާނެ ކަމަށް ބުނެ ވެސް އިންޒާރު ދީފައިވާ ކަމަށެވެ.
އެ އަންހެން ކުއްޖާގެ އާއިލާ އިން މައްސަލަ ފުލުހުންނަށް ހުށަހެޅި ނަމަވެސް މައްސަަލަ ވަގުތުން ނުބެލޭ ކަމަށާއި އެމީހުން ފޮޓޯ ލީކް ކޮށްލާފައިވަނީ ފުލުހުންނަށް މައްސަލަ ހުށަހެޅި ފަހުން ހޯމަ ދުވަހުގެ ވަގުތެއްގައި ކަމަށެވެ. މި މައްސަލަ ޖެންޑަރ މިނިސްޓްރީއަށް ވެސް ހުށަހަޅާފައިވާ ކަމަށް އާއިލާއިން ވަނީ ބުނެފައެވެ.
މިކަމާގުޅިގެން އެ ރަށުގައި މުޒާހަރާ ކުރަމުންދާތީ އެކަމުގެ މައުލޫމާތު ހޯދާލުމަށް ވިލިނގިލީ ކައުންސިލްގެ ރައީސް ވިޝާލް މުޙައްމަދަށް ގުޅާލުމުން ވިދާޅުވީ އެފަދަ އެއްވެސް ކަމެއް ހިނގައިގެން އުޅޭކަމެއް ނުވަތަ މުޒާހަރާ ކުރަމުންދާ ކަމުގެ މައުލޫމާތު ލިބިފައިނުވާ ކަމަށެވެ.
ރަށުގައި މިފަދަ ކަމެއް ހިނގައި މައްސަލަ ފުލުހުންނަށް ހުށަހެޅިގެން ދިޔައިރުވެސް އެ ރަށު ކައުންސިލަށް މީގެ އެއްވެސް މައުލޫމާތެއް ނޭނގޭތީ އެ ކައުންސިލަށް ވަނީ ފާޑުކިޔުން އަމާޒުވެފައެވެ.
