ފަތުރުވެރިކަމުގެ ރަން އަހަރު ރަން އަހަރަކަށްވާ ގޮތަށް ފާހަގަކުރާނަން: މިނިސްޓަރު މަޢުޞޫމް

ފަތުރުވެރިކަމުގެ ރަން އަހަރު ރަން އަހަރަކަށްވާ ގޮތަށް ފާހަގަކުރަން ނިންމާފައިވާ ކަމަށް ޓުއަރިޒަމް މިނިސްޓަރު ޑރ. ޢަބްދުﷲ މަޢުޞޫމް ވިދާޅުވެއްޖެއެވެ.

''ޕްލާސްޓިކް ޕޮލިއުޝަން ޗެލެންޖް 2021'' ގްލޯބަލް ޔޫ.އެން.ޑަބްލިއު.ޓީ.އޯގެ ހަތަރު ފައިނަލިސްޓުން ބައްދަލުކުރުމަށްފަހު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ, ފަތުރުވެރިކަމުގެ ޞިނާޢަތަށް 50 އަހަރު ފުރުން ކުލަ ގޮތަކަށް ފާހަގަކުރާނެ ކަމަށާއި، އަންނަ އަހަރުގެ ޖެނުއަރީ މަހުގެ އެއްވަނަ ދުވަހުން ފެށިގެން ގިނަ ޕްރޮގްރާމްތައް ކުރިއަށް ގެންދާނެ ކަމަށެވެ. އަދި ކުރިއަށް ގެންދާ ޕްރޮގްރާމްތައް މިއަހަރުގެ ޑިސެމްބަރު މަހުގެ ތެރޭގައި އިއުލާން ކުރާނެ ކަމަށެވެ.

މިނިސްޓަރު ވިދާޅުވީ ރާއްޖެއަކީ ކުޑަ ގައުމެއް ނަމަވެސް ބައިނަލްއަޤްވާމީ ދުނިޔޭގައި މަގުބޫލު ގައުމެއް ކަަމަށެވެ. މި މަގުބޫލުކަން ލިބިގެންދަނީ ގިނަ ބައެއްގެ ބުރަ މަސައްކަތުންކަން މިނިސްޓަރު ފާހަގަކުރެއްވިއެވެ.

މިނިސްޓަރު ވިދާޅުވީ ފަތުރުވެރިކަން އިތުރަށް ތަރައްގީ ކުރުމަށް، ހޭލުންތެރިކަމުގެ ތަފާތު ޕްރޮގްރާމްތަކާއި، މީހުން ބިނާކުރާނެ ޕްރޮގްރާމްތަކާއި، ސަގާފަތާއި އާދަކާދަތައް ކުރިއެރުވުމަށް ޕްރޮގްރާމްތައް ކުރިއަށް ގެންދާނެ ކަމަށެވެ.

ރާއްޖޭގެ ފަތުރުވެރިކަމާއި، ތިމާވެއްޓާއި ގުޅިފައިވާކަން ފާހަގަކުރައްވައި މިނިސްޓަރު ވިދާޅުވީ, ތިމާވެށި ރައްކާތެރިކޮށްގެން މެނުވީ ފަތުރުވެރިކަން ކުރިއަށް ނުގެންދެވޭނެ ކަމަށެވެ. އެގޮތުން ފަތުރުވެރިކަމުގެ ޞިނާޢަތުގައި މަސައްކަތްކުރާ ހުރިހާ ފަރާތްތަކުން ވެސް ތިމާވެއްޓަށް ޚާއްސަ ސަމާލުކަމެއް ދޭކަމަށް މިނިސްޓަރު މަޢުޞޫމް ވިދާޅުވިއެވެ.