ގައިދީއަކަށް އަނިޔާއެއް ކޮށްފައި ދެން އޮފިސަރެއްގެ ގޮތުގައެއް ނުހުރެވޭނެ - އިމްރާން
ފުރަތަމަ 100 ދުވަހުގެ ތެރޭގައި ޖަލުގެ އޮޑިޓެއް ހެދި އެ އޮޑިޓުން ފާހަގަވި ކަންކަން މިހާރުވެސް ބަލަމުން ގެންދަނީ
އިމްރާން އަބްދުﷲ - ހޯމް މިނިސްޓަރ
ޖަލުގެ ހާލަތު ބަދަލުކުރުމަށް އެންމެ ފުރަތަމަވެސް ފެއްޓެވި ކަަމަކީ، ޖަލުގައި ގައިދީންނަށް ކުރާ އަނިޔާ ހުއްޓުވަން ފެއްޓެވި މަސައްކަތް ކަމަށް ހޯމް މިނިސްޓަރ ޝެއިޚް އިމްރާން އަބްދުﷲ ވިދާޅުވެއްޖެއެވެ.
ރައްޔިތުންގެ މަޖިލީހުގެ ހޯމަދުވަހުގެ ޖަލްސާގައި ހޯރަފުށި ދާއިރާގެ މެމްބަރު އަހްމަދު ސަލީމް ކުރެއްވި ސުވާލަށް ޖަވާބު ދެއްވަމުން މިނިސްޓަރ އިމްރާން ވިދާޅުވީ، ޖަލުގެ އޮފިސަރުންގެ ގޮތުގައި ވެސް ތިބެނީ އިންސާނުން ކަމަށާއި، ވަކި އޮފިސަރެއްގެ ޠަބީޢަތް ހުންނަ ގޮތުން އެފަދަ ކަމެއް ހިނގާފާނެ ކަމަށެވެ. އެހެންނަމަވެސް ޖަލުގައި ގައިދީންނަށް ކުރާ އަނިޔާ ހުއްޓުވުމަކީ މި ސަރުކާރުގެ ވައުދެއް ކަމަށެވެ. އެކަން އެގޮތަށް ކުރުމަށް ސަރުކާރުގެ ފުރަތަމަ 100 ދުވަހުގެ ތެރޭގައި ޖަލުގެ އޮޑިޓެއް ހެދި އެ އޮޑިޓުން ފާހަގަވި ކަންކަން މިހާރުވެސް ބަލަމުން ގެންދާ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، ޖަލުގައި ގައިދީއަކަށް އަނިޔާއެއް ކޮށްފި ނަމަ އެ އޮފިސަރަކަށް ފިޔަވަޅު އަޅުއްވާނެ ކަމަށާއި، މިހާތަނަށްވެސް އެކަން އެގޮތަށް ކޮށްފައިވާނެ ކަމަށެވެ. ގައިދީއަށް އަނިޔާއެއް ކޮށްފައި ދެން އޮފިސަރެއްގެ ގޮތުގައެއް ނުހުރެވޭނެ ކަމުގެ ޔަގީންކަން މިނިސްޓަރ ދެއްވިއެވެ.
މިނިސްޓަރ ވިދާޅުވީ، މި ސަރުކާރު އައިފަހުން ޖަލުގައި އެފަދަ ދެ ތިން ހާދިސާއެއް މިހާތަނަށް ހިނގާފައިވާ ކަމަށެވެ. އެކަމުގައި ޝާމިލުވި އޮފިސަރުންނަށް ފިޔަވަޅު އަޅާފައިވާނެ ކަމަށާއި، ބައެއް އޮފިސަރުން ވަކި ކުރެވި، އަނެއްބައި އޮފިސަރުން ކަމާގުޅުންހުރި މިންވަރަށް ބަލައި ރޭންކް ދަށްކުރެވިފައިވާ ކަމަށް މިނިސްޓަރ ވިދާޅުވިއެވެ.
ދާދި ފަހުން ޖަލުގައި ވާނުވާ ބަންދުގައި ހުރި މީހަކު ނިޔާވި ހާދިސާއާ ގުޅިގެން ފޮނަދޫ ދާއިރާގެ މެންބަރު މޫސާ ސިރާޖް ކުރެއްވި ސުވާލަށް ޖަވާބު ދެއްވަމުން މިނިސްޓަރ ވިދާޅުވީ، އެ ހާދިސާއާ ގުޅިގެން ވަކި މީހެއްގެ އިހުމާލު އޮތް ކަމަށް ފާހަގަކުރެވިފައި ނުވާ ކަމަށެވެ. މި އަހަރުގެ ތެރޭގައި ވެސް 8 ވަރަކަށް ފަހަރު ޑޮކްޓަރަށް ދެއްކިފައިވާ ކަމަށް ވިދާޅުވިއެވެ. އަދި ޖަލުގައި ހުންނަ ގައިދީންނަށް ބޭސްފަރުވާ ކުރުމުގެ އުސޫލް އޮންނަ ކަމަށާއި އެ އުސޫލުގެ ތެރެއިން ޑޮކްޓަރަށް ދައްކައި، ބޭސް ފަރުވާގެ ކަންކަން ކުރިއަށް ގެންގޮސްފައިވާ ކަމަށް ވިދާޅުވިއެވެ. އެހެންކަމުން އެ މައްސަލައިގައި އިހުމާލެއް އޮތްކަމަށް ފާހަގަކުރެވިފައި ނެތް ކަަމަށް ވިދާޅުވިއެވެ.
މި ސަރުކާރު އައިއިރު، ވާނުވާ ބަންދުގައި ވަރަށް ގިނަ އަދަދެއްގެ މީހުން ތިބި ކަމަށާއި، އެކަން ހައްލު ކުރުމަށް މަސައްކަތް ތަކެއް ކުރެވިފައިވާ ކަމަށް ވިދާޅުވިއެވެ. އަދި މިހާރުވެސް ވާނުވާ ބަންދުގައި ތިބޭ މީހުންގެ މައްސަލައަށް ހައްލު ގެނައުމަށް ޕީޖީއާއެކު އަބަދުވެސް މަޝްވަރާ ކުރަމުން ދާ ކަމުގައި މިނިސްޓަރ ވިދާޅުވިއެވެ.
