ފުވައްމުލަކު ނަރުދަމާގެ މައްސަލަ މި މަހުގެ ނިޔަލަށް ހައްލުވާނެ

ފުވައްމުލަކު ނަރުދަމާއަށް ދިމާވެފައިވާ މައްސަލަ މި އޮކްޓޯބަރު މަހުގެ ނިޔަލަށް ހައްލުވާނެ ކަމަށް ފެނަކަ ކޯޕަރޭޝަނުން ބުނެފިއެވެ.

ރާއްޖެއެމްވީއަށް މައުލޫމާތު ދެއްވަމުން ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަހުމަދު ސައީދު މުހައްމަދު ވިދާޅުވީ، ނަރުދަމާގެ މައްސަލަ ހައްލުކުރުމަށް ފެނަކަ ކޯޕަރޭޝަނުން ފަށާފައިވާ މަސައްކަތް މި މަހުގެ ނިޔަލަށް ނިމޭއިރު، ކުރިން ރައްޔިތުން އުފުލަން ޖެހުނު ތަކުލީފުތަކަށް ލުއި ލިބިގެންދާނެ ކަމަށެވެ.

ފުވައްމުލަކު ނަރުދަމާއަށް ދިމާވެފައިވާ ނަޖިސް ބޭރުވުމުގެ މައްސަލައަށް ހައްލެއް ގެނައުމަށްޓަކައި އަމަލީ މަސައްކަތް ފަށާފައިވަނީ މެއި މަހުގެ ތެރޭގައެވެ. މިކަމަށް ގާތްގަނޑަކަށް 43 މިލިއަނެއް ހާ ރުފިޔާ ޚަރަދުވާ ކަމަށް ވެސް ފެނަކައިން ބުނެފައިވެއެވެ.

ފުވައްމުލަކުގެ ނަރުދަމާ ނިޒާމު ވެފައިވަނީ، ރައްޔިތުންނަށް ބޮޑު ތަކުލީފަކަށެވެ. މި ނިޒާމު ގާއިމުކޮށް ބޭނުން ކުރަން ފެށި ދުވަހުން ފެށިގެން ވެސް މިކަމުގައި ރައްޔިތުން ކުރަން ފެށި ޝަކުވާތަކަށް މިހާތަނަށް އަދި ނިމުމެއް ނާދެއެވެ.

ކޮންމެ ދުވަހަކު ޖަންކްޝަންތަކުން ލީކުވެ، ކޮންމެ ދުވަހަކު ވެސް އެ ސާފުކުރަން ޖެހެއެވެ. އެ ރަށުގައި ބަހައްޓާފައިވާ 70 އިންސައްތަ ޖަންކްޝަންތަކުން ނަޖިސް ލީކުވެއެވެ. މިއީ ތާރު އެޅުމުގެ ކުރިން އަދި މަގު ހެދުމުގެ ކުރިން ހައްލު ކުރަން ޖެހޭ މައްސަލައަކަށްވީ ނަމަވެސް މިހާތަނަށް މިކަމަށް ހައްލު ލިބިފައި ނުވާކަމަށް އެސިޓީގެ މޭޔަރު ވިދާޅުވިއެވެ.

މި މައްސަލަ ދިމާވާ މައިގަނޑު ސަބަބެއްގެ ގޮތުގައި މޭޔަރު ފާހަގަކުރެއްވީ، މަސައްކަތް ކުރުުމުގައި އަވަސް އަރުވާލައި މޮނިޓަރ ނުކުރެވި ދިޔުން ކަމުގައެވެ. ނަރުދަމާ ނިޒާމު ގާއިމުކުރުމަށް ބޭނުންކުރި ސާމާނުގެ ވެސް ފެންވަރު ދަށް ކަމަށާއި، ނަރުދަމާއާއި، ފެނުގެ ނިޒާމުގެ ޖޮއިންޓްތަކުގައި ވެސް ބޮޑެތި މައްސަލަތަކެއް އެބަހުރި ކަމަށެވެ. އެހެން ވުމުގެ ސަބަބުން، ގޭގޭ ގެ އިސްކުރުތަކުން ނުސާފު ފެން އަންނަ މައްސަލަ ވެސް ވަނީ ފެންމަތިވެފައެވެ.

ފުވައްމުލަކުގެ ނަރުދަމާ ނިޒާމު ގާއިމުކޮށް އިފްތިތާހު ކުރީ، 2018 ސެޕްޓެމްބަރު 14 ވަނަ ދުވަހުއެވެ. މި މަޝްރޫއަށް ދައުލަތުގެ ބަޖެޓުން 300އެއްހާ މިލިއަން ޚަރަދުކުރިއެވެ.

މި މައްސަލަ ހައްލުކުރުމަށް ފެނަކައާ ހަވާލުކޮށްފައިވާއިރު، އެ ކުންފުނިން، މާޗް މަހު ބުނީ، 6 މަސްދުވަހުގެ ތެރޭގައި ހައްލު ހޯދައިދޭނެ ކަމަށެވެ.